ZIRNA SIAMŢHAT

A kum ka hre tawh lova, ka la upa viau lo tih erawh chu ka hre reng mai. Kan veng; Venghnuai-ah High School din an rawt a. Middle School-ah vantlang inkhawm an ko rup mai a, sikul chhunga leng lo khawp veng mipui an kalkhawm a ni. Veng hmasawnna atan ti a ka pate hovin harsa taka a, nghathu zuar a Venghnuai Middle School an lo dinte pawh ka hre pha ve a, chu sikul ngei aṭanga zirchhuak chu ka ni a; a hma-in Venghnuai Primary School aṭanga zir chhuak tho ka ni bawk. Chubakah mipui hma a thusawi ngai lo ka ni a, chuti chung chuan ka thinlunga min tur tu-in a tur nat em avangin naupang te ni chungin, mipui tam ber duhdan kalhin thu ka sawi ve ta a nih kha.

He vantlang inkhawm a thusawitu zawng zawng (kei tih loh) chuan, Venghnuai chu Aizawl khawpui a veng upa leh hlun ber zing ami a nih thu te, High School hran neih ve a tul takzet an tih thute thiam em em hian an sawi a. Mipuiin kut an beng hluah hluah zel a. An sawi zawng zawng kha a dik thui hle a, pawm a nuam hle bawk. Kei ngei pawh hi, a hma khan kan vengah High School lo awm tawh sela chuan, ka nu leh pa khan Mission Vengthlang daih a awm Synod High School a ke ngat a min kal tir ai chuan, kan in aṭanga pen hnih khat leka min kal tir kha an duh zawk ngei pawh ka ring. Ka hmalam nun erawh a danglam viau mai thei thung.

Naupang tak la ni chung khan a tuiluang su let zawng leh, thusawi tawh zawng zawng kalh thu kha ka dinchhuahpui ta a ni a. Mipui hma a thusawi ngai lo nih tawh sa nak-a-laiin rual-u te thusawi kalha thusawi awmchhun nih kha thil namai lo tak a ni. High School tha tak, Aizawl khawpui a veng dangte leh Mizoram thingtlang khua a chengte paw’n an rawn pan luih luih tur din chu tha ka tih thu ka sawi te te a. Mipui lam pawhin min chhawn tha hle. Mahse, Aizawl khawpui a veng upa leh hlun ber zing ami kan nih avang ringawt a High School neih tul ka tih loh thu te, kan veng mite kan rethei si a, in tin thawhlawm thawh khawm ringawt chuan rei kan enkawl theih ka rin loh thu te ka sawi a. A tlipna atan chuan thil reng reng hi a tam lam (quantity) aiin a takna leh thatna (quality) ngaih pawimawh zawk a tul thu te, Aizawl khawpui-ah (khatih lai khan) High School a tam tawk ni a ka ngaih thu sawiin, neih ve kher tul ka tih loh thu ka sawi ta a ni.

Kut an beng ta hauh lova, an ngawi thup mai. Min thlawp ang hawi zawng deuhva ka hnu a rawn sawi ve chhun chu pa pakhat chauh a ni. A tukah kha chuan min rel phar lo chauh mai thei a, ka hre lo. Mahse, High School din tur chuan kan inpuahchah ta a, College zirtirtu, a hnuah phei chuan Mizoram University a a Vice Chancellor neih loh chhunga hun rei fe chelhtu kha, High School Management chairman-ah ruatin a dodaltu awmchhun kha vice chairman-ah min ruat ta a. Hun engemawchen chu Venghnuai High School chu a veng chhung mite thilphal avangin a kal ve a, mahse, kan tlin tak ngang loh avangin an pamtul ta a ni. Nghathu zawrh hun (era) a liam tawh bawk si a.

Mizo nu leh pa tam ber hian kan tu leh fate zirna chungchangah hian ngaihtuahna thuk tak kan seng hauh lo mai a, kan chik peih hek lo. Pawisa nei deuhvin senso dang deuh leh tha deuhva an ngaih sikulah an tu leh fate an dah mai a, a nei tam lo deuhvin a dawta senso hniam hretah an dah leh mai a. Rethei leh pachhe deuh bakah thingtlang khaw mite chuan an khua a sorkar sikul-ah an tu leh fate an dah leh mai bawk a. Sikul tha kan tehna lian ber chu (a bikin High School leh Higher Seconday School bakah College-ah) Board/ University ekzam a pass kim emaw, pass tam emaw a ni.

Sikul thenkhat chhuak te chu doctor leh engineer-ah an chhuak tam em em a, kan ram leh khaw­tlangin a mamawh dang mithiam leh tangkai ni zui ta an chhuak lem lo. Doctor leh engineer-te hi kan ram leh khawtlangin a mamawh lo tihna ni lovin, thiamna dang nei, kawng hrang hranga kan ram hmasawnna (all round development) thlen thei hi kan mamawh tel em em a ni. Sorkar hnathawk tur ringawt ni lo, kawng hrang hrang a he ram leh mipuite chawikang tur hi kan mamawh a, chutiang mi hrang hrang leh thiamna hrang hrang chherchhuak thei zirna hi kan mamawh a ni.

Zirlai nu leh pate rilru chu an hriatchian em avangin a bik takin mimal leh kohhran enkawl sikulte chuan, result tha neih ngawr ngawr an thupui ber a ni ta mai a. Thiamna nghet leh mihring chhawrtlak chherchhuah ai chuan, ekzam dawn hnaih a an zirlaite pass hrim hrim tur leh, pass tha tura beih kha an rilru a awm ber a ni. An sikul kal lai a thil an zirtirte kha a hnu a hna an thawh leh zelnaah an hman tangkaina tur khawpin an hre belin an thinlungah a bet zui em tih lam chu an ngaih pawimawh ber a ni hauh lo tih hi a chiang em em a. Gospel camping/ crusade vela rilru phurna (emotion) chawhthawh a piangthar ngei ngei tura vau leh tihthaih a nawr chiam nen a lem chuang lo.

Chubakah chuan kan sawi fo angin tlem lai deuh aṭang tawh khan, pawl hniam lam (elementary)-ah sap sikul kan tih mai ‘English medium’ a indah kan intihhmuh ta em em a. An zirlai thiam chiang lo mahse sap tawng an nal viau chuan kan duhtawk a. Chu mai pawh ni lovin, sap tawng thiam hi lehkhathiam emaw kan ti nghet tlat tawh niin a lang. Finna leh thiamna chhar chhuahna tur hmun, sikulah sap tawng chauh kan thiam chhuak ta a. Chumi avang chuan zirna (education)-in a tum ber thiamna leh finna chharchhuah a hman tlaka inchher kha kan thupui berah a tel ta lova. India rama in elna sang ber khelmualah kan pet lut thei ta mang reng reng lo a nih hi.

Hei hi kan dinhmun diktak chu a ni a. Mimal enkawl sikula an tu leh fate dah tute hian, kum khatah ngawt pawh pawisa an seng tam hle a, hostel-a an dah ngat phei chuan an senso hi a sang takzet a. Universalization of Education thupui a neih a, a thlawna zirna pe tura intiam India sorkar hnuai-ah hian nu leh pa tam ber chuan kan tu leh fate lehkha zir chhuah hnu'an an ‘certificate’ hi a lei a kan lei a ni ber. An senso behbawm nen phei chuan tam tham tak leh phurrit, rit em em a ni. Chutianga sum tam tak seng a an zirtir tam zawk hial chu lehkhathiam ti a sawi ngam loh an la ni zui hlawm ta dah a.

Sorkar sikul bikah hian sorkarin zirlai pakhat zirna atan a lo sengso nasa hle mai a. Ka thianpa Headmaster pension tawh Pu Lalrammawia’n a chhut dan chuan (hei hi hman kum deuh tawh, a pension hma kha a ni a) Government Chawnpui High School-a naupang pakhat enkawlna atana sorkarin kum khata a senso chu Rs. 2,90,000/- a ni a, Pianghleia HS a zirlai pakhat kum khata enkawlna senso chu Rs 1,80,000/- niin a chhut.

Hetah hian sikul sakna, siam­thatna leh a behbawm dang tel hauh lova zirtirtute hlawh ngawr ngawr aṭanga a chhut a ni a. A sawi dan chuan Aizawl District chhunga sorkar HS 38 a Headmaster chauh kum 1 hlawh atana sorkar sum sen hi Rs. 4,33,20,000/- bawr a ni a. Hei hi Headmaster hlawh tlem ber pawl hlawh aṭanga chhut a ni a ti. Khawpui sikul, zirtirtu ngah a zirlai tlem si-ah chuan, zirlai pakhat kum khat an zirtirna senso a sang em em mai a, thingtlang khaw lama zirtirtu tlem tak, zirlai ngah si-ah chuan, zirlai pakhat zirna atana sorkar sum sen a tlem leh deuh mai mai a ni.

Mimal enkawl sikul a an tu leh fa dah tute hi an theihtawp tak meuh a, zirna tha ber atana thawk a insengso te an ni a. An senso rah chhuah hi he ramah hian a nep ta em mai a, a pawi ta a ni. Mihring chhawr tlak (human resources) chherchhuahna atan hian nu leh pate’n sum an ui lo hi thil tih awm tak a ni a. Mahse, a tawpa lo chhuak ta hi he ramah hian a hlawk ta lo em em mai hi a pawi ber chu a ni. Chutiang bawkin sorkarin naupang zirna atana a senso sanzia kan sawi tawh a. An zirlaite chhawr tlak a chhuah thei hauh lo zirtirtu tam fe mai a chhawr bawk si lai hi a buaithlak em em a ni.

Senso tam hrim hrim hi chu a rahchhuah a that a hlawhtling leh hmantlak a chhawr tlakah chhuah vek sela chuan, zirna atan a senso (investment on education) hi a na miah lo. Mahse, chumi chu kan dinhmun a ni hauh lova, Master degree nei 100 tel dawnin Police constable nih tuma an intlarna thinna ram hi state dang a awm ve kher lo mai thei a ni. Doctor, engineer, ukil leh hna dang dang thawk tlak a zir chhuak piah lamah hian, All India Service (AIS) chher chhuak tam thin Mizoramin tlem a zawng tal a chher chhuah leh theihna tur ang zawng tal pawha kan zirna kalphung hi siamthat chu a ngai tawh takzet mai.

Board leh University ekzamnaa za zela pass tha hi a tha love kan ti lova, mahse zirna tha bukna patla tha ber leh tling ber a ni lo. Zirna-in a tum ber chu zirlaite mi puitling, hman leh chhawrtlak, thiamna tak tak nei tura chherchhuah bakah, ram leh hnam hmangaih a, ram tana hlawk taka thawk thei tura zirtir hi a nih miau avangin ‘examination oriented’ hi kan kalsan a hun takmeuh tawh a. Zirlaite’n thiamna tluantling, an nun kaihruai a an hmalam hun (career) a mihring puitling, hmantlak leh chhawrtlak an nihna tur hi ngaihtuah a ngai a. Chutah chuan zirlaibu bakah zirtirna kawngah thil inthlakthleng (change) hi kan mamawh em em a ni.

Midangte nena chenho thiamna te, rim taka thawh hlawkzia te leh, khawvel hriatna leh thiamna thuk tak hmang tangkai tur zawngin kan zirna kalphung hi her-rem a tul ta hle mai a. State dang zirna in leh zirlaite nen a zirlai in ang leh inchen tura ruahmanna siam te, kan zir dan phung hrim hrim siamthat leh ekzamna a ‘pass’ ngawr ngawr ni lo, hriatna tak tak chharchhuak leh hmantlak ni tura zirlaite chherchhuak (quality educa­tion) lam hawi zawng hian kan zirna kalphung hi tihdanglam a ngai ta tih hi a chiang khawp mai.