MORALITY

‘Morality’ han tih hian saptawng a nih miau avangin hrilhfiah a ngai a, a awmzia erawh chu kan hre tlanglawn viau chuan a rinawm. JF Laldailova kan rawn chuan ani chuan moral chu - dik, fel, dân ang, hur lo, chhia leh tha hria, nungchang khawih thei, mi zirtirna...” ti tein a letling a. Morality chu - chêt dân dik leh dik lo thliarna, felna - tiin a letling thung a. Mihringin kan chhia leh tha hriatna hmanga khawtlanga kan chen hona kawngah leh mihring leh mihring kan khawsak hona bakah sakhaw lama kan rinna kawnga thil tha ni a kan pawm hi a ni ber awm e. ‘Morality’ leh politics bakah November ni 28-a assembly inthlan lo awm tur suih zawm i’n tum teh ang.

Mizo hian tawngkauchheh tha leh fiah zet mai kan neih chu “Zawngrêngte a serthlum vêng ang,” tih a ni a. He tawngkauchheh hian mipui (sorkar) sumbawm khawih theitu ram hruaitute leh sorkar miliante chungchang a sawifiah hle rualin kan inthlan boruak pawh a sawifiah tel thei awm e. Election Commission hian dan tha eltiang leh kaihhruaina khirh tak a duang a. Chu pawh chu la duhtawk lovin kohhran leh tlawmngai pawlte’n MPF dinin state dangte aia inthlan felfai leh thianghlim zawk a awm theihna atana ti niawm takin a aia kaihhruaina fet zâwk an duan thuah a. Chuti chung pawh chuan heti hi kan ni!

Tunhma aṭang tawhin kan inthlan hi a muan­awm ziah a, India ram hmun dangte ngaihtuah phei chuan MPF din hma daih tawh aṭang khan inthlanna muanawm taka kalpui thin leh muanawm ber kan ni a. Police officer pakhat phei chuan Police duty miah lo pawhin buaina chhuak hauh lovin Mizoramah hi chuan inthlanna hi a neih theih a rin thu a sawi a, a ring sual vakin a rinawm loh. Chutiang kawnga kan hmingthat em em lai chuan duhkhawp lo an awm a, pawl an din a. A muanawm reng chungin kan inthlan hi a thianghlimin a felfai em tih hi ngaihtuah chian a ngai ta a ni.

Ni e. Tunhma phei kha chuan Bihar leh Uttar Pradesh-ah te chuan vote thlak ni a mi engemawzat an thih loh chuan chanchinthar a ngaih a ni zawk hial a. Polling Booth te kha tharum hmanga luhchilh a, vote tihchingpen (booth capturing) a awm loh chuan a kim lo emaw tihtur a ni a, vote tihchingpen hrim hrim (rigging) te phei chu thilthleng vantlâng tak a ni zawk. Hei mai hi a la ni lova, politician tam ber chuan hel pawl emaw misual rual emaw an khawi a, chumite hmang chuan vaubehna nen vote an hui thin a. Party hrang hrangin an thehchhuah candidate leh party behchhan nei lova in candidate (independent) tam tak chu thubuai hlam chen chen nei an ni hlawm a, misual rual an ruai mai ni lovin misual rual hotu an ni hlawm a. Hel pawl leh misual rual hruaitu an nih chiah loh pawhin tam tak khu chu Setana choka a fatu zek zek awm khawpa pawisak nei lo an ni.

Inthlan boruaka an sawi lar chu tihrawl (tharum) hmang (muscle power) a vote zawn leh sum leh pai hmanga vote lei (money power) hi a ni a. A hmasa zawk khi chu Mizoramah chuan kan uar viau lova, sawi tawh ang khan kan inthlanna hi a muanawm viau zel zawk. Amaherawhchu, sum leh pai hmanga vote zawn hi chu uar tak kan ni a, political party-te vote zawnna hmanraw hman rim ber hi sum leh pai tawktarh a ni.

Mizote’n politics kan khelh dan hi a bilhah a tho lova. Mipui sorkarna duh behchhanin lal in vawm leh lal ho tlawm tura nawra rikrapin bul kan tan a, kan politics chu tharumin bul kan tan tihna a nih chu. Phailam vaiho tihdan kan la a, kan political party-te hian hmasawnna tluantling leh tlo, hmasawnna ruhrel lian tham leh thil tak tak aiin mipui vote hui thei zawng ringawt hi an tawktarh a. Hetiang hi saptawng chuan ‘populist scheme’ an ti a, ‘sop’ an ti bawk a, a awmzia chu vote hmuhna atan liau liauva pawisa emaw thildang emaw a thlawna sem hi a ni mai a. Tunah pawh hian kan party lian leh te deuh pawhin an uar hle mai.

India ram state dang thenkhata an tihdân hi kan la ve a, kan uar ta viau mai a, a sawi mawi thiam thiam dinchanna a ni zui. Kumin inthlan turah phei chuan chhungtin tan cheng nuai 1

aṭangin cheng nuai 3 an intiam siak a. Candidate pakhatin a bialah scooty leh laptop sem a tiam a, chu chu central YMA lamin an kamkhat hnu lawkah rorellai party chuan laptop sem an tiam zui leh ta nghal a. NLUP leh NEDP tiam piah lamah zirlaite excursion atana sum dah leh laptop sem lam hawiin zirlai vote nei thar hlimte an rim ta mek a nih hi.

A policy ang zâwng leh manifesto a tarlang a mipui vote hmuh theihna ni a hria a sem lampang tawktarh piahlam hi a la awm leh a. Chu chu a taka sum sem te, mimal leh pawl hnena hlawkna tham tur thil tiamte hi a ni. Tunhma deuh a inthlan vote thlak hnaih tawh tak tak hnu a in tina kal a sum sem emaw sum pek tiam emaw kha an tihdan a dang deuh tawh a. MPF hian in tina kal a vote zawn (door-to-door canvassing) hi an khap ta chiah lova, khap engang pawh ni sela internet banking leh mobile banking hmangin mi bank account a sum thun zung zung theih a nih hnu hi chuan invent sen tak tak a ni tawh lo.

Chu chu kan dinhmun a nih avang leh Mizote hi (inti Kristian tha tak chunga) kan thinlungah kan depde tak êm avang hian politician te tan lei kan awl a ni awm e. Hausa fe fe pawhin an fate scholarship lâk theihna tur a nih phawt chuan an hlawh hmun sawma then hmun khat pawh hlawh pha lo angin an ziah tir duh a ni a. Mirethei inchhunga awm thei reng reng lo thil man to fe fe hung dul chunga rethei bakberh a ngaih, Below Poverty Line (BPL) a inziah luh hreh lo kan tam ta hle. Kristian tha tak anga miin an hmuh, mipui (sorkar) sum eiruk theih dawn phawta an kraws put paih ta bawl bawl hi an tam ngawt mai!

Morality chungchanga a hnam anga kan ngaimawh ber chu zu hi a ni awm e. Enganga fel leh rilru tha leh a mihring puite tanpui kawnga thawhhlawk pawh hi zu inmi a nih phawt chuan kan khawdang en nghal hru mai a. Mipui chanai tam tham fê eiru ngeia rinhlelh pawh ni raw sek sek mipui vantlangin zu in lo nia an hriat chu an hawi chungnung larh thei mai thung. Kohhran rawngbawltu atan kan awt nghal viau zel bawk. Zu in leh in lo hi tehna dik lo thei lovah kan ngai a - he hnam, khawtlang leh kohhran hian - chu chu a khirh lai tak a ni.

Chutiang kan nih miau avang chuan kan tehna kha a ropui lo em em mai a. Pawisa sem tawktarhtu pawh kan pawmzam zel thei ta a, vote zawnna a pawisa semtu pawh hnam pawikhawih leh mi dik lova ngaih ai chuan thenkhat chuan malsawmna thlentu vantirhkoh ang hialah an pawm ta mai chu a nih hi. MPF emaw Election Commission emaw a awm a, kaihhruaina khirh leh dan fet tak siam a ni ngei mai. A taka inthlanna thianghlim leh felfai awm tak takna tur erawh chuan kan ‘moral’ hi siam dik a ngai a. Kan vote lei theih a nih chhung chuan he ram hi kan siamtha ngai lovang a. Sum leh therhlova lei theih loh kan nih hunah chauh ram hruaitu tha leh hmasawnna hna thawk thei, hnam humhalhtu kan thlang thei ang.