SORKAR KUT CHHE BIK

A rei deuh tawh. Assembly zawhna chhanna pakhat kha SENHRI (kartin chhuak)-a editor ka nih ve laia kan hotupa (publisher) khan a lo chik viau mai a. Sericulture department-in an demonstration farm-a maimaw ril an thar chhuah zat kha khaini bur pakhat a leng tawk chiah niin a sawi a; a hun lai khan chik nachang ka lo hre lem lo na a, a chhut dan kha a dik hmel. Hmasang Greek thawnthu-ah chuan King Midas-a’n thil a khawih tawh phawt chu rangkachakah a chang zel an ti a. Mizoramah hi chuan sorkar inrawlhna leh a khawih ve tawh phawt chu rangkachak pawh ni se, a lemah a chang zel mai a ni awm a sin!

Mizoram sorkar hian sum lakluh ve theihna tur (sumdawng a hlawkna nei thei tur) department a neih zingah Printing and Stationary, Power & Electricity leh Transport department hi a langsar zual an ni awm e. Anni bakah hian public sector unit (government undertaking) an la awm leh a. Zoram Industrial Development Corporation (ZIDCO), Mizoram Agriculture Marke­ting Corporation (MAMCO), Zoram Electronics Development Corpo­ration (ZENICS), Mizoram Food and Allied Industries Development Corporation (MIFCO) leh Zoram Handloom and Handicraft Deve­lopment Corporation (ZOHANDCO) te an ni.

He’ng corporation-ho hi sorkar ni lovin hlawkna uma sumdawng tur atana sorkarin dan tlawhchhan a a din an ni a. Sorkarin sumlu (share capital) a pek thin bak chu anmahni a inrelbawlna senso thawh chhuah piah lamah, sorkar aiawha sumdawng a, sum thawkchhuak tur an ni. Mahse, sum thawhchhuah chu sawi loh ‘sumthuninu’ (white elephant)-ah an chang zo ta vek a nih hi. A hma a kan sawi ‘Midas touch’ an tih mai letling chiah a, Esopa thawnthu a rangkachak hlir a tui thei vatawk ni thin, an talh apianga vatawk dang ang mai an lo ni leh ta zel ang kan ni zawk. Chutiang chiah chuan sorkar department – Mizoram State Transport, Printing and Stationery leh Power and Electricity department-te hi an awm mek a ni.

Tunhma aṭangin Mizoram sorkar hian hetiang sorkar aiawha sumdawng tura a dinte hi an hlawk chu sawi loh, an hloh reng avangin a lo buaipui fe tawh thin a. Planning Commission khan titawp turin an lo tih tawh bakah Mizoram sorkarin a zirchiang tura helam thiam ‘firm’ a rawih Deloitte chuan ZOHANDCO, MAMCO leh ZENICS-te chu thiah ni se tiin a rawt a. MIFCO chu mimal kuta hlan (privatise) ni se, ZIDCO erawh chu a ruangam siamthat a nih chuan a kal ngai a la kal thei-ah Deloitte hian a ngai a ni.

He rawtna zulzui hian kum 2015 khan khatihlai a Finance Minister Pu Lalsawta khan thiah turte, mimal kuta hlan turte leh a ruangam siamthat tih rawtna hi a pawm a. A duhdan hi Cabinet pawhin an pawmpui ngei a, mahse, a taka tihpuitlin zui pakhatmah a awm ta lo a nih kha. An sorkar khan a takin an ti lo nge, anmahni thlaktu (2008) MNF sorkar khan a thiat leh ta zawk tih pawh kan hre thuk lem lo. Sorkar apiang hian minister nihna chang lote tihlungawi na’na hetiang corporate body-a chairman dinhmun a sem diat diat bak hi hma kan la sawn theih si loh avangin mithiamte rawtna hi tihpuitlin a ni ta lo a ang viau mai.

Corporation/ public sector unit leh sorkar department a sumdawng thei tura dinte reng reng hi a thawkte sorkar hnathawk anga enkawl vek an ni hlawm a. Sum thawhchhuah lam ai chuan an dinhmun leh hlawh tihthat kha an vei zawk mah a ni ang, thawhchhuah neih chu sawi loh, sum hlohvin an kal reng mai. Mizoram State Transport (MST) te hi ngaihtuah ta ila, an hloh reng chhan hi mimal enkawl ai a bus chuan man an tihtlawm vang tiin an insawi thiam a. Han ngaih mai a dik awm tak a nih laiin hman a Public Accounts Committee (PAC) report pakhatah khan MST bus lei thar kha kum khat chhungin a ke vawi 46 thlak a nih thu tarlan a ni. Khatiang a nih chuan hlawk ngaihna a awm lo.

Mimal-in khaw kar kawnga bus an tlantir a an hlawk lai a an hlawk ve loh chhan ber chu thawktu hlawh atana sum an hman tam em vang a leh eirukna a nasat vang a nih ngei a rinawm. MST leh Power & Electricity department-te hi corporation a leh (convert) an sawi fova, lo ti ta pawh ni se, an hloh reng thovin a rinawm a. Sorkarin share capital hmanga a chhawm nun’ reng a ngaih chhung chuan ‘sumthuninu’ an nih a bang chuang lovang. Chuvangin mimal kuta pek (privatise) a nih loh pawhin, hnathawk ban then leh an hna tam ber mimal/ company thawhtir (outsource) a fuh berin a rinawm. Hmanah khan ZENICS hian cable television an ti ve a, an hloh ral thak niin an sawi. Mimal enkawlte’n an hlawkpui hle tih kan hre bawk si.

Tourism department leh MIFCO te pawh hi sorkar laipui sum hmangin an hnathawhna tur ruhrel (infrastructure) siam vek a ni a, chuti chunga hloh reng a an kal mai hi a dik thei lo a ni. Kum 2003 kha a ni ta awm e, MIFCO te ang sum hmanga tanpuina pe thin horticulture consortium hotu kha khatihlai a Rajya Sabha MP nen khan Delhi-ah kan va hmu a. Ani chuan MIFCO enkawl Chhingchhip a thei tur sawrna tur hmanrua an pek chu chhuatphah (carpet) leh lirthei lei na’n an hman thu leh pek an tum tawh loh thu min lo hrilh a. “Engtin nge lirthei leh chhuatphah khan thei tui an sawr the lul ang ni?” a ti hmiah mai.

Hloh reng leh sorkarin mipui sum hmanga an inenkawlna tur pawisa tam tham tak a pek reng ngai department leh corporation-te hi tihdan dang ngaihtuah a ngai tawh hle mai. Tunlai khawvel a mimal enkawl printing press-te’n offset khawl leh printing technology tunlai ber ber an hman tawh hnu hian Printing & Stationery department hi a din reng a tul tawh lo. Sorkarin thil chhut tur a neih pawh mimal hnenah a pe mai ang. Hetiang sawi lai hian sorkar officer pakhatin, “P&S ho chu hrukpuan man tlawm tak tih hriat hi to deuhva min leitir an tum zel a,” a tih kha ka la hre reng bawk.

A nihna takah chuan Printing & Stationery te hi tunlai khawvelah an tangkaina a tawp tawh a. Sorkar (GAD emaw) hian sorkar department hrang hranga sorkar hnathawkte hnena an pisa mamawh an lei ngeina tur thupek hi titawp sela, pisa/ officer-te ‘open market’ aṭanga an lei phalsak ta mai zawk se la. A that dan (quality) leh a leina man kha fel takin bituk mai zawk se a fuh zawk a. Sorkar thil pawimawh chhut (print) pawh hi mimal enkawl thil chhutna hmunah a tih theih vek satliah pawh a ni lo, a chhutna khawl an nei tha zawk tawh a, mimal kuta hlan (privatise) hmiah hi a fuh ber a ni. Sorkar department-te’n thil pawimawh chhut duh an neihin mahni kutkawiha eizawng (entrepreneur) te hnenah an pe vek tawh ang a, mahni kutkawiha eizawngte kuta sum lut zawk hi a tha em em a ni.

Hei chauh hi a la ni lo cheu. Thil mak deuh pakhat chu Mizoram sorkar hian state chhunga hna rawn thawk state pawn company leh sorkar laipui hnuai amite hi a enkawl thiam lo bik em ni aw, tih ngaihdan awm tlat hi a ni awm e. National Highway-te hi Mizoram PWD-in an enkawl a a hna an vil ve hma khan kan thenawm state, Meghalaya-ah te chuan an lo kalpui tawh thin a. An kawngpuite kha a tha kan ti hle thin. Border Roads Organisation (BRO)-in kawng siam hna an thawh pawh hi Mizoram chhung aiin state dang ami kan hmu tai zawk hle thin a nih kha.

Kan sorkar hnuai-ah hian BRO thawh pawh a chhe bik riauva ngaihna nghet tak a awm tawh a. Meghalaya chhunga kawngpui an siam aia Mizoram a siam a tlo lo bik ni a ngaihna awm hi tihtawp a tul khawp mai. Tualchhung emaw pawn lam aṭanga kawng siam hna rawn thawk contractor-te kawng siam tam ber hi fur khat daih lo, thla hnih/ khat leka chhe leh em em zel a ni hi thil felhlel thuk tak a awm vang a ni tih a chiang viau mai. Kawng siamna atana lung hman hi a chang tha lo a nih a, duhthusam a lung chang tha he ramah hian a awm lo a nih chuan state pawn ami lung chang tha hman mai tur a ni a, kawng siamna tur senso chhut laiin telh mai tur. A dang zawng zawng deuhthaw state pawn aṭangin kan la tho tho.

Tun hnai a NHIDCL-in Mizoram chhunga kawngpui zauh hna an rawn thawh dan bawrh bawrhte hi kan sorkar (leh mipui) an zah lohzia tilangtu chiang takah a ngaih theih a. Hetiang a kan ramngaw tichhia a, nungchate chenna tichereu leh lui a sangha leh nungcha dangte thih buaih buaih theihna khawpa an leivung paih dan an duhtui loh danah hian mipui min palzut a, sorkar pawh engahmah an ngai lo tih a lang chiang hle. Ramngaw leh a chhunga nungcha awm humhalh duhtute nasa takin auchhuak lo phei sela chu engang taka chhiatna nge an thlen zel ang tih ngaihtuah ngam pawh a ni lo.

NHIDCL leh state pawn leh chhunga contractor tam ber hian state sorkar zuam bik an nei em ni tih hi zawhna lian tak a tling a. A bik takin kan PWD changtu minister-te leh department hotute nen hian (eng sorkarah pawh) an inkawm ngeih bik lutuk a, an duhthala chet phalsak an ni a, chuvang chuan kan ram chhunga an hnathawh reng reng hi a chhia-in a tlo ta lo bik a ni thei mai ang em tih hi ngaihtuahna-ah a lut ngut ngut mai. Kan sorkar inrawlhna reng reng, rangkachak a chang lova, vai thirchhe khawn khawm ang mai a a chhuak zel mai hi bengsika ngaihtuah chu a ngai ta a nih hi le!