PRIVATE HOSPITAL

Mizoram, a bikin Aizawl khawpui-a mimal enkawl Dam­dawi In te hian kan sorkar Damdawi In tlemte hi an chhawk nasa hle a; mipui tana an tangkaizia hi kan hre dawn chauh a ni. Mihring kan pung zel a, hospital khum awm zatin min zolo nasa tawh a; private hospital-te hi la awmlo sela chuan kan buai dan tur hi namenlo tak a ni ang. Heti chung hian phailama inentir leh inenkawl hi an la inzui nguah nguah reng thova. Hmasawnna tur chu kan la ngah mai. Kan private hospital-te hi hei ai hian mipuiin kan la chhawr tangkai zawk thei a; chumi atan chuan sorkar inrawlh vak ngai lovin private hospital enkawltu leh neitute hian tihtur hmabak an nei a ni.

Hman deuh tawh khan pa pakhat titi thiam tak Aizawl-a private hospital hlun ber pawla hun engemaw chen a awm hnu-a lo chhuak hlim hi kan kan’ a. Min hrilh hmasak ber chu, “He hospital-ah hian ka lut leh dawn tawhlo. An hotupa Dr…… ‘Good Morning’ man a to em mai. Zingah min rawn hmu kual a, en pawh min en mang si lovin ‘Good Morning’ a rawn tikual ringawt a; ka bill ka’n en chuan tuktin Rs 50/- zel ‘good morning’ man min lo bill chu lo niin,” tih a ni. Hei hian ngaihtuah a tithui hle a; a hnu-a mi sawi ka hriat zui tak zel bawk avangin keini chuan tun thlengin he hospital hi kan hel ta zel rih a ni.

Eng pawh tiin eng hna pawh hi thawk ila, ‘hna thawktu chu hlawh hmu tur a ni’ tih hi englai pawhin a dik reng a, mahse sum leh pai vang ringawt leh sum um lutuka hnathawh erawh chu thu dang daih a ni. Sorkar hna kan thawh chuan kan thawh hlawh chu kan la tur a ni a; mahse, kan sorkar hna thawh kha sum siamna’n ringawta kan ngaihtuaha mipui leh sorkar rawngbawlna lam kan hlamchhiah phawt chuan kan hmabak chu eiruk a ni mai. Chutiang tho chu private hospital enkawl hna hi a ni.

Hospital enkawl leh hospital pantu damlote enkawl hna hi rawngbawlna (service) a ni a, sum siamna (industry) a ni lo. Mizoram chauh nilo India ram leh khawvel hmun dangah pawh health care service a nihna bosal a health care (damlo enkawl hna) hi sumdawnna (health care industry) anga kalpui ta an awm ta fo mai a. Hei hian medical profession hmai a timawk nasa hle a; hetianga an kal zel chuan an zahawmna thlengin a la tuar ngei dawn a ni. Damlo enkawl hna-ah chuan hospital pantu reng reng hi damlo enkawl ngai (patient) an ni reng tur a ni a; damlo ang ni lova anmahni dawrtu (customer) anga an ngaih hunah chuan ‘health care’ hian a tum a hloh anga, service ni lovin industry angin an kalpui a ni tawh dawn a ni.

Hemi rual hian damlote laka awka leh chetzia thlenga a enkawltute nun dan a pawimawh. Hetianga kan sawi hian doctor leh nurse an vin leh vin loh lam kan sawina a ni chiah lo. A hunah chuan doctor leh nurse te hi an lo vin deuh thei a, hriatthiam chin pawh kan neih a tul a, khauh deuh pawh a ngaih chang a awm ngei ang. Ama’rawhchu, ngaihdam a ngaihzam harsa khawpa damlote leh an chhungte chungtlak leh damlote ngaihthah (criminal negligence) bakah phawsawlh lutuka damlo enkawla ngaihsaklo mai pawh nilo, nunna ngaihlulo ni-awm taka che-a tawng cheh thinte hi chu tuma’n kan ngai ropuilo tih hi damlo enkawltute hian an hriat a tul khawp mai.

An enkawlte hi ramsa emaw ran emaw an ni lova; an mihring pui, Pathianin amah anga a siam an ni tih an hriat reng a tul a. An hnathawhna hmunah hian hotu leh lal an ni lova, rawngbawltu an ni tih a taka an hriat reng a ngai a. Tidamtu laka damlovin an beisei fo chu, “Thu chauh sawi la ka dam mai ang” tih hi a ni tih an theihnghilh loh a pawimawh ngawt mai. Mihring natna leh dam theih dan hrelo mipui mimir chuan a zira zir chhuak tidam theitu-a an ngaih doctor leh nurse te hi an dah sang em em mai a; an thlamuanna tawngkam khat lek hian an rilru chauh nilo an taksa-ah pawh damna a thlen chawpchilh thei a ni.

A pawimawh berah chuan hospital hna, hospital-a thawkte hna ber chu damlo enkawl a ni tawp mai a. Saptawng chuan ‘patient centric’ a ni tur a ni ti ila a ni mai awm e. Hospital-ah hian damdawi zawrhna Pharmacy te, bill dawnna te leh thildang tam tak a awm a tul ngei mai. Inrelbawlna fel leh tha a pawimawh bawk a, chutih rualin Mizorama kan private hospital tam berin an la neih loh hospital atan liau liauva sak In te an neih vek hun a nghahhlelhawm hle. Chutianga hospital tur atan bika sak Ina kan inenkawl hunah chuan wheelchair-a damlo nawr chhuk leh nawr chhohna (ramp) te siamin, khai chhohna khawl (lift) te nen changtlung takin thil a kalpui theih ang a. Chu’ng zawng zawng pawh chu damlote hmakhua vek tur a ni. Rawngbawlna (service) changtlung leh tha nei tur chuan a man kan pek a ngai ngei mai a; a tih chhan bulpui ber erawh chu damlo enkawlna atana a tul avang a ni tur a ni ang.

Mizorama mimal enkawl hospital-te hian thawhhona tha tak nei sela hmasawnna pawimawh tak pakhat a tling ang. Thiamna bik, buaipui bik leh zir bing bik (Specialized-na) neih theih hun a nghahhlelhawm hle a, hei hi a hospital theuh tan leh mipui tan a tha hle ang. Entirna’n hospital pakhat khan Cancer chauh buaipui sela, a dang chu nau neihna bik leh a behbawm enkawlna (Maternity Hospital) ni ta sela, rilru lam enkawl ngaite enkawlna (Mental Hospital), chutiang zelin. Cancer enkawlna hospital-a khum an indaih loh chuan a bul hnai hospital-ah an dah anga, a enkawltu doctor-in a tlawh mai thin ang a, chutianga inpei-zawn mai chu a heksaklo zawk bawk ang.

Doctor bakah hian nurse te pawh hi enkawl bik neia kalpui a hun tawh khawp mai. An zir lai chuan damlo hrang hrang enkawla thil hrang hrang an thiam a tul a. An thawh hnu-ah hi chuan ram changkangte tih angin specialized-na neia an kal hi a fuh zawk. Entirna’n Operation Theater a thawk chu hmun dangah pawhpen loh ni se, Cancer enkawl-tu a nih pawhin chu hlir chu ti mai sela anmahni-a thiamna bakah an tawnhriat (experience) kha kan chhawr tangkai tel dawn a ni.

Tunlai hian mimal enkawl hospital-a awmte’n an awm man a to lutuk tia an sawi kan hre ta fo mai a. Phailam hospital thenkhata doctor thenkhatin a tullo pui natna hriat theihna khawl (diagnostic equipment) hmanga en tura an ti chiam thin leh tul lem lova damdawi an chawh chiam thin nia sawi ang te hi kan lo ti ve reng tawh a ni thei a, a rate a to hrim hrim a ni thei bawk. Kolkata hospital hrang hrangah pawh khuan investigation tih man hi a inthlau em em zu nia. Chutiang chuan Mizorama mimal enkawl hospital thenkhat hi chuan sum an um lutuk ve tawh a nih hmel e. Mihring puite rawngbawltu an nih an inhria a, Sorkar enkawl a ni emaw, mimal enkawl a ni emaw, kan hospital hrang hrangte hi an tanruala inhriatthiam tlanna nena an kal a, damlo hmakhua ngai pawimawh bera an neih phawt chuan kan natna tam ber hi Mizoram chhungah kan endikin kan enkawl thei dawn a. Mizoram pawna inenkawlna atana sum tam tak luang chhuak hi nasa takin kan ti tlem thei ngei ngei dawn a ni.