SORKAR TIHTUR

Kar hmasa khan Citizenship Amend­ment Bill (CAB) chung­chang kan ziak tawh a. Citizenship Act, 1955 siamthat tumna, he amendment bill hi kan rîkpui hluai satliah pawh a ni tawh lova, Lok Sabha bial pakhat kan neih ve chhun, inchuhna a kan thupui ber a ni a, thudang sawi hauh lovin hei hi an sawi ta ngar ngar mai hlawm a, hmasawnna lam pawh a ri ta meuh lo. Hei hian kan Mizo mizia a tarlang a, kan sorkar hrawn tawh leh hrawn mekte dinhmun a tichiang hle bawk. Kan sorkar hian a tihtur tak hi a hun leh a hmun takah a ti ngai lo tih hi a chiang a ni.

Sawi tawh angin he CAB pawh hi Mizoram tan a dan hlauhawm ni hauh lo thei a nih laiin, kan ram hruaitu leh sorkar lo hrawn tawhte an muthlu rei lutuk a, zirlai naupang thatchhia leh zawmthaw ang chiahin an ‘home work’ an ti ngai lova, an zir tur zir peih lovin an zelthel a. Ekzam a hnai thut sia, kan phi buai ta chiam mai a nih hi. Chakma Autonomous District Council (CADC)-ah saw’n ramdang mi, dankalh a East Pakistan/ Bangladesh aṭanga lo pem a, inbengbel tam tak an awm ang tih hi tupaw’n an ring a, mahse, eng sorkar mahin umchhuak turin thâ an la thawh lo - kum 1972-a CADC a pian aṭanga tun thlengin. Vawikhat erawh chu a hlawp a râltlan lo lut kha dah hrangin Arunachal lamah thawn an ni.

Kan thenawm Tripura dinhmun kan sawi fova, kan hre hlei hlui tawh. A ram neitute chu East Pakistan/ Bangladesh aṭanga lo lut a, inbengbelte’n an chim tawh a, an state mihring hmun thum a then hmun khat pawh an zat meuh tawh lova. An hel a, ralthuam an lek a, mahse a sawt mawh tawh hle tih kan hria. Agartala a kan thianpa pakhat chu a u te nupa kha doctor specialist ve ve an ni a, amah pawh langsar ve tham tak a ni a. A pa chu Bangladesh aṭanga lut a ni a, an unau upa lam chu Bangladesh a piang an ni a, chu chu an dinhmun a ni. Assam dinhmun kan hria a, Meghalaya dinhmun kan hre viau bawk. Chuti chung chuan kan chunga thleng ve thei lo ang maiin kan sorkar a muthlu a, Ostrich-in thlaler vaivut khuar a a lu a phum a, him ta riauva a inhria ang chauh kan ni.

Kan ram dinhmun a derthàwn a, dinhmun hlauhawm a kan awm chhan hi sorkarin a tihtur a tih loh vang leh a tih loh tur a tih than lutuk vang a ni chiang a. Ram hruaitu tam ber hi an pum a puar a, sum leh pai an lakluh tam a, an hausak a, an chhungkhat laina leh vua-leh-vangte dinhmun a that chuan an lungawi tawk mai a, ram leh hnam veina tak tak an nei lo fova, an hrawk chiah hi mipuiin kan chan chu a ni fo. Chutiang chiah chuan kan sorkar officer tam tak hi chuan an chhungkua an hausak a, in tha leh ropui tak an sak theih a, in leh lo tha an neih a, an fate zirna tha an pek theih a, sum an khâwl viau phawt chuan, midang tana kawngpui chhia leh kal hrehawm hnutchhiah an hreh lo thin a nih hi. A dang pawh sawi tur a tam mai.

Kumpinu sorkarin min awp laiin kum 1873 khan dan tha tak, Mizote leh tlângmi dang, hnam tlem zawkte humhalhna atan Bengal Eastern Frontier Regulations an lo siam a. Chumi avang chuan Mizorama hnamdang lut turte tan Inner Line Permit a ngai a, chu chuan kum tam tak chhung chu chimralna lakah Mizo hnam tlemte hi a hum tawh a ni. Mahse, keimahni puala sorkar kan neih ve hnu hian, he dân kan hman dan hi a hming mai mai a ang ta riauva. A nihna takah chuan ILP nei lo emaw, thi tawh emaw, ILP in a phalsak anga hmang lo an tam viau hnu, khawlaia ILP nei ngei tura ngaih hnamdang an han pun deuh hian zirlai/tlawmngai pawlin an han dap emaw sorkarah an thlen a, Police lamin an khawm chiam a, a za tel an manin an thawn kir leh chauh thin. Hei hi dân kenkawh that loh vanga boruak chhe siam thei reng leh siam fo tawh a ni tih kan hria.

Hei ringawt pawh hian sorkar mutthluk nasatzia chu a tilang chiang khawp mai. India Parliament leh sorkar laipuiin a hlip mai dawn a a lan’ chuan kan ri hluai a. Hlauhawm a reh a kan hriat chuan kan ngaihsakin kan ngaihven zui leh ngai lo reng reng. Kumin January thla bul khan Bairabi rel chawlhhmun kan va tlawh ve a, a hming a ILP endikna an lo siam ve ka hmuh chuan siam mualpho loh a fuh zawk tih chu ka ngaihdan a ni. Thil reng reng hi rundalah, a hmingin, miin an sawisel lutuk loh na’n tih vel hi kan tihdan a ni ber a, a serh thenna ang chauh hi kan phak tâwk a ni awm a sin.

Thil dang pawh i sawi ang hmiang. Mizoram hmun hrang hrangah, a bik takin chhim lam, Bangladesh depah dankalh a khaw din a awm thu hi sawi fo a ni a. Hetianga Mizoram leilung ngei a dan kalh a khaw din a awm chuan, sorkar (LAD leh Revenue) hi a che vat tur a nih laiin tunhma aṭang khan a che ngai lo. Aizawl khawpui a inhmun pakhat dik lo taka neih nia an hriat a an chet ran ang hian, ram humhalh na’n sorkar hi che chat chat thin sela chuan, kan ram leh hnam hian chhantu a nei kan ti ang a. Mimalin Aizawla ram an neih dan dik tawk lova hriat hi ramdang mite’n khua meuh an din aiin an ngaimawhin an che rang a. Hnam tana pawi thei erawh chuan ngaihven leh ngaimawh a hlawh lo kumkhua a nih ber hi. Chu chu kan ram leh hnam tan a thil pawi a tling.

Mizoram hmun hrang hrang, a bik takin Aizawl leh khawpui lian deuhvah chuan hnamdang (vai kan tih mai)-te an sumdawng nasa hle a. Hnamdang sumdawn hi kan khap ngawt thei lo tih kan hre vek a, India Constitution article 19-na a khua leh tuite chuan India ram khawi hmunah pawh ei an zawngin an sumdawng thei ang tih a ni a, chutih rualin state sorkarin a âwm ang tawk khuahkhirhna (reasonable restrictions) siam theih a ni a ti tel thung. Hemi tlawhchhan hian Mizoram sorkar hian sumdawn dan (trade regulations/trading by non-tribal regulations) a siam fo tawh a, sorkar laipuiin a pawm hlei thei thung lo.

Chutih rual chuan India ram dânah hian midang hminga sumdawn (benami transaction) hi khap tlat a ni a, Mizoramah hian Mizo (tribal) hminga hnamdang sumdawng an tam em em tih hi tlang hriat a nih laiin, sorkarin he dân hi a kenkawh a, dân anga hremna a lek kan la hre miah lo. The Benami Transactions (Prohibition) Act, 1988 hi kan rama thiltithei ber berin, an dân bawhchhiat nasat leh tlânglàwn ber leh dik lo taka sum hailut a, an invur hausakna ber a nih avangin an leklam lo nasa hle a. Thawhlawm duhtui lo khawpa sum duh kohhranin “Tangka sum ngainat hi sual tinreng bul a ni,” tih lam aia “Zu hi sual tinreng bul a ni,” tia Bible an kailek hi kan ang ber awm e.

Thil zawng zawng kan sawi seng hauh lovang. Mahse, Mizoramah hian chiang taka kan hmuh chu, sorkarin dân tlawhchhan a a tihtur tam tak a ti lova, a tih loh tur tam tak a ti tih hi a ni. Sorkarin a tihtur a tih mai loh vang emaw a pawl thenkhat leh mimalin anmahni kuta dân an lo kenkawh ve hi kan hre ta fo mai a. A pawi takzet a ni. A chang chuan sorkar hi wheelbarrow ang mai a nawr kal ngai a ni a, chuti lo chu a tihtur ti lova mutthluksan a ching. Kumkhua atan a buaina leh harsatna chinfel a, tluantling taka thiltih aia engemaw hun chhung atan a lungawi lote tihlungawi mai mai ching phei chu kan ngah.

Hetianga thiltih (thiltih loh) hi sorkar hian a sim a, a mawhphurhna hlen a, a tihtur (duty) chu dan anga a tih zat zat hi a pawimawh em em tawh a. Chumi a nih lohva tun anga a kalphung hi a nih reng chuan, he Mizoramah hian dân rorelna (rule of law) hi awmze nei lovin kan siam thuai anga, kan hmabak chu dânin zawm a hlawh lohna leh a bawhchhe thei, hrem tawk silo te vawk lallènna hmun a kan ram siam a ni. Kan ram chhiat leh thatah hian mitinin mawh kan phur theuh tehmeuh mai, mahse, kan aiawh a mipuiin sorkar tura kan thlante hian mawh an phur ber a ni. Sorkarin dan rorelna thuthlung behchhan a, a mawhphurhna a hlen a, a tihtur a tih hunah he ram leh hnam hi a himin a dam ang.