A NUAM TAWK

Tui a lo haw a, po­wer supply a awm a, gas an sem a, petrol a awm a, khawnvartui a awm bawk a, diesel a harsa lova, thlawhna a thlawk a, khaw kar kawng a ping lova, ruling lam ṭang tam tak tan chuan lungawi mai turah mipuite hi an ngaih theih ang.

A sapṭawnga ‘comfort zone’ an tih ang chi, mahni nuam tih tawk tawka khawsak a, thil ṭha zawk leh sang zawk beisei lem lova awm mai hi thil theih ve tak a ni. Kan nula tlangval te an duh chen chen an han meng a, zingah an duh hun hunah an han thova, an lungawi mai chuan nu leh pa tan chuan manganthlak duh ve angreng tak a ni.

Sumdawng tam tak chu miin an han dawr ṭhang deuhva, hmasawn tum lovin, an nuam tihdan tawkin an dawr an han nghak a. Lungai tlak loh deuh tum chuan anmahni dawrtute an han be bak deuhva, tih fuh tum chuan an biak a nuam deuhva, sumdawng an nih anga an mawhphurhna tak tak kha hlen chhuak lem lovin pangngai angreng takin rei tak chhung chu an awm mai a. Mahse anmahni chotu (rival) vengva deuh an lo awm ve hun hunah chung mite chu an dinhmun a hniam ve talh talh mai thin.

Khawvel hian siam thar reng a mamawh a, siam thar lo pawh ni ila thil thar a chhuah belh zel a, mahni nuam tihdan tawk ang ngawta awm reng tum apiang an che sual thin. Awmdan pangngai leh sawiselna ngai pawimawh lova a sawiseltu lam zawk apiang, ‘Midang pawhin engmah an sawi lova,’ ti ringawt chu an che fuh lo ve chawk. Mi thenkhat chuan hnawksak takin an motor te hi an han hung a, a sawiseltu apiang hnenah chuan, ‘Midang pawhin an sawisel lova, nangin i sawisel a...’ tiin an chhuahchhal let mai thin. Motor a lo tlan tam tulh tulh a, a inzui thui tulh tulh a, fimkhur tulh tulh a ngai a, kawng dipdal a pawi tawlh tawlh thin.

Hman deuh kha chuan motor kha Aizawl khawpuiah hian a kal ve mai thin kha a nia. Mahse tunah chuan kal lova din chang a tam lulai ta lutuk a, hmana darkar chanve vela kan thlen theih kha tunah chuan darkar hnih chhunga thlen lohdan te pawh a lo awm thar ta. Hmana kan dinna thinah khan a lo din theih tawh lova, hmana kan buai hauh lohna hmunah khan kan lo buai chho ta zel a. Heng lo nih chhan ber hi chu hman aṭangin kan nuam tih tawka kan khawsak vang a ni. Motor pung zel tur hisapin ruahmanna kan siam lova, motor lei thar turin motor dahna an neih leh neih loh endik dan kha kan nuam tih tawkin kan kalpui tlat a ni. Aizawl khawpuia motor nei tur hian dan khirh deuh zawk leh fet deuh zawk lo nei ila, Taxi awm thei zat tur te lo chhut uluk deuh ila, kawng tihzauh dan tur te khauh deuh zawkin lo kengkawh ila chu kan heti kher lovang.

Chhiatna leh rikrum te a awm a, chung thil chu vanduai vang te leh thil kalphung pangngai a kal sual tak avang te a ni chawk a. Chung thil chu kan dang thei lova, kan pumpelh theih loh avanga kan chunga lo thleng a ni thin. Mahse mahni nuam tawk tih ang zela kan awm avanga kan hrehawmna hi chu zawi zawia kan chunga lo thleng, kan nghah chhuah leh kan thawhrim loh rah kan seng a ni thin.

Mi hmaisa kan tawn peih loh avangin kan khawpui a hrehawm a, mi tlemte lungawi lo kan hlauh thin avangin mi tam takin kan tuar nitin a tih theih. Hnam fing zawkte chuan mipui nawlpui tawrhna tur ngaihtuahin mi pahnih khat lungawi lo chu an lungawi lohna chu a dik a nih si loh chuan an pal lui mai a, roreltu leh hruaitute chuan chutiang chu an tawrh turah an ngai mai a. Mahse keini chuan chumi tuartu bik nih chu hlauvin kan nuam tih chin tawkin ro kan rel fo thin. Roreltu chuan dik takin ro a rel ang a, dik taka a rel chung pawha mimal tuemaw duhdan nen a inrem loh avanga a rorelna dik hrethiam lotu thinrimna chu a tawn tur ve rengah a ngai tur a ni a. Chutianga tanna dik lova tang chung pawha hrethiam duh lotute chu an dik lo a ni tih hriattir tum zawk tur a ni. Chuti ni lova, ‘An thinrim miau sia,’ tih ngawt mai zel chuan kan inrel hnawk tawlh tawlh ang.

Kan ram hi nuamsa taka tuma pawi sawi hauh lova kalpui chungin engtikah mah ram nuamah kan siam lovang. Mi dik lo leh mi mawl, thil hrethiam lote vuivaina zawng zawng pumpelh chunga ro tha reldan hi khawvelin a hre ngai hek lovang. Mi thenkhat hi chuan anmahni chan tur bak chu engmah an ngaihtuah lova, an duhdan bak an ngaihtuah lo. Chung mite laka tlatlum taka awm reng chung si a ram nuam tak thlen tum chu thil tih theih loh a ni.