DAN SIAM

Naktuk aṭangin kan dan siamtu pawl chu rorel turin an thu khawm leh dawn a. Tam tak chuan Assembly inkhawm hi politics khelhna, rorel lai leh eptu member-te inhnialna hmun ang maiah an ngai a. India ram hmun hrang hranga Assembly inkhawm leh ram pum huapa dan siamtu pawl Parliament inkhawm dan kalphung en hi chuan hetianga ngai tute hi an demawm hauh lo. Dan siamtu (law-maker) te inkhawmah hian tul mang lova politics a hamthatna zawn luat avang a awmze nei lova in auh buaina a thleng fova, a chang chuan dan siam tura chhawpchhuah tam tak pawh ngaihtuah hlei thei lo khawp a chetna leh tharum thawhna pawh a thleng ta fo mai.

Dik tak chuan hetianga dan siamtu atan a thlante, Parliament/Assembly chhunga an chet a, an hna tur an thawh hleih theih loh avang hian mipui sum (public money) tam tak a lo thlâwnin a luangral a, anni erawh chuan an hlawh leh a behbawm bakah sitting allowance zawng zawng an dawng kimin an pumhmawm vek tho thin a. An inkhawm chhung hi bituk awm thin mahse an tlin ngai lovin an rorel hun chhung leh ni hi a tawi thin hle a. A chang chuan kan MP leh MLA te hi an hlawh leh a behbawm a an hamthatna tur bakah hian an inlungrual ngai miah lo nia ngaihna a awm a, an hamthatna atan erawh chuan an awmna political party sawi lova inlungrual thlap thlap zel an ni thung.

Mizoram Assembly hi India ram pum huap pawh a Assembly chhunga chet hmang mawi leh nungchang dik (decorum) vawng tha berte zinga ngaih a ni a, Assembly zahawmna (privilege) pawh an vawng tha-in a chhuanawm hle. Speaker thenkhat Assembly rorelna in chhung thlenga House leader (Chief Minister ) tlawn a, hlau lutuk leh an hlauhzia an awm zeuh thin tih loh chu Assembly chhunga an rorel dan pawh a mawi viau mai a. Tuna Home Minister ni ta-in Speaker dinhmun a chelh lai phei kha chuan member tin kha an theihna theuh chhuah a rahbeh a awm lo turin an chanvo humhim sak an ni a. Khatih lai kha chuan Mizoram rorelna sang ber kha a zahawm leh zual a ni.

Mizote hi hnam che muang, hmanhmawh lo ang reng tak, hun tawp dawn a ruai but taka chet leh chiam ching lawi si kan ni tih hi a lang fo thin a. Zirlaite pawh ekzam hma a awl vung vung a, ekzam dawn hnaih a lehkha zir chiam ching kan ni a. Tender leh quotation pawh a thehluh theih ni hnuhnung ber a thehlut tur a hnawhsarum taka chet ching, bill pek tur pawh, a pek theih ni tawp ber a intlar chiam ching hnam kan ni. Saptawng chuan sawi ta ila, ‘last minute’ emaw ‘eleventh hour’ emaw a thilti chauh thin tiin tih hi kan inhmeh viau awm e.

He kan zia hi sorkar pawhin a tlansan thei bik lo a nih hmel e. Kum tam tak chhung chu Assembly a dan siam tur putluh tam ber hi phuai luai leh tenghneng tak tak a ni hlawm a. Member-te hriatthiamna avang a ngaihhnathiam a kalpui tak vel mai mai a tam khawp mai a. Subject Committee kuta pek takte, a puluttu Minister-in loh theih lohva a hnuhdawh leh tak te pawh a awm nual mai. Hmanhmawh taka siam, phuailuai taka Assembly zahawm tak a putluh tak mai mai a tam lutuk hian Assembly zahawmna a tibawrhbâng pha hial a ni.

Dan siam tura chhawpchhuah thenkhat chu ennawn chian loh tih chiang em emte a ni a, thenkhat phei chu, chu dan siam tur siam a tul chhan leh a awmze bo thak khawpa buarchuar a buatsaihte a ni bawk. Dan siam tura duan (draft bill) reng reng hi a duangtu department-in an duan felah Law department pawmpui (vet) tura thawn a ni thin a, Law department-in a pawmpui hnu-ah Cabinet pawm tura chhawpchhuah a ni a, Cabinet-in a pawm hnu-ah Parliamentary Affairs department-ah thawnin PAD hian Assembly -ah a thehlut leh thin. Chutianga kal kual ngai tih hre reng chung si chuan, Assembly inkhawm neih dawnah belebut taka buaipui a ni ta thin hi a felhlel lai lian tak chu a ni.

Chutiang a nih avang chuan phuailuai ang reng taka a changtu Minister -in dan siam tura duan (bill) a putluh tak nawk nawk, thiamthu sawi tur nei mang si lova thupha chawi chunga hrehawm ti hmel ang reng taka a putluh a tam ta fu mai a. Kan politician-te hi an vun chhahin zah tawrh chak viau lo phei sela chuan House chhungah an tal buai fo ta ve ang. Hmanhmawh leh hnawhsarum lutuk a dan siam tur duan leh buaipui hi tihtawp a tul ta hle. Dan siam tur duan sa lo chip tur hi Assembly -ah hian subject committee 3 lai a awm a, mahse, a duan chhoh bawr vel hi an tih chawpchilh luat vang leh Assembly a putluh an hmanhmawh lutuk avangin subject committee te hian hman tangkai a hlawh lem lo tih hi thil chiang tak a ni.

Naktuk-ah Assembly inkhawm tan a ni dawn tawh a, he Assembly inkhawmah hian sorkar lam chuan dan siam tur leh siam that tur a duan hi 7 zet putluh tur an nei niin kâr kal ta, Thawhtanni a Speaker hova Assembly inkhawm hun hman dan tur duangtu, Business Advisory Committee (BAC) thutkhawmna-ah an sawi a. Chuti chung chuan Zirtawpni thleng khan dan siam tura duan pakhatmah Assembly Secretariat-a thehluh a la awm lova. Kan MLA-te hi dan siamtu (law-maker) tih an nih laiin an hna ber tur hi phuailuai taka duan a nih thin chuan MLA tha an ni thei ngai miah lovang.

Chu mai pawh ni lovin, Zirtawpni khan Council of Ministers thutkhawmna-ah he’ng dan siam tura duan leh dan siamthat tura chhawpchhuah turte hi an pu lut ta leih leih chauh a nih kha. Khati khawpa bichilh a sorkarin dan siam tur a kalpui hi chuan kan dan siamtute hian dan tha leh fel fek fawk siam an harsat fo ang a. An siam chhun chhun pawh a phuailuaiin a hnu lawka siamthat (amend) leh thuai ngai a ni fo. Hemi-in a lantir chu muangmar leh uluk, hun tam zawk hmanga dan siam tur duan a pawimawhzia a ni.

Hei bakah hian kan Mizoram Assembly kalphungah hian RTI Act, 2005 awm hma zia kha a la kalsan lo hle a, thil thup an la uar mah mah niin a lang. Dan siam tur emaw dan dinglai siamthat tur emaw hi a changtu Minister-in Assembly -a a putluh hma chuan thuruk a la ni emaw ti tlat pawl hi an la kuh tul mai a. Thup tum bawk, hmanhmawh baklêng a duang a, hmanhmawh lutuk bawk a Assembly a putluh a nih theihna atan a phe dâwr dâwr reng chung hi chuan, dan siam tur tha tak, kimchang tak leh fel fai tak hi kan Minister-te hian an pu lut lawk lawkin a rinawm loh.

India Parliament-in dan a siam dawnin mipui khawih zual tur bik phei chu Parliament Secretariat hian chanchinbu-ah te chhuahin sawisel duh emaw, belh duh leh paih duh emaw tan a inrawlhna hun thâwl tak a siam thin a. Hei hi a pawimawh hle mai. Dik tak chuan Parliament emaw state Assembly in emaw dan a siam reng reng hi mipui mimir khawih a ni deuh zel a, chutianga dan siam tur chhawpchhuah a nih hma a mipuite’n an ngaihdan an thawh theihna hun siam hi democracy kalphung dik tak tur ni awm tak a ni. Mithiamte, sumdawngte emaw mipui mimir hrim hrim pawh a taka an tel ve na leh an ngaihdan an thawhna, dan siam tur duan chu a ruk deuh reuhva kalpui ai chuan a tha zawk ngei ngei tura ngaih a ni.

Hei hi thil awmdan a nih avangin mipui nun leh khawtlang nunphung khawih tur, sorkar kalphung pawh vawngtu tur dan siam a nih dawn a, dan siam tur duan a nih lai hian hmanhmawh hauh lovin a tha thei ang ber a duan nise tih hi duhthusam a ni a. Hmanhmawh leh hnawhsarum taka kalpui ai chuan hun thâwl zawk a buatsaih hi sorkar hnathawkte pawhin an tih ngei ngei tur a ni a, politics-a an hotute’n nawr na viau mahse thiltha tur atan chuan “Aih” pawh an ti ngam tur a ni ang.

Dan siam tur duan (bill) emaw dan dinglai siamthatna tur duan (amendment bill) emaw reng reng hi Assembly inkhawm dawn emaw inkhawm lai emaw kher a thehluh a ngai lova. Assembly inkhawm loh hun lai, eng hunah pawh a thehluh theih tih hi kan sorkar department hotute hi hrilh hriat fo an ngai niin a lang. Dan siam a nih dawn reng rengin mipui nawlpui tana tha ber tur ngaihtuahna nena duan a siam a ni tur a ni a, chumi ti tur chuan nawr vut vut ai chuan hun thawl taka thluak fim tak hmanga kalpui hi a fuh a, a tha reng fovang.