HOME 2

Kar hmasa lam khan zu leh ruihhlo dona kawnga sorkar leh kohhran lamin an tihtur an tih tawk loh avanga ruihhlo ngai leh zu ngawlveite enkawlna kawnga tlakchham kan neih nasat ziate, chumi avanga a hman hmanin hetiang lama harsatna neite enkawlna atana ‘home’ an siam dan te. Mizoram mihring awmzat ngaihtuaha hetianga enkawl ngai leh enkawlna hmun a awm tam dante leh chuti chunga sorkarin hetiang enkawlna hmun khuahkhirh leh kaihhruaina tur dan a siam loh vanga harsatna kawn tawh mekte kan rawn ziak tawh a. Tunlai kan boruak enin ziah zawm a la tul tlat mai.

Kum 1984 aṭanga ruihhlo avanga Mizorama thi an awm tih chhinchhiah a nih aṭang khan kumin July thla tawp dawn thleng khan ruihhlo vanga thi hi mi 1,444 vel an awm tawh a (chhinchhiah hmaih an tam hle-in a rinawm). Chutihlai chuan sorkar chuan ruihhlo khap leh dona atana dan khauh tak siam chu a uksak lemlo hle a, kohhran nawrna nat em avanga kum 1995-a zu khap burna dan an siam hnu kum 20 pelhah nikum (2016) khan ruihhlo dona dan hi a siam ve ta chauhva. Chu pawh chu a taka hman a la nilo emaw ni, a rules an siam leih leih chauh a nih hmel e.

Chutihlai mek chuan kan Chief Minister lah chuan Zirtawpni-a central YMA huaihawta ruihhlo chungchanga inrawnkhawmna-ah khan, “Tuna a lan danah kan dan neih lai chu a zuartu leh tawlhrutute fuihpawrhtu a ang lek lek zawk,” te a ti a. Ama hova nikuma an dan siamte kha a hre tawhlo nge an siam ngei kha tha a ti tawk lo tih pawh hriatthiam a har. Ruihhlo vanga mante chu ukilte’n din sak lo tura ngen te a sawi mawi a, chubakah dan siamtu pawla House Leader hian, “Ruihhlo hi dan zawh famkima do hleih theih pawh a ni lo a, ruihhlo zuarte pawh rei hrem an ni theilo,” te a ti a ni awm e. Hotu ber aṭanga beidawng leh dan pela chet duhna kan neih dan aṭang hian kan hlawhchham sa chu a ni mai awm e.

Nikuma dan siam The Mizoram Drug (Con­trolled Substances) Bill, 2016 ah khan sorkarin ruihhlo ngaite enkawlna hmun a siam tur thu leh a kaihhruaina pawh duan a nih tur thu a ziak a. Mahse, tuna kan ram hruaitute ngaihdan leh thusawi dan han hriat hi chuan tih tak takna hi a tlem hle ni hian a hriat a. Ukil te’n din sak talo se ruihhlo vanga mante thubuai hi ngaihtuah theih a ni kher lovang a, an chanvo kan chhuhsak khan Court chuan dan hmangin a chhuah awlsam zawk ngei ang. Kan ram hruaitute pawh hi a chang chuan mawhphurhna neilo, social network a naupang mawl phul satliah rak mai mai ho ang maia thu sawi mai mai ching an awm a. An hriatna tlem an mualpho rualin thil an zir peihloh zia an puang zar bawk thin.

He dan siam thar hi a taka hman lo ni dawn ta sela tihtur hmabak a la tam hle mai. Sorkar hian ruihhlo ngai enkawlna hmun a neih chhun Sethawn ami khu a khar tawh niin an sawi a. Chuti a nih chuan Tawngtai Bethel Camping Centre (TBCC) chu CYMA leh YMA branch thenkhatte’n an hman tangkai ber leh nasa taka tanpuina an pek a lo ni bawk a, ruihhlo ngai an mante enkawltu atan an chhawm zui mai dawn em ni ang? ‘Nge kohhran thenkhatin an dinte leh mimal thahnemngai te, thahnemngaih vang ni lem lova sum hmuhna leh eizawnna atana din ‘home’ ah te hian an dah zel mai dawn?

He’ng zawhnate hi fel taka chhang tura sorkar hi a inbuatsaih tak tak a nih loh chuan kan dan thar siam pawh hi a takin kan hmang leh hlei thei pawhin a rinawm lo. Ruihhlo dona dan kan siam a nih chuan a hremna na tawk tak siam tur a ni a, ruihhlo leh ruihhlo hmanga sumdawngte man dan tur fel tak leh a hrem dan tur siam a ngai a, ruihhlo kawl avanga man bakah ruihhlo ngaite enkawl zui dan tur a ngai a. Enkawlna tur hmun ruahman a ngai a. Chutianga ruihhlo ngaite dah khawma enkawlna hmun tur enkawl dan tur chuan dan pangngai a nih loh pawhin dan tesep leh inkaihhruaina siam a ngai a. Duh duha a dintute’n an kalpui ngawt a thiang lova. Sorkarin a din a nih pawhin chutiang tho chu a ngai dawn a ni.

Ruihhlo do kawngah hian sorkarin a tih tur a ti ve bawk na-in Mizorama a hluar dan leh kan thalaite zinga ruihhlo ngai an tam dan en hi chuan a tihtur a tih kawngah hian duhthawh a na hle mai. Hetiang hote kawng dika hruai tura tha thawh nasa awm tak Kohhran pawhin tha a la thawh nep deuhva, BiakIn leh Chawlhni Kristian kan tam a, kan Kohhran hruaitu zingah phei chuan an tam leh zual. Chhandam ngai an nih piah lama chhanchhuah ngai kan thalai sang tel buaipui ai hian mahni intihlumte kohhranin vui tur nge vui loh tur tih velah hian kan inhnuk hnawk rei tawh deuh chu a ni. Zu dova, zu dawr kawta ni tla van vuaia pawnler langsara thu peih, dai kil kara chhamdam ngai leh chhanchhuah ngaite dap chhuak peih silo kohhran hruaitu kan ngah mah mah a ni.

Kan Mizo thalaite zinga ruihhlo ngai tam lutuk hi Chakma thil kan buaipui aia nasa-a buaipui ngai a ni. Home hrang hranga awm tam ziate, home-a dahloh la tam tho ziate ngaihtuah hian mi puitlinglo tur leh khawtlang tana hnawksak an tam tih a chiang a. Kan Mizo nulate tana pasala neih tlak leh neih ngam loh tur heti zat kan nei hi a la pawi thui hle dawn. Hnathawka chhawr tlak loh, khawtlang tana hnawksak, inchhung khur tana tihkhai leh ven reng ngai heti zat kan kawl reng a. Mihring dam chen pangngai aia rei dam lova thi zawih zawih an ni a, HIV/AIDS nen a inlaichin hnai leh nghal. Hetiang a nih chuan kan hnam hi kan dingchhuaklo mai pawh ni lovin kan ral thum hnai mai ang tih a hlauhawm.

CYMA-in ruihhlo tam lutuk leh a ngai tam lutuk an vei a, kan ram hruaitu lu ber leh kohhrante thlenga kohkhawma hma an la hi a lawmawm hle mai. Anni hi awmlo phei sela chuan kan chhe tawh ngawt ang a, tunlaia ruihhlo an do dan lah chu dan chhungah, mimal zalenna leh chanvo hrethiam chungin an kalpui a, fak tlak an ni. Chutihlai chuan sorkar hi CYMA-in wheelbarrow ang maia a nawr kal tur emaw a la inti fo niin a lang thin. Kohhran hruaitute pawh hi a nuam chin, a nalh chin leh a fai chin ringawt ni lova, kan rama ruihhlo kan buaipui dan tur hi ralpui phiar a phiar (war-footing) a beih a ngai tawh tih hria a, a taka an penchhuah a hun ta tak zet a ni. Sorkar leh kohhran kan lo thlir reng e.