MPF LEH INTHLAN

Khawvelah hian thil tha duh an awm a, a lova luak chhuaka duh tha lutuk leh duh fir lutuk pawh a awm theih a. Khawvela awm reng si-in famkimna hmun Vanrama awm hun tur suangtuahna anga he lei a khawsak tum emaw midang khawsak tir tum emaw te pawh hi an awm a ni awm e. Nupui atan chuan hmeichhia hi an tha tlangpui a, thenkhatin an nupui atana an duh dan an han sawi a duhthu an sam tak tak hi chuan chutiang hmeichhia chu an lo awm tak tak meuh thin lo. Tunhma khan Mizo pa lar tak pakhat leng rei tak hian a nupui atana a duh a’n sawi tak tak chu hmeichhe tlin chi rual a ni lova, pathlawi fel tak tan chuan a tlin theih hram awm mang e, an ti thin.

Kohhran pawl lian deuh (Baptist Kohhran tiamlo)-te’n an din, Mizoram People’s Forum (MPF) hian kum rei fe chu Election Commission of India aia duh fir leh thikthu chhe mahin Mizorama inthlan hi an lo thunun tawh thin a. Chutianga rei tak kan kal tawh hnu chuan kan inthlanna hrim hrim chu a felfai a, MPF awm hma pawhin Mizorama inthlanna kalpui dan hi India ram puma felfai a lo ni sa tawh a ni. Kan inthlan chhan ber kan sorkar din thin erawh chuan sawisel a la hlawh nasa ngang mai. Eng pawlin emaw bandh an huaihawt a, dawr leh office an khar that avanga hlawhtling emaw an inti a, an bandh huaihawt chhan tihpuitlin a ni chuang silo ang deuh hi a ni.

Tunhnaia MPF leh political party hrang hrangte’n thuthlung an siam thar tih chanchin thar lamah kan lo hre ve a. He an thuthlung siam tharah hian an tawngkam takin ‘house to house campaign’ chu candidate emaw a mite emaw tan phal a ni tawh dawn a, mahse MPF Local Forum mite an tel ve ang. Tunhma khan kan sawisel fo thin a, kan duh fir luatah in tina lut lawra vote zawn (door-to-door canvassing) hi MPF hian a khap hi a fello tih hi kan ngaihdan a ni. Mipui aiawh tur, mipui rawngbawltu tur an ni a, an rawngbawl sak turte pawh tlawh thei lova khuahkhirh ngawt mai kha mipui rorelna (democracy) thuthlung kalhah a ngaih theih awm e. Hetianga in tin tlawh an inphalsak hi hmasawnna chi khat chu a ni phawt mai.

MPF a tel kan kohhran hruaitute hi politics khelmuala inkhela ram hruaitu tur kan thlan chhuah turah hian an duh fir hle mai a. Mizo pa pakhat kan sawi ang khian party tinte candidate thlan chhuah tura an duhthusam ang hi a takin thlan chhuah ni ta sela Pastor leh Missionary atan kan it leh zawk mai thei a ni. Zu in lo, hmeichhiat mipat kawnga hminghliau lo, tih vel an han ziak hi chu ram hruaitu tur kan duhtui tih a lang a, a that lohna phei chu a awm lo. Mahse, politics thli, ram hruaitu tur thlang tur kan ni a, mi thianghlim thlang tur kan ni hranpa lo tih erawh chu hriat a tha. Hetiang hi kan duh tak tak chuan Pope ang hlir hi thlan chhuah mai tur ni awm tak a ni.

Thlarau thil leh khawvel inrel bawl dan hi chu a dang em mai a. Chawh chaw rawi lutuk chi pawh a ni meuh lo. Khawvela mihring thihna tam bera mawhphurtu, khawvel indopui a chawh chhuah avanga mi maktaduai tel tak meuh meuh an thih baka Juda mi maktaduai 3 chuang suat tura thupetu Adolf Hitler-a khan zu a in ngai lova, a hmeichhe kawppui lakah a rinawm tluan thak a ni an ti. Chutih laiin Hitlera leh Nazi Germany laka khawvel humtu-a ngaih British Prime Minister Winston Churchill-a thung kha a zu heh leh a meizial (churut) heh thu khawvel hriat, British Parliament-a eptu hote’n “Kan zu bura” tia an vuah fiam thin a ni. US President lar leh a huaisen avanga khawvel indopui pumpelh tirtu John F. Kennedy te kha zu zuar chhungkua aṭanga lo sei lian leh hmeichhiat mipat kawnga tun thlenga sawi kai a ni lawi a.

Mizote hi chuan mihring hi chi hnihah hian kan then phawk ni mai hian a lang fo thin a - zu in mi leh zu inlo. Zu in mi chu mi tanpui peih, mi tana hnawksaklo leh tlawmngai tak pawh nise Mizo khawtlang nunah chuan en dawng a hlawh a. Zu in ngailomi chu eiruk hmang, mi dang nek ching leh pamham deuh tak pawh nise khawtlang hruaitu leh kohhran rawngbawltu atan kan it viau zel mai a ni. Chu ngaihdan nghet (mindset) chuan Mizo khawtlang nun hi a kaihruai nghet khawpa, a tala han tal chhuah mai mai rual a la ni rih lo. Nitin inhlawhna rate leh vawksa Kg khat man a inlaichin tlat nia kan hriat ang mai khan zu chungchanga Mizo ngaihdan hi sawhsawn lawk lawk theih a ni lovang. Hei hi a bul ber chu kohhran thiltihtheihna (influence) a ni.

MPF chungchangah kir leh ta ila, political party-te hian MPF thunuaia kun (anga inhriatna?) hi hrehawm an ti tih chu a lang reng a, mahse kohhran do zawnga tawngkam chhuah ngam an awm ngailo. India ram chhunga state pakhat, India ram democracy thuthlung leh secularism thupui pawmna hmuna kohhran ho inthlanna a an inrawlh thuk viau mai hi a dik theilo. Hetiang chiah hian Hindu pawl RSS, VHP leh Sangh Parivar pawl dang hian ti sela kan chiau hiar nasa ngawt ang chu. Mahse, kan tih chu dik vek, sakhaw dang tih chu diklo tlata ngaihdan zirtirna a chawm len kan ni miau si a.

Kohhrante tih ang hian kohhran upa inthlanah te, Presyterian Synod Moderator, Senior Exacutive Secretary, Exacutive Secretary leh Synod puipate ruat leh thlan danah hian political party-te inrawlh dawn ta sela chuan tuma’n kan duh lovang. Baptist Kohhran President leh an kohhran puipate thlan leh ruat chungchangah pawh chutiang bawk chu a ni. Mahse, chuti chung chuan kan political party-te hian MPF hi an hlau hle tih chu hai rual a ni lo.

MPF din hma tawh khan ka thianpa Police Officer chuan, "Mizoramah chuan Polling Station-a Police duty miah lo pawhin muanawm takin inthlanna kan nei thei,” a lo ti daih tawh a. Thil hi a tha kan duh a, a tha leh zual kan duh zel a - a tha e. Mahse, kan duh that leh fir luatah hian kan thikthu thlengin kan tichhe lutuk anga, kan ram mipui rorelna a pawimawh ber inthlanna hi kan vir pilh ang tih a hlauhawm. Sapho pawhin “Khawsak reltu tam lutuk chuan ei rawngbawl an tisuak bak,” (Too many cooks spoil the broth) an lo tih kha.