SAKHAW SERH

Nimin piahah Serchhip Assembly bial mipuite’n by-election atan vote an thlak ta a. Sawi chak viau mah ila, vote thlak hnu a sawi chhuah atana ka khek, sakhaw ni serh a sorkar pawipang khawih leh vote thlak, vote chhiar leh eng ni bil atan emaw-a puan a nih a, kan Kristian ṭha thar leh hluai ṭhin hi a nuihzatthlak hle a. Mahni sakhua a ngheh lohzia tihlanna a ni thei hial awm e. Kan ṭhianpa, Catholic kohhran mi-in, “Zu no khat in avanga vanram kai lo tura inngai tlat chuan in loh mai tur,” a tih hi ka hre chhuak fova. Pu Thanglawta’n, “Vawiin kan CM thusawi han ngaihthlak chuan meizial, khaini, sahdah leh kuhvakhawr kan do dawn tih a lang a, kan dote an tenau bawk a, kan hneh ngei ang chu,” a tih pawh kha ka hre chhuak ṭhin. Tunlai a sakhaw humhim leh humhalhna atana kan do hi a te ta khawp mai.

A kum ka hre ta mai lo, kum rei ve deuh tawh takah khan tuna Serchhip bial by-election ang deuh hian Mizoram puma Assembly inthlanpui vote thlak ni tura ruat khan sawisel a hlawh a. MKHC lam khan Election Commission of India hnenah an duh loh thu an thlen avangin a ni sawn a ni a. Khatih laia Chief Electoral Officer (CEO) khan kohhran ni lovin political party lamin ECI kha nawr zawk se a mawi zawka a rin thu leh, kohhran lam chu lo ngawi sela chuan a dik zawk a a hriat thu hmaichhanah min hrilh tawh. Kha kha BJP kaihhruai NDA sorkar hma a ni.

Hriat ve mai mai atana ṭha chu Election Commission te ang hi India Constitution-in a phût anga din a ni a, sorkar dinglai thuhnuai a awm tur a ni lo. Chutih laiin Commission a lal leh thu ber Chief Election Commissioner (CEC)-in sorkar dinglai a hlau ru viau thei a, tunhma kha chuan sorkar laipui aṭanga engemaw beisei vang emaw, chhan dang vangin emaw ECI hi sorkar ministry pakhat ang deuh thaw a sorkar laipui thuzawm deuh duan duan a ngaih a ni. ECI hian sawisel leh dem a hlawh fo ṭhin a, sorkar kaihbu ang deuhvah eptu pawlte chuan an puh a. Hetih lai hian T N Seshan a lo lang ta a.

Tirunellai Narayana Iyer Seshan, mi tam berin T.N. Seshan ti a an hriat, kum 1990-`1996 chhunga Chief Election Commissioner of India dinhmun chelhtu kha, inthlan chungchanga huaisen taka a tha lam zawnga inthlan chungchang siamthatu (electoral reformer) ropui a ni a. A hun chhung khan Prime Minister pali - Chandra Shekhar, P. V. Narasimha Rao, Atal Bihari Vajpayee leh H. D. Deve Gowda te nen an inhrawn a ni. Hemi hma hian India sorkar a sorkar hnathawk zinga dinhmun sang ber, Cabinet Secretary hna a chelh bawk.

Seshan-a hunah hian thil a danglam nasa em em a, sorkar laipui a thuneihna chelhtute’n, an duh duha an hnuh kawih theih loh avangin thuneitute huat a hlawh hle a. Prime Minister P.V. Narasimha Rao chungchang a sawina kha a lar hle ṭhin a, “He is the Prime Minister of India, nothing more, nothing less,” (India ram Prime Miinister a ni mai a, chu aia sawi len hluai emaw sawi tet emaw a ṭul lo) a ti hmiah mai a ni. A hnu zelah pawh sawisel kai deuh chu awm ve leh phauh ṭhin mahse, CEC-te hian a tlangpuiin sorkar laipui nena an thawhho ngaihna lai bik thilah lo chuan, sorkar laipui duhdan an palzut ta deuh zel mai.

Chu chu thil awmdan a nih avangin sakhaw chungchang emaw sakhua/kohhran pawl duhdan emaw ang diak diakin ECI hi a kal a rem lo. India ram hi Constitution chuan sakhaw vulh bik nei lo tura a tih a ni a. Chuvangin eng sakhaw bil emaw, kohhran bil emaw duhdan a sorkar emaw ECI emaw a kal zel hi a rem ṭeuh lo. Serchhip by-election vote thlak ni hi Inrinni (Seventh-day Aventist kohhran leh Mizo Juda ṭhenkhat ni serh – Sabbath) a ni a. An kohhran/pawl danah chuan ni thianghlim leh serh a vote thlak hi rem lova an hriat miau chuan duhthlanna chu an ta a ni. Chutiangin vote chhiar ni May ni 2 (Pathianni) pawh.

Kristian-te hi khawvel sakhaw dang zuitute nen in anlohna kan nei lian hle a. Hindu-te hi keini anga hunbi nei a inkhawm a, ṭawngtai, zai leh làm bakah, sermon thlâk tlut tlut chi an ni ve lo. An sakhaw biak dan hi a mimal (personal) em em a, an mamawh dil turin an sakhaw biakin (temple/mandir)-ah an kal a. Puithiam malsawmna dawngin an mamawh chhangtu atana an pathian remchang bera an ngaih hnenah thilpekte hlanin an va ṭawngṭai (puja) mai a, sakhaw kût a a huhova an lawm chiam bak chu anmahni leh an pathian inkâr hi an ngai pawimawh ber a ni mai awm asin. (Entirna’n fa nei thei lote’n fa dilna tur bik tur pathian an nei).

Muslim ho pawh hi India ram hmundangah chuan Hindu-ho ang deuh tho hi an ni a. An sakhaw vawn dan leh Allah an biak dan hi mimal kut a ni thui hle a. An sakhaw kûtni vangthla a bungbû a a huhova an khawpui thianghlim, Mecca lam hawia an ṭawngṭai erawh chu kan hmu ṭhin. Kartin mai a ni serh bik nei ziah, chu chu Biakin a inkhâwm ni atana hman bakah, pisa chawlh ni atana hmang chu Kristiante deuh chauh hi kan ni a. Sawi tawh angin kohhran/pawl ṭhenkhat chuan Inrinni (Sabbath) hi sakhaw ni serh leh ni thianghlimah an ngai a, kohhran tam ber chuan Pathianni (Sunday) hi an ni serh a ni.

Kristian sakhaw chanchin chhui mite’n, Bible a Thuthlung Hlui leh Thuthlung Thar hun pawha an ni serh chu Inrinni zawk a nih thu an sawite, Kristian ni lo, Rome ram lalpa Constantine-a’n ringlomite’n Ni pathian (sun god) biak ni chu ni thianghlim leh serh tura tiin Sunday (Sun – Ni) hian a thlak niin an sawi a. Helam chu kan luhchilh lovang. Kohhran tam berin Pathianni/Chawlhni an serh a, a dangin Inrinni an serh bawk avang hian, India ram hmun dangte ang lo takin Mizoramah chuan hapta khat (ni 7 chhung)-in ni 2 chu sorkar hnathawk an chawl ziah a nih hi. Hetiang hi India ram hmundangah a awm ve lova, Sunday erawh hi chu an chawl ve.

Pathianni (Sunday) hi India rama sorkar hnathawk tam ber chawlh ni atan a an hman nachhan hi, Kristiante ni pawimawh an ṭawmpui vang a nih kher a rinawm lohva, a lo ni a nih chuan British in India ram a awp laia an lo chin ṭhan tawh a nih avanga chhunzawm an ni mai thei. Phairam kal ṭhinte chuan kan hria ang a, chawlhkar/hapta khat chhunga ni 7 awmah kar tluan parh a hnathawktute hna thawhtir hi an remti lova, kam kawmthlang lawk, Kolkata khawpui-ah pawh khuan an bazar lianah khuan chawlhkar khatah dawr/ bazar khar hun nikhat an siamsak a, hei hi hnathawktute hmakhaw ngaih vang a ni a, anmahni chhawrtute’n an chhawr rim lutuk venna atan a tih a ni.

Engpawhnise, Pathianni hi India ram hmundangah pawh sorkar pisa chawlh a nih avangin, thildang dang pawimawh tihna atan a remchang hle a. Mizoram ang hian kohhran leh khawtlang/pawl a inhmangte’n sorkar pisa a hnathawh ni leh hun lai (working hours) a pawnlam thila an hna tlansan mai an ching ve lova, pisa chawlh ni hian pisa pawnlam thiltih a remchang hle-ah an ngai a. Chuvang chuan Union Public Service Commission (UPSC) leh Staff Selection Commission (SSC) ekzamte pawh Pathianni-ah tih thin a nih hian sorkar hnathawk tan, pisa ṭhulh lo leh chawlh la kher lovin an ekzam thei ta ṭhin a ni.

Chutianga Pathianni-a ekzam chu ni mahse, Mizorama Pathianni serh em em anga langsar taka inlantir Kristian nu leh pate hian, an tu leh fate’n UPSC emaw an ekzam hi an phal lo a ni. Kan rinna a chhiat phah dawn a kan hriat tak tak chuan, Mizo Kristiante hi Civil Service leh Central Service-ah kan lut lo ṭhak ngam tur a ni zawk ang. Chu chu ‘a tak ram’ zawk chu a ni. A nihna takah phei chuan sorkar laipui a minister leh official lian tam tak khuan, sorkar pisa hun chhungin ngawrh takin hna an thawk a, hna ni tho mahse, midang nena inrâwnkhawmna leh hna chungchang sawiho tura inhmuhkhawmna hi pisa chawlh ni-ah an ko fo zawk asin. An hna thawh hun an ngai pawimawh a, a pènhleh anga ngaih theih chi chu pisa hun pawn a tih an duh zawk fo zel a ni.

Pathianni/ Inrinni (Sunday/Sabbath) serh thupui hi Thuthlung Hlui leh Thuthlung Thar a Juda-te tihdan kan chhawm chhoh niin a lang a. Kan hman mek Gregorian Calendar leh Juda-ho Calendar chu a in ang lo hle tih pawh tam tak chuan kan hre kher lo mai thei e. Juda-te khan Sabbath kha an serh urhsun em em a, hemi ni hi chuan olive thing hnah ro aia rit chu chawi loh tur an ti ṭhin a. Isua Krista khan he pawmdan hi thui tak a rawn ṭhiat a, kha kha Juda puthiamte’n khenbeh hial an duhna chhan zinga pakhat pawh niin a lang. Ani kha chuan he an Juda te’n ni thianghlim an tih, an puithiamte’n urhsun leh khauh lutuk a an serh thinah hian, thiltih ṭhat chu a thiang niin a rawn sawi ta a nih kha.

Inrinni/Sabbath a vote kan thlak avanga kan rinna dal ta riau dawn a inhre tlatte, Pathianni/Sunday a counting official tlemte-in vote an chhiar avanga eng sakhaw betute’n emaw Kristianna an rapbet ta tlat anga ngaihna hi chu ‘thliarkar rilru’ aṭanga lo chhuak tih loh rual a ni lo. Political party pakhat phei chuan hetianga Kristian ni pawimawh a inthlan vote thlak leh, vote chhiar a ni tur hi Hindu lalram din tumtu BJP sorkar thiltihah riak a rawn puh kha. Kristian sakhaw humhalh tum ni a insawi pah a dawtsawi kan hreh hauh lote hi zahthlák tak a ni. Hetiang hun ruattu hi sorkar ni lovin, Election Commission a ni tih chu political party ni ve ta chuan hriat phak ve awm tak chu a ni asin maw le.

Kan rinna hi ni serh lam emaw leh a puithùna lam hlira kal a, luak lek leka inhmuamup hi a sakhua lai ber, a rinna laimu emaw ti ang hrima kalpui an awm ṭhin a. Pathianni a inkhawm, ṭawngṭai, zaiho, sermon ngaihthlak leh lâm hup hup hi, Mizote zinga Kristiante thiltih (activity) pawimawh leh langsar a ni ber a – Biakin chhunga sum tam tak séng a kan lei kan thawmhnaw nalh tak tak hak nen.

Chutih laiin engkim mai hi kan sakhaw rahbeh tumna a ngai-in, thil tenau thlengin kan dodal nghal zel mai a. Kristian hmasate martar ngamna thinlung kha kan pel thui ta hle . Hei ai hi chuan India ramah kan awm a, sakhaw betu tam zawkte nen kan in ang lova, a dodal leh sawisel lama kal lovin nghehna leh takna lam hi kalna kawng dik zawk chu a ni tih i hria ang u.