MIMER

Mizoram hian tuilet hnu-ah Medical College pakhatmah kan la nei ve lova. Me­dical college nei tura Mizoram sorkarin tan a lâk tan hun hi kum 2008, kum 10 chuang kal ta tawhah khan a ni. Inpuahchah chho zelin Medical College dinna atan hian kum 2014 khan inhriatthiamna thuthlung (memorandum of understanding) chu an ziak a. Heti chung hian sorkar hian a tak a he Medical  College  dinna leh tihhlawhtlinna atan hian thâ a thawh tlem hle a. Medical Council of India (MCI) duhdan anga hnathawktu lak chungchangte pawh, thutkhawm apiang a sawi a ni chungin, sorkar a hmanhmawh lem lo. Hna thenkhat chu MCI in a rawn endik hmasak ber hnu, kum 2017 November khan siam a ni ta chauhva. Chhan tam tak vangin zirtirtu lak hi tihkhawtlai a ni a, chumi avang chuan MCI endikna hmasa berah a tla ta phawt a ni. 

Zirtirtu leh thawktu dang lak chauh a nilova, Medical College-in a neih ngei ngei ngai hmanrua leh bungraw lei kawngah, sorkar department lam an vuaichà em em a, hetiang tihpuitlinna tura rawtna leh pawmpuina file-te chu satelin a phur emaw tih mai turin a muang a. Medical college dinna atana mamawhte hi damdawiin mamawh nen a inang vek kher lova, chuvangin sorkar dân anga file kal muang lutuk leh khirhkhan taka kalpui lohva chinfel chite pawh a awm a. Chuti chung chuan Mizoramin Medical College a neih chhun tur, tihpuitlinna kawngah hian sorkar hi ‘hnapkhawn speed’ in a kal tih loh theih a ni lo.

Hnathawktu lak, bungrua leh khâwl lei leh a college building tur sakte bakah, library changtlung tak neih hi a hun bituk a awm a, chuta hunbi tuktu chu MCI a ni a, MCI hian a duhdan tihpuitlin a ni em tih hre turin endiktu team a tir thut thut thin a. Vawi tam endik a nih hnu-ah Medical College din phalna hi a pe thei lova. Tunah pawh hian phalna a pek hi a thuphung ang chauh a nih avangin MCI duhdan tlin lova, sorkarin vuaicha leh a nih phung tur diktak phak lova a enkawl chuan MCI Board of Governors hian an phalna pek tawh hi an thaichhe leh thei reng a ni. 

He kan Medical College neih ve chhun, Mizoram Institute of Medical Education and Research (MIMER) tih hming hi sorkar hmasa a Health Minister Pu Lal Thanzara hova thukhawmin an pawm a ni a. Sorkarin a ngaihsak lem lohzia tilangtu chu MNF member Pu Lalruatkima’n MIMER lampum kha Assembly-ah a zawt a, Health Minister-in a chhang thei lo! Amaherawh chu tuna MNF sorkar tharin MIMER hming thlak tura thutlukna a siam chhan hi Pu Lal Thanzara’n a lampum sawi a harsat em avang leh lam a harsat avang kha chu niin a lang lem lo thung. 

Kum 2008 vela MIMER din tura buaipui chhoh a nih aṭangin kum 2018 a hawn theih chauh a ni mai kha, tam tak chuan a chhan kan hre kher lovang. Kan thenawm Manipur khian sorkar laipui enkawl Medical College hlun tak - Regional Institute of Medical Science (RIMS) an nei a, Mizo doctor tam tak, a thiam ber berte hi RIMS a zir chhuak an ni. An Chief Minister hlui Ibobi Singh khan state medical college din a rawt a. Din tura thil an tih tan hi MIMER din tura tan kan lak tan kum 2008 December thla vel kha a ni a. Anni chuan society dinin thuneihna sang tak (autonomy) an pe nghal a, a hnu kum hnihna 2010 khan an medical college, Jawaharlal Nehru Institute of Medical Sciences (JNIMS) chu hawn a ni ta nghal a. Arunachal Pradesh-a an Medical College din tak, Tomo Riba Institute of Health & Medical Sciences (TRIHMS) phei khi chu kum 2017 a ti tanin society an din lâwk avangin, a kum leh 2018 a MIMER hawn rualin an hawng hman a ni.

Sorkar laipui hian tunhma ang khan state sorkara department-te hi engkima engkimah a ring tawh ngai lova, society din turin a ti zel tawh. Chumi avang chuan Health department hotu lian zinga miten an enkawl bik thin, AIDS control te pawh Mizoram State AIDS Control Society (MSACS) in an enkawl ta a, natna dang pawh chuti bawk. State Health Care Society te kan nei tawh a, a thenah chuan society hming pu lovin, mission lam zawnga kal a ni a, National Health Mission (NHM) ti zawngin a kal ta. Mipui leh sorkar aiawha MIMER enkawl mektu (nodal department) Directorate of Hospital and Medical Education hi hna an ngah hle a, Mizoram puma damdawiin-te hi an enkawl bakah, inrèlbawlna hautak fé an nei a, hemi a nih avang hian MIMER dinna turah paw'n an chak tawk lova, kum 10 zet hun an hmang a nih kha. Directorate-in kalpui lovin a tir aṭang khan MCI duhdan angin Society kutah pe pumpuhlûmin kalpui ni sela, kan state thenawmte ang hian rang leh awlsam takin kan nei mai tur a lo ni e. 

Medical college dinna atan hian sorkar laipuiin sum a pe thin a, phalna petu erawh chu MCI a ni. Sorkar laipuiin Medical College dinna atana kaihhruaina (guidelines) a siam, a tih ngei ngei tura a bituk chu, sorkar laipui emaw state sorkarin emaw a din, mahni a thuneihna nei (autonomous body) emaw The Societies Registration Act, 1860 hnuaia society din emaw, hemi zûlzui a state-te’n an dan siam hnuaiah emaw a din a awm ngei ngei tur a ni tih a ni. (An autonomous Body promoted by Central or State Government or under a Statute for the purpose of medical qualification; A society registered under the Societies Registration Act, 1860 for corresponding Acts in States; or A public Religious or Charitable Trust registered under the Trust act, 1882 or the WAKFS Act, 1954. Compa­nies registered under The Company Act, 1956). 

India rama medical college tha leh lâr - AIIMS, PGI Chandigarh, RIMS te leh Mizoram aṭang a tam takin kan pan mek Shillong khwpui daifèma awm, Mizoramah awm ve se kan tih em em NEIGRIHMS te hi society tha tak thuneihna sang tak nei-in an enkawl vek an ni a. He’ng society-te hi an duh duha dik lo taka an khawsak theihlohna atan leh hna tha taka an kalpui theih na’n by-law siam a, chumi zulzui ang thlapa kal chu an ni. Mizoram sorkara Health Department Joint Secretary kaihhruaina hnuaiah, MIMER enkawltu tur society dinna tur leh a kalphung tur leh tih leh tih loh tur bituktu atan High Level Committee  dinin constitution by-law duan a ni a. He committee hian India rama Medical College tha ber ber kan tarlan tak leh a dangte society by-law zir kualin MIMER tan hian by-law tha tak a lo siam a, chu chu Law department, DP&AR leh Finance department-te’n an lo pawm vek tawh a ni. 

Chutianga mithiam rualin MIMER enkawl dan tur leh a enkawltu society thuneihna leh kaihhruaina a lo duan, sorkar pawhin a lo pawm thlap tawh thiah leh tuma beihna awm ni anga lang hi a huatthlala hle. A hming hrim hrim hi chu Aizawl Medical College pawh ti ila, Lunglei leh district dang a Medical College din ve duh hunah a hming sak a dal lo ber ang. Zoram Medical College tih hi Chief Minister Pu Zoramthanga hming chawia tih niawmin thenkhatin puh luih an tum a, chutiang rilru a put a rinawm loh. A hming ni lovin Medical College tha tak, state pawn aṭang pawh a, zirna tlâk a an ngaih, din tum laia MIMER chunga thuneihna neih hrim hrim duh, thenkhatin thu an veivir hi a pawi lai tak a ni a, kal tlangpui a nih chuan hemite hi an phûmna thlan aṭanga la chhuakin “Mizoram leilunga phûm tlak an ni lo, state pâwna phûm ni rawh se,” titute an lo la chhuak ang tih a hlauhawm hle. 

MIMER din tura sorkar department in a tlâwn kèn avangin, kum 10 chhung zet a khawtlai a, sawi tawh angin thenawm state te chuan society an din fel nghal avangin kum hnih/khatah an puitlin zung zung mai. Hetia sorkar department ‘performance’ chhia leh vuaichà lutuk, chiang taka phawrh a nih tawh hnu a dân fel takin a thuam a, a thunun society din tawh (thuneihna tak tak erawh chu hlan a la ni lo a nih hmel) thiat a, sorkar department hnuaia dah leh tumna kal mek hi tunah tihtawp nghal ni rawh se. Chuti lo chu kan sorkar thar hi sorkar hmasa hotupa ang maia mi hmingthatna tur ni a hriat tawh phawt tithuanawp a, thlâk duh anga kan puh piah lamah thil tha duh lova Mizoram leh mipui tana tha ber tura ngaih, tichhe duhtu-ah mipuiin kan la puh ngei ang a. Tute emaw mahni puala duhdan tihhlawhtlin tum (vested interest neite) duhdan ang hi chuan, sorkar ve riang ruang hi chu kal mawlh suh se. A pawi thui hma-in harh chhuah a hun e.