ENGINEER-TE

Tun hnaia Lunglei Ṭhalai Pawl (LṬP)-ten kawngpui siam chungchanga an lung­awi lohna lantira Superintending Engi­neer (SE) an aukhum chungchangah PWD-a thawk pawl ṭhenkhatin an hotu, an thawhpui thlavang hauh an tina hle a. Mahse, a sawhkhawkah anmahni an inhliam ta zawk niin a lang. LṬP thiltih hian Lunglei district aimahin Aizawl leh Mizoram hmun hrang hrangah thlawptu a ngah zawk tih a hriat hle a. An chet dan, tharum tel lo leh dan bawhchhe hauh lova an thiltih dan khan mi thinlung a hneh a, thil ṭha duhtute rilru a kai tho nasa hle a ni.

He thil thleng chungchangah hian PWD engineer insuihkhawm pawl chuan an thawhpui, Lunglei PWD SE thlavang hi na ang reng takin an hauh a. PWD-a thawk pawl pakhat chuan LṬP-te thiltih dan chu aia upate zah lohna tiin a hma khan an lo sawi tawh a. Tunah chuan MIPEWA thuchhuah chuan LṬP-te chet dan hi a Mizo lo va, Kristiante chet dan turah an ngaih theih loh thu an sawi. An sawi thui viau lona chungin, LṬP-te chet dan avang hian Mizoram khawpui lian ber dawttu hi sorkar hnathawk (PWD engineer)-te awm zui zelna atana tlak lo leh chakawm lo ang deuhva ngaih theih turin an sawi peh hel (innuendo) a nih kha.

PWD engineer inzawmkhawm pawl thuchhuah hi a ngai ngaiin lo chhiar nawn leh teh u :- “Mizoram PWD Engineers Welfare Association (MIPEWA) chuan kan member pui Er. C.Lalchhuana, S.E, PWD Lunglei Circle, Lunglei Ṭhalai Pawl (LTP) inti ten Dt.2.4.2015 (Monday)-a a Pisa kal tur lo hmuak a, Public Address System nen meuh mualpho tak leh zahthlak taka an lo diriam a, damchhunga ser reh thei tawh lo tur an siamsak hi kan tuarpuiin na kan tihpui tak zet a. Lunglei Ṭhalai Pawl inti te chetdan hi a Mizo lo va, Kristiante chetdan turah kan ngai thei lo a ni. Khawtlang leh Ram hmatheha hmang leh thuneihna inpe chawpa kan memberpui chunga LṬP chetdan ang hi Mizoramah a thlen kan la hre ngai lo va. Mizoram khawpui lian ber dawttu leh Sorkar hnathawk tan pawha thlakhlelhawm tak ni ṭhin LṬP inti ten an chetdan uchuak tak avanga an tihminghliau hi pawi kan ti tak zet a, tun hnua Sorkar hnathawk awm zel turte tan awm chakawm a nih leh ngei kan duh hle a ni. Sorkar hmalakna leh hna thawhah duhthusam lo leh felhlel a awm a nih pawhin hmalak dan phung pangngai a awm reng a. Chutih laia dan leh thupek kengkawhtute pawh zahder miah lo leh ring tawk lova uchuak taka an che mai hi kan dem tak meuh a ni.” A hnuaia hming ziah hnantute chu Lalbiaknunga leh David Sapzova, Secretary leh President, Mizoram PWD Engineers Welfare Association te an ni.

Han ngaih mai chuan PWD-a thawk dangte leh a bik takin engineer inzawmkhawm pawlte hian an thawhpui thlavang an hauh hi an tihawm tak a ni a. Ṭhenkhat phei chuan tih ngei ngei turah kan ngai awm e. Mizote hi mahni khua leh veng mi te, YMA Branch member pui te, pawla thawhpui te thlavang hauh hi tih ve tur rengah leh tih ngei ngei turah kan ngai ta fo mai a. An dik lohna ngeiah pawh ṭana an thlavang hauh hi kan tih loh chuan miin min dem huai huai kan hlau a ni mahna. Tute emaw pawikhawih an awm a, kan khua emaw kan veng emawa cheng nia an inchhal a, an lo nih chiah loh chuan thuchhuah siamin kan khaw/ veng mi an nih loh thu kan sawi hram ṭhin. Chutiang hnam chu kan nih avangin MPEW thuchhuah hi tihawm tak satliah mai pawh ni lovin tih ngei ngei turah Mizo tam tak chuan kan ngai ngei ang.

Ni e, kan tih ṭhan leh tihdan phunga kan neih a ni a, ti lo thei lo turah pawh an inngai a ni mai thei e. Mahse, ngaihtuah chiang lova thiltih hian mi a vaw let nasa thei khawp tih hi hriat fo a ṭha. Mizoramah hian mahni kuta dan kenkawh hi kan ching a, tharum thawh mai te, sual nia hriat ṭhenkhat phei chu an nunna lak thlenga kutthlak mai te kan ching fo ṭhin a, hei hi a dik lohzia kan ziakin kan sawi fo tawh. Tharum thawh leh mahni mihring puite kutthlak hi dan bawhchhiatna a ni hrim hrim a, dan kengkawhtu tura danin thuneihna a pek ve reng reng lohten dan kenkawh an tum pawh hi a dik lo va, dan bawhchhiatna a ni.

Chutih lai chuan LṬP-ten engineer pakhat aurinna hmanga an aukhum hi dan bawhchhiatna a awm lo va, mahni kuta dan kengkawha puh tur an ni hek lo. An lungawi lohna an lantir a, an thinrimna kha tharum tel hauh lovin an lan chhuahtir mai a ni. Hetianga lungawi lohna lantir hi mipui rorelna (democracy)-ah chuan a thiang mai ni lovin tihtur zawk a ni a, lungawi loh (right to dissent) hi mipui/mihring chanvo a ni zawk a ni. Lungawi lohna lantirnaa mipui harsatna siam chiamte hi a ṭha lo va, chuti ni lova an lung tiawi lotute tharum thawh hauh lo leh dan sadai ṭhiat hauh lova an au khum a, an lungawi lohzia hrilha an hriattir kha chu a democratic em em zawk a ni.

Tunhma rambuai lai khan Administrative Officer (AO) ho kha a bikin thingtlang lamah an lal em em mai niin an sawi a, khaw thuneitu ber an nih piahah law and order chungchangah te thuneihna an nei a, curfew pawh puanga hlih theihna thuneihna an nei bawk a. Khaw te lal an ni satliah lo va, an thuneihna chinah chuan sorkar khan thuneihna sang tak a pe a, chu mai ni lovin buhfai, chini, atta, khawnvartui leh mipui mamawh sem bakah khami aṭanga sum lo lut kha an kutah a lut vek bawk a. An khaw nula hmelṭha ṭha kha an thing thei ni hialin an sawi ṭhin.

AO ho awm dan ang deuh hi kan engineer ho awm dan pawh hi a ni awm asin. Sum leh pai an nei a, thuneihna an neih dan hi chu thuneihna chelhtu ram hruaitu (politician)-te nena hnung thak an inhiah tawn vang niin ṭhenkhat chuan an sawi a. Politician-te pawh hian an tlawn hial niin an sawi zu nia! An vawk lal len a, a nihna tak sawi phei chuan an siak nei kal ngut ngut mai a, Sailo lal lai ang maia mi chungtlak thei pawh an awm nual a ni awm asin!

Sum ngah na na na chu thubuai an neih pawhin an la tal pit zel tlangpui a, kohhran leh khawtlangah zah kai tur tawkin nihna leh dinhmun an chelh a, an sum leh pai ngah vang a ni awm e. Chuvang chuan mi naran hi chu an chhuk en tlangpui a ni. Chutiang chu kan khawtlang leh kohhrana an dinhmun a nih miau avangin anmahni sawisel a, aurinna hmanga tawng a, diriam ve ngam khanglangtute chu an puh chhe ve ta viau a nih awm hi!

A nih leh, i ti teh ang: hetianga an hnathawh chhiat avanga mipuiin kan tawrhna hi sawi lang a, anmahni pawh hau ngam lo tur hiala an indah sang a, mipui chunga lenga an indah dawn a nih chuan rawtna i siam teh ang - Kan PWD engineer zawng zawng (SA chu hlahthlem rih ang), Junior Engineer (JE) aṭanga Engineer-in-Chief inkar zawng zawng, a thawk mek leh an hna aṭanga chawl tawh kan hriat zawng zawngte in leh lo thlalak hi i thawhkhawm ang u hmiang. Chutih rualin kan chief minister leh minister, minister of state te, PWD lo chang tawh zawng zawng in leh lo leh an thil neih thlalak pawh i thawh khawm ila.

Chutah chuan kan lei chim chhan te, kan lung­bang rem chim avanga nunna hlu tak kan chan ṭhin chhan te, kan kawngpui chhiat kumhlun chhan te hi kan hriat chian phah dawn nge dawn lo i en ang u hmiang. Lei dawh, lungbang rem leh kawngpui sialna tur leh enkawlna tur sum hi an in leh lo ropui tak takah hian an lo bel em tih hi fiah an ngam chiah em? Thudik leh thutak kan hria a nih chuan an cho va, an rim a, an rim thlu taah kan ngai ve mai ang chu. Chu chona chu an chhan ngam dawn phawt chuan keini mipui lam chuan kan chhang let ngam chiang a ni tih hi hre rawh se. Tumah hi dan chunga leng kan awm lo - sum leh pai neih avanga dan bawhchhe thei, dan hmanga hrem theih loh leh mipui chunga leng nia inhriatna hi he mipui sorkarna ramah hian bo ngei tawh teh se.