Ram ka thlir a : HNAM LEH HNA

Zingkara Aizawl khawpui fang ṭhin chuan kawngpui sira thingpui leh a hmeh zuara lo ṭhu tam tak kan hmu ṭhin ngei ang a. Hetianga kawngkam dawr siamte hi an hlawk hle niin an sawi zu nia. Tunhmaa kan hriat ngai loh kawngkama thingpui leh a behbawm zuarte hi zing hma taka taksa sawizawi ṭhin te, zin chhuak tur leh zin chhuak tur thlahtute tan an ṭangkai hle a. Chutih rualin kawngkam dawr siamte tan hian eizawnna ṭha tak a tling a, hei hian Mizo hnam hi zirtirna ṭha tak min pe thei a, kan ram leh hnam himna khawih pha hial a ni.

Sumdawnna hi a te emaw a lian emaw, ram pum ei leh bar bakah sum leh pai che vel khawih nasa tak a ni a. Buh leh bal leh thlai thar chhuah a pawimawh rualin, a lei leh hralhna lam hi a pawimawhna sawi nep theih a ni lo. Mihring thiamna leh theihna (human resources) hmanga ram tihhmasawn a pawimawh em em a, chumi atan chuan zirna kalphung ṭha leh dik, hnathawk thei leh chhawrtlak chher chhuak thei zirna kalphung kan mamawh ngei ngei ang tho hi a ni. Chuvang tak chuan, mi mamawh leh lei duh kan hriat a ngai a, kan thil thar emaw siamchhuah emaw leitu turte chu an tam a ngai bawk. Chutiang chu sumdawng thiam an ni mai a. Kum tam liam hnu pawha sawhthing hralhna mumal chauh tal pawh la zawng chhuak thei lo Mizoram sorkar hian, helama mawhphurtute hi an department leh Corporation ṭhiah bakah hremna hial a lek a ṭul tawh a ni.

Mizoram mi cheng hi nuai 10 pel awrh kan nih laiin India ram hmun dangah a vaibelchhe tel tak meuh meuh an awm a. Chungte hnena kan thil thar leh siamchhuah hralhna tur a tam tehlul nen; Mizoram pawh la intodelh si lovin state danga mi thil kan la la lut nghek nghek, kan thawhchhuah ve chhun chhun pawh pawn lam thil thar leh siamchhuah leina atan kan hmang fai leng zel chu a nih ber hi. Hemi thlak dang lam tur hian sorkarin a ngaihna a hre lo a nih pawhin, "Ram leh Hnam Humhalh," tih kum puan nei nawn tluk tluk YMA leh mipui thawhlawm thawhkhawm aṭanga sum hlawm lian tham khawihtu kohhrante hian tha an thawh a hun tawh viau mai.

Chutiang kan sawi rual chuan, Mizote hnathawh dan leh kan thawh duh dan leh duh chin hi inenfiah a ngai ngawt mai. Inzirtirna hi nasa taka kan inpek a hun tawh a ni. Skill development lam kan hawi a, mimal mahni kuta eizawnna kalpui (entrepreneurship) lam kan sawi uar ṭan rual hian, hna thawh dan kalphung (work culture) ṭha leh dik kan zir tela kan thiam tel a pawimawh ngawt mai. Mingo leh khawchhak lama hnam changkang kan entawn lo a nih pawhin Karimganj, Hailakandi leh Cachar district vel aṭanga Muslim tlangval lo kalte tawrhchhel dan leh teirei peihzia aṭang ngawt pawh hian inzir tur a tam a, kan inzir loh chuan hnam boral turah indah hmiah ila kan tisual tampui lo vang.

Mizote hian thil kan thiam chak a, kan thiam dum a, thiam tak tak erawh kan nei lem vak lo. Sapin, “Jack of all trades, master of none,” an tih ang hi kan zia a ni. Vaiho chuan thil an thiam bik kha an thiam bel em em a, thil dang erawh chu an thiam lo; thiam pawh an tum lem lo. An thil thiam kha eizawnna tlak, hausaka dinchhuahna tlakin an thiam thung. Chubakah, an thiam thil an thawhna kawngah an ti tak tak a, mi hnuaia an thawha miin an chhawr pawhin rinawm leh anmahni ruaitute thuawih takin hna an thawk ṭhin. Hei hi Mizote tlakchham lian tak a la ni mek. Mizo mistiri chuan an thawhna hmun an thlenin hmanrua an tat hriam chawp a, thingpui an in muang te te fo va, meizuk chawlh ilo an ngah bik an tih chu. An hlawh a sang zawk a, chu ai chuan ngawrh taka thawk hlawh hniam zawk rawih kha a awl viau ang.

Mizo sumdawng chuan tam tak hlep tumin a thil zawrh a tito em em a, hnam dang erawh chuan a tawk chauh hlepin man tlawm zawkin thil an zuar a. Mizo rethei kha chuan hnam dang kha a dawr tawh mai a ni. Hnam rilru pua thil man to zawk na na na lei lui ngat ngat tur chuan wallet puar deuh a ngai ṭhin. Chuvangin, YMA-in, "Ram leh Hnam Humhalh," kumpuana a puan nawn awn awn mek lai hian a leitu chauh ni lo, a zuartute pawhin ngaihtuahna an thlak ve a ngai ang. A bul lawka man tlawm zawka a lei theih reng lai a, hnam humhalh duh vanga mahni hnampui zawrh thil man to zawk lei ngat ngat tur chuan hnam hmangaihna urhsun zual deuh a ngai ngei ang le.

Mizote hi hnam naupang kan nih vang nge, a chhan hriat fuh chat chu a harsa mai thei a - kan hnathawh hmawrbawkna a chiangkuang ta lo

ṭhin hi kan ṭhanmawhbawk pakhat chu a ni. Hnam dangin mam fel tak leh mawi taka an zawh ṭhin hi keini hian pawr deuh leh hmuh nuam vak lovin kan chhuah ta ṭhin a, rilru hmanhmawh, teirei peih lo leh dawhtheihna tlachham kan nihna hi a lang leh ṭhin. Hetiang kawngah hian a hmalama kan sawi ang khian, kan state ṭhenawm aṭanga hnam dang lo kal, kan sorkar, mimal in leh biak in zawng zawng tih theih satute aṭang hian zir tur kan va ngah em!

Cement mistiri hna kan inzirtir te hi a ṭha hle mai, aluminium hmanga kawngkhar leh tukverh siam kan zir te, mi tihtheih ang leh thiam ang thiam ve tura inzirtirna kan buatsaihte hi a ṭha thlawt a ni. Mahse, chumi piah erawh chu kan pen a la ngai. Hnathawhnaa tih tak takna, rinawmna leh a felfai taka a hmawr bawk te hi kan mamawh a ni. Hna thawh laia zelthel leh chawlh zin lutuk te kan sim a ṭul nasa hle a, min chhawrtu, hlawh min petute thuawih pawh kan zir a ngai hle. A khaikhawmna atan chuan chhawr nuam tak, chhawrtlak leh kan thawh apianga thiam tak kan nih ve a ngai a ni. Chutiang kan nih hma chuan hnam dang chhawr kan bang ngai lo vang.

Chumi rual chuan kan state pawna Mizo ṭhalaite tirh chhuah ringawt lam hi tuipui lo vin, kan sorkar hian kan ram chhung ngeia hnathawh tur (sorkar hna ni lo) a siam a ngai a, chulam hawia kumtin sum ruahman (budget) pawh a her rem a hun tawh. Hnam dangte ang thova rintlak emaw, an ai maha rintlak leh chhawrtlak, kutchhuak ṭha leh mawi kan nih hunah leh, hnam dangte thawh

ṭhin zawng zawng hreh hauh lova kan thawh hunah chauh kan ram leh hnam humhalh kumpuan hi a hlawhtling ang. Kan hnam damna leh dinchhuahna hi vai emaw, sap emaw, chakma leh hnam dang huat lamah a innghat lova; hna kan thawha kan thawh ṭhatah a innghat nasa fe a ni. Mi thawh ai zawng zawng kan thawh thiam a, kan thawh hreh lohva kan thawh theih hunah kan hnam hi a dam ang a, a ding chhuak ang.