LEI CHIM

Hei hi Social Media-a an thil inthawn tawn pakhat ka chhar fuh a ni. A thlen ni, thla leh kumte hi a dik chuan ka hre nain a dik chat chat vek e tiin chhia erawh chu ka chham ngam lo. A chim chhan a rawn tar lante hi kan ram hruaitute

ṭawngkam ngei a ni tih erawh chu chiang takin kan la hre thawi awm e. Chu ka thuthawn chhiar fuh chu hei hi a ni:-

TUN TERM CONGRES SAWRKAR-AH LEI VAWI 6 CHIMAH NUNNA 3 CHÂN TAWH

1. October ni 31, 2014 khan Sihhmui aṭanga Lengpui panna Tlawng lei chu truck-in a zawh chim a, mi pahnihin hliam an tuar. CHIM CHHAN : A kilhna rukbo vang.

2. December ni 8, 2014 khan Sihhmui aṭanga Lengpui panna Tlawng lei chu siam ṭhat mek a nih laiin a chim a, hliam an awm lo. CHIM CHHAN : Hmanhmawh lutuk vang.

3. December ni 13, 2014 khan Chhimtuipui Darzokai lei chu dawh mek a nih laiin a chim a, mi pakhat a thi a, mi pakua an hliam. CHHIM CHHAN: Mipui nawr chim.

4. December ni 2, 2015 khan Sihhmui aṭanga Lengpui panna Tlawng lei, nikuma vawi 2 chim kha a chim leh a, mi pakhat a thi. CHIM CHHAN : Phal chin aia tam phurh vang.

5. May ni 22, 2016 khan Bairabi bul Tlawng lei chu siam a nih laiin a chim a, thi leh hliam an awm lo. CHIM CHHAN: Tuilian

6. February ni 13, 2018 khan Khawruhlian thlen hma Tuirini lei dawh mek chu a chim a, mi pakhatin nunna a chan a, pakhatin hliam a tuar. CHIM CHHAN: He lei hian chim chhan a la nei rih lo. Tun hnaia dawt sawi hrata hriat lar chhoh mek Congress Media lamin a chim chhan hi an la rawn puan ngei beisei a ni.

He thil hian ngaihtuah a tithui hle mai a. A sawi mam tum pawl chuan vanduaina vangah an puh a, ṭhenkhat chuan thil thleng palh ve hrim hrimah an ngai bawk. PWD changtu Minister chuan Zirtawpni khan Congress Bhavan-a political sessionah hetiang hian a sawi niin MPCC Media Department thuchhuah chuan a tar lang: “Pu Lal Thanzara chuan tunhnai a Tuirini Lei chim chungchang sawiin, he thilthleng ah hian thiamthu sawi tur kan nei lova, kan vanduai a ni. Achangtu Minister ka nihna angin ka mawhphurna a ni tih ka hria a, ka pawm thlap a ni a ti. Opposition party hrang hrang ten bang tura an phutna chungchang sawi langin, Pu Patea chuan, 'Chief Minister mawhphurna latu Home Minister leh Congress Legislature Party (CLP) secretary te hnenah pawh banna thehluh ka inpeih reng thu ka hrilh a, an nin ngai an tih loh vang leh min thlangtlingtu mipui ten bang tur a min tih loh avangin ka bang lo a ni,' a ti.

Hei mai hi a la ni ta lo va; MPCC Media department thuchhuah tlipnaah hian hetiang hian an ziak bawk: “Thusawitu dang Pu H. Liansailova, Treasurer MPCC chuan Tuirini Lei chim chu Sawrkar leh a chhangtu Minister bakah PWD hotute pawhin pawi an ti em em a, mi chhiat tawh lai a mahni Party tan a ham thatna lo lak tum an awm hi pawi a tih thu leh a dem thu sawiin kal khawm mipuite Minister ban rem tilo zawng ban phar tirin kal khawm mipui zawng zawng ten Minister ban an remti lo tih entirnan lungrual takin kut an phar vek a ni.

Khitiang khi kan ram hruaituten chhiatna lo thleng an dawnsawn dan chu a ni a. Chhiatna tihah hian khuarel chhiatna (natural disaster) ni lovin mihring siam chawp chhiatna (man-made disaster) a ni a, kan ngaihtuah chiang lo tlang ngawt mai. Mizoramah hian hetianga chhiatna a lo thlen hian a mawhphurtu an awm ngai tãk reng reng lohna hi a rei ta hle a. Engemaw chanchin lawmawm ve deuh leh hlawhtlinna tenau deuhvah pawh a hmingṭhat leh thangṭhat lo la vattu lama kan intodelh tehlul nen; chhiat tawh kawnga mawhphurhna latu lam hi zawng kan pachhe teh zawng a nih hi.

Lei a chim hian a lei dawh dan tur ruangam duangtu (designer)-in mawh a phurh kan hre ngai lo va. A hna vila enkawlpuitu engineer pakhatmahin mawh an phur ngai lo va, hlawkna nei tura sum tam tak hlawha a lei dawhtu contractor-in mawh a la ngai hek lo. Lei dawh te, kawngpui sial leh sorkar in sak lama mawhphurtu PWD hotu liante pawhin mawh an phur ngai lo va, an kaisan a

ṭhulh chuang lo. Mipui aiawha PWD enkawltu Minister pawhin mawh a phur tih a lantir awm kan la hre reng reng lo. Rel a chetsual avanga ram danga zin Railway Minister te an bang ṭhin ang hi Mizoramah kan hmu ve ngai lo. Mawhphurtua kan hriatte chu a chunga kan sawi ang khian a kilhna rubotute, a chhawrtu tur mipui hmanhmawhin an nawr vangte, phal chin aia rit phur lirtheiin a zawh vangte leh tuilian vangte a ni daih.

Kan PWD Minister hi a department enkawlah hian mi thar a ni lo va; hmang ṭangkai duh sela chuan a tawnhriat neih tawh hi ṭangkai tham a ni. Registered Contractor (Class I Contractor) ni pha ngat leh hna engemawzat lo thawk tawh a ni a. Kum 2008-a Congress an lo sorkar leh khan Parliamentary Secretary niin PWD enkawltu Chief Minister chu a hnaah a pui a, Minister of State for PWD angin term khat (kum 5) chhung hna a thawk a. Kum 2013-a an sorkar nawn leh khan Minister of State-a hlankai niin a u, Chief Minister hna chanpual hi a enkawlpui zui ta zel a. A ban a ṭul a, thlan tlin leh a nih hnu khan Cabinet Minister niin; mi state-a tih ngai loh angin CM hna chanpual a la enkawlpui zui ta reng a, hemi avang hian sorkar thuchhuah pakhatah phei chuan PWD Minister angin tar lan a ni. CM-in minister-te hna chanpual a siksawi danglam takah khan official takin PWD Minister a lo ni ta a. Hetiang a nih avang hian PWD hna chu hre chiang hle tura ngaih a ni.

Amaherawhchu, ani hi chuan ngaihdan dang a nei a, thiltih dan phung dang a nei bawk. Hman kum MJA inkhawmpuiah khan Information and Public Relations Minister ni bawk hian khualliana an ṭan chungchang leh lehkhabute an tlangzarh chungchang sawiin - official-te angin hna thawh reng tur a awm lo va, chuvangin khualliana ṭan leh lehkhabu tlangzarhna hunte hi an nei niin a sawi. Chanchinbumite hmaa a thil sawi hi office lamah file khawih tur a tlem tia a sawinaah ngaihsak ta ila. PWD minister hian a hmun ngeia tlawh a, mipui aiawha hna thawh dan ṭhat leh ṭhat loh en lam hi a tihturah a ngai lo a nih hmel.

Kum 10 lai PWD a enkawl chhung hian state danga lei dawh a chim loh chhante zir kual turin a zin lo a ni mai thei a. Mahse, a hna chanpuala sorkar hnathawkten an hna thawh dan a ṭha em, ṭha lovem tih a ena a vilpui lo hi chu mipui aiawha minister a nihnaa a mawhphurhna a hlen chhuak lo tih tichiang em emtu chu a ni chiang e. Lei (bridge) hi lirthei leh mihringin furah tuilianah pawh harsatna tawk lova an kaltlang theihna tura dawh a ni a, chim tur leh rintlak loh taka dawh tur a ni lo.

Kum engemawzat kal ta, engineering technology la hniam em em laia an dawhte pawh tun thlenga kan la hman laia tunlai thiamna san tawh hnua kan heti ta fo mai hi chu mawhphurhna hlen chhuak ṭha lo, sum ringawt ngaihtuaha hna thawk ṭha lote zar kan zo vang tih hi sawi loh theih a ni lo. Lei chimah leh lungrem chimahte nunna chan an awm reng laia mawhphurtu an awm ngai lo leh, hrem phei chu an awm ngai miah lo hi thil mak pawh a ni zozai tawh lo va. Mawhphurtu ni ngeia hriat hrem phei chu hla tak a ni. Hrem chu sawi loh; zilhhauh tawk pawh an la awm awm lo a sin. Mawhphurhna hlen loh avanga thihna thleng leh mipui tawrhna zozaiah hian mawhphurhna ṭhi awrh an awm ngei ngei a hun tawh a; mahse, tu nge chu ṭhi chu zawhte awrhtir ta ang le?