CLP RESOLUTION

March ni 8 khan MZP hruaitute leh zirlai ṭhenkhatin Bairabi bul Zophai hmuna Mizoram Chief Minister hmasa ber Pu Ch. Chhunga ram chhungah, "Zofate Chawlh Buk," sak tumin ruahmanna an siam a. Helai ram neitu, Pu Ch. Chhunga nupui Pi Rothangi hian MZP dil angin Zofate Chawlh Buk sakna atan phalna a pe niin an sawi. Chutianga zirlaite chawlh buk sa tura an inbuatsaih lai chuan he hmuna awm Assam Police-te chuan an tiang hmangin tharumin zilaite chu an bei ta chiam mai a. Zirlai engemawzat an hliam bakah he thil thleng, a hmuna hmua mipui hnena puangzar tura kal chanchinbumi pahnih pawh an hliam a ni.

He thilthleng hi pawl hrang hrangin an dem luai luai a, chanchinbumi insuihkhawm pawl MJA pawhin na takin demna thu a chhuah a. Chutiang a nih lai chuan Mizoram sorkar chu a ngawi reng a. Zirlai pawlte leh political party dangten - Mizoram leilung humhalh tum lovah te, Mizoram chhung ngeia Hailakandi district bawrhsapin CrPC section 144 hmanga mi 5 aia tam pawn chhuah khapna thupek a rawn chhuah pawh dodal miah lovah te, Mizoram chief minister hmasa ber ram chhung ngeia chawlh buk sak tumte Assam Police-ten kut an rawn thlak laia engmah a ti ve lo mai ni lova ngawi rengah an puh luai luai a. Chuti chung pawh chuan sorkar chuan he thil thleng demna thu chhete tak ngial pawh a chhuah hauh lo. Lungpui chunga nghavawk hram ang maiin a ngawi reng ringawt mai a ni.

Hei vang hi ni maw, Assam-a Hailakandi district enkawltu official-te leh Assam Police-te chu an huangtau ta sauh mai pawh ni lovin an che rawva ta sawt reng a. March ni 10-ah chuan Assam Police ho chu uchuak takin an che ta a, India ram hmun danga Police-te chet ṭhin dan anga invaukhan leh mittui-tlakna tak ngial pawh hmang hmasa lovin tiang hmanga ralthuam keng ve lo zirlaite an vuak chiam bakah, a tawpkhawka mipui hnawhdarhna atan chauhva an tih ṭhin silai hial an hmet puak ta a ni. Chu pawh a mu ruakin an hmet puak phawt emaw a, chuta mipui sa hulh hulh an la thunun theih loh fo chuan van vawr zawngtein an kap leh ṭhin a ni ngai a - march ni 10-a an chet dan anga zirlaite kea kap fuh khawpa chet hi chu a ṭul tawpa tih tura ngaih a nih laiin, thingzai pua kal mai mai te leh an thla lo latu chanchinbumite zawng zawng nena vaihmaa kut an han thlak ta bawrh bawrh mai leh silai hial an han hmet puak ta kha chu tihdan phung pel a ni.

India ram puma state hrang hrang police-te hian eng pawh an hmachhawnin chet lak dan tur duan sa, "Standard Operating Procedure," (SOP) an nei a. Mipui pungkhawm enkawl danah pawh chutiang chu a awm. Tihdan tlangpuiah chuan, mipui pungkhawm chu dan kalha pungkhawm (unlawful assembly) a ni tih hrilhin aurinna hmang emawin kal darh turin an ngenin an hriattir ang. Chuta an kal darh mai loh chuan kal darh tura hriattir nawn lehin, an la kal darh duh loh fo chuan tharum (force) hmanga hnawhdarh an nih tur thu vaukhanna (warning) an pe leh ang. Hetah hian mi pungkhawmte hian buaina an siam lem loh chuan boruak a dang thei a, buaina an siam chuan tiang hmanga hnawh darh (lathi-charge) emaw, mittuitlakna (tear-gas) hman emaw a ṭul thei a, khawi zawk nge hman hmasak tur tih chu sawi lawk theih a ni lo va, boruak awmdan azir zelin an che ṭhin. Silai hmehpuah hi chu a tawpkhawka tih tura ngaih a ni.

Engpawhnise, rorel lai MLA-te awmkhawmna Congress Legislature Party (CLP)-in resolution an siam hi a ngai ngaiin i lo chhiar teh ang u :-

Vawiin March ni 11, 2018 (Pathianni) Chawhnu dar 3:00 aṭanga zan dar 7:00 thleng an Leader, Pu Lal Thanhawla, Chief Minister hova C.M’s Conference Room-a CLP Emergent Meeting chuan hetiang hian lungrual takin Resolution a pass.

“Mizoram chhung, Pu Ch. Chhunga rama ZOFATE CHAWLHBUK sak tumna hmun hi zanin (chawlhni zan) la la hian Mizoram Police-ten luah nghal se CLP chuan a duh a. Zofate Chawlhbuk hi sak a nih ngei theih nan Sawrkarin hma la zui nghal se,” a ti bawk.

Date: 11.03.2018 Sd/- Lalrinmawia Ralte, Secretary, CLP.

Hetianga rorel lai MLA rual awmna pawlin resolution an pawm rup mai hian sawi tur leh ngaihtuah tur a titam hle a. Home Minister Pu R. Lalzirliana chuan hetiang resolution an pawm thutna chhan hi Assam Police-ten Mizo zirlai leh chanchinbumite kut an thlak vanga an thinrim em vang niin Assembly House-ah a sawi. Engvanga Aizawl leh Kolasib district bawrhsapten Zofate Chawlhbuk sa tura kal mipuiten a hmun an thlen theih lohna atana CrPC section 144 puan hnan leh si nge an nih tih zawhna chu, amah hriattir leh rawn hauh lova thupek hi lo siam nia sawiin, a lungawi loh thu a sawi chhuak a nih kha.

Thil mak tak tak hi Mizoramah a thleng ta fo va, chu’ng zingah chuan CLP resolution pawh hi a tel chiang khawp mai. Rin dan bak chuan han hrilhfiah vak ngaihna a awm lo. Chutih rual chuan kumin hi Assembly inthlanpui neih kum tur a ni a, kum chanve awrhin a dang chauh tawh a ni tih hriat tel reng erawh chu a ngai. Engpawhnise, MZP ten Zofate Chawlhbuk sa tura kal an tum dawn khan sorkar lam chuan kal lo turin an ngen a, an kal lui ta a. Engtin tin emaw a zuzi mai mai dawn emaw an tih laiin MZP lam khan an lo ti tak ta riau mai a. Huaisen takin an thiltum chu hlen an tum tih a lang a, chumi avang chuan March ni 8 khan vuak an tuar fe phawt a. Chanchinbumite pawhin Assam Police kut an tuar a ni. Sorkar erawh a la ngawi reng thung. March ni 10-ah a aia tam zawkin hliam an tuar leh a, chanchinbumi tam zawk, an zinga hmeichhia pahnih telin an hliam ta bawk a. Chubakah Assam Police te hian silai an hmet puak a, silaimua kah hliam hial an awm a ni. Sorkar a la ngawi!

Zirlai leh mipui erawh an ngawi ta hauh lo mai, an thinrimzia a lo lang ta. Hel pawl ang reng indin thawm thlengin hriat tur a awm ta a. Sorkar hian zirlaite leh chanchinbumite kutthlak an nih hi an hre reng a, a piah lawka Mizoram Police awmte erawh chu an che chhuak eih lo. Hetih lai vek hian Ministry of Home Affairs chuan helai vel hi ramri buai tiin buaina lian zawk a chhuah lohna turin Mizoram leh Assam sorkar te chu ramria muanna vawng tura Police tir turin a rawn rawn ta a. Chumi lehkha sorkarin a hmuh hnu lawk, khulaia silai a puah ni tuk Pathian ni, March ni 11-ah chuan rikrum thilin CLP inkhawm koh rum rum a ni a. He thu hi an rawn vawrh chhuak ta nawlh mai - Zophai hmuna Mizoram Police tirh leh Zofate Chawlhbuk sak a nih ngei theihna atana hmalak hi.

Chuti chu kan ni ta a. March ni 12-ah zirlai huai­hawtin mipui a tam a tam mangkhengin Aizawlah leh khaw hrang hrangah kawng an zawh ta a. Hetah hian mipui thinurzia a lang chhuak a. Mahse, a hunah Mizoram chin dik tak hauh tur leh kan zirlaite thlamuan tur takngial pawha sorkar hi a chet chhuah tawh loh avangin thil a tlai zo ta a. Hetiang boruak a awm tawh hnu chuan sorkar laipui lam aṭanga tihtur leh tih loh tur khauh pui pui an dawng ta zut mai si a. An duh duha an sawn theih bawrhsapte chu an hriatpui hauh loh leh sorkar rawn lova khapna thupek chhuahah an sawi ta a. A dik thei a, a dik lo thei bawk. Engpawhnise, Assembly rorelna kawnga an party MLA te inhlawmkhawm ṭha taka an awm theihna tur maia din CLP-in he lam a khawih ta chiam chiam leh, sorkar (executive)-in a tih mai tur awm tak resolution siama ti tura a ngen takah hi chuan inthlan a hnai tih hi kan hre chhuak lo thei lo zawng a nih hi.

Chubakah chuan resolution hi chu Assembly meuh pawhin a siam zing tawh a, a taka tihhlawhtlin chu sawi loh bawhzui mang lohva thisawn ta pawh a tam mai. CLP resolution hi rorellai MLA-te thinrim thut vang emaw, inthlan kum a nih vanga politics a hamthatna duh vang a ni emaw, kan zirlaite tawrhna hi a nat em vang emaw a siam a ni mai thei a. Siam a nih chhan chu engpawhnise, rorellai party, MLA 40 awm theihna a MLA 34 zet te’n resolution meuh siama Zofate Chawlhbuk sak ngei a nih theihna’n hmalak zui an tum thu an puang a ni a. “Van lal fa duhtakte zawngin an sa ngei tur a ni,” tih ang khan an sa ngei tur a ni ang. Inthlan hma ngei hian ni nghe nghe se la, ram leilung humhalh kawngah hian vuaicha tawh teh suh se.