KAWNG CHHIA

Mizoram hmun hrang hranga kawng a chhiat lutuk avangin Mizoram Truck Owners Association (MTOA) leh Mizoram Truck Drivers Association (MTDA) chuan thukhat vua-in vawiin aṭanga ni thum chhung chu chet chhuah loh an rel ta a. Mizoram pawn aṭanga truck lo lut turte pawh dan vek an tum thu an sawi. MTOA leh MTDA member-te hian kawngpui chhe lutuk hi an tuar nasa hle a, an tawrhna hian mipui-ah a nghawng na hle bawk a. An truck te a tlo loh phahin siam a tul ngun phah a, an mangangin an tihtur ni lemlo kawng siam hnatlangte an han kova, pawisa pawh cheng nuai tel an seng tawh a ni.

Hetiang a nih mek lai hian khawthlang lama Maxicab tlan thinho pawh kawng chhiat lutuk avangin an chawl ta tawp mai bawk a. Mi tam tak zin veivak duh an zin thei ta lova, chhungte damlo awmpui tura kal duh ngawih ngawih pawh an kal thei tlat lo. Maxicab hnunga kawngpui chhiatzia ziaktu hrem ai kha chuan sorkar hian kawng hi siam tha sela chuan kan zavai atan a tha zawk ngei ang.

Mizoram mipui ei ber buhfai kan chawk luhna kawngpui ber Bairabi leh Rengtekawn inkar kawng heti em em mai a, a’n chhia hi chu sorkar, a bikin PWD hi a muthlu a nih loh chuan mipui min zah lovin min thamlo lutuk tihna a ni. Hman kumah rel kawng siam that a nih avanga ‘Mega block’ an tih mai a awm dawn khan khati khawp khan sorkar a inbuatsaih lawk a. Guwahati lam

aṭangin truck hmangin sum tam tak sengin buhfai an zu phur a. Tunah kan kawtkai ngeia buhfai rawn thleng phurh chhuahna tur kawngpui heti khawpa hlamchhiah hi a ni mai hi chu mipui zah lohna leh tham lohna a nih loh chuan sorkar a muhil a ni ngei ang.

Kan buhfai chawkluhna kawngpui hi tun hnai khan PWD Chief Engineer-in a zu tlawh a, lung lakna quarry kal pawhna kawng chhiat vangin lung lei tur an hmu zolo niin a sawi a. A pawimawh an tih chuan hmun dang ami an lei thei ngei ang tih a chiang. Kawngpui a chhe em em a, a kawngpui a siam ta lo chuan chhuanlam siamah an ramtang ta chiam chiam a ni ber a. Chhuanlam an siam tam a, mipui erawh chuan kan awih sak tawh meuhlo. Bairabi leh Rengtekawn inkar kawng chhiat chhan niawma PWD insawifiahna, sorkar thuchhuaha lo lang tlem te hi i’n chhiar teh ang -

“Mizoram PWD chuan Rengtekawn - Bairabi Road siamtha tura MTOA leh MTDA ngenna chungchang thuchhuah siamin nitin chanchinbu Aizawl Post ni 04.09.2017 a lo lang, Rengtekawn - Bairabi kawng hi kumin March thla aṭanga tun thlenga ruah sur a tam avangin nasa takin a chhia a, motor tana kal harsa khawp alo ni hi MPWD chuan pawi a ti takzet ani an ti a. Rengtekawn - Bairabi kawng hi siamthat ngai ani tih hria in Sawrkar ah estimate pawh siam a thehluh a ni a. Rengtekawn - Zero Point hi NEDP sum hmanga siam that turin estimate theh lut in sanction nghah mek a ni. Meidum - Zero Point siamthatna turin Sawrkar Laipuia Highway Ministry in sanction a pe tawh a, mahse vawiin ni thlengin Ministry lam aṭanga tender tihfel anih loh avangin hna tan theih a ni lova. Bairabi - Meidum inkar Sunshine Overseas hnathawh hi a zawh hma a fur in a nan tak avangin thawh tawh pawh nasa takin a chhe leh a; Sunshine Overseas hian anmahni senso a siamthat leh turin hma a la mek a. He hna atan a estimate hi revise a ni lova, revise tumna pawh a awm bawk hek lo, an ti.

“Rin loh takin kum dang zawng aia fur a rei avangin Rengtekawn - Bairabi kawng hi kumin July thla vel aṭang khan nasa takin alo chhe zual ta a. MPWD Kolasib Division chuan theihtawp chhuah a siamthat hna thawkin Chief Engineer leh Superintending Engineer pawhin a hmunah tlawhin siamthat dan tur an relpui a. Mahse vanduaithlak takin quarry kawng a chhiat avanga quarry aṭanga lung phurh chhuah hleih theih anih loh avangin mamawh ang hmanrua hmuh theih ani lova. Silchar aṭang leh hmuh theihna ang ang

aṭanga lung dap in theihtawp chhuah a siamthat hna thawh zel a ni. Tunah chuan Rengtekawn aṭanga Zero Point chu a ziaawm deuh tawh a. Harsatna dang a awmloh a, lung hmuh theih anih chuan Zero Point aṭanga Bairabi pawh nihnih/thum chhung chuan harsa vak lova truck kal theih tura siam theih beisei a ni an ti a. Hetiang dinhmun harsa taka kan awm avang hian MTOA leh MTDA te pawhin lo hrethiam a, mipuiin harsatna kan tawh loh nan Bairabi aṭanga buhfai phur chhunzawm zel turin PWD chuan an ngen a ni.”

He kawngpui ngei mai hi MTOA member hovin cheng nuai 3 bakah an truck te thawhin an zu siam nual tawh a, hemi tum hian PWD hnathawkte pawhin an hnatlan pui ve nual a ni awm e. Tuna kan dinhmun hrim hrimah hian kawngpui hi hmun tinah a chhia a ni ber a, a pheuh pheuhva lung hmanga a khuar nasa zual lutuk han hnawh zeuh zeuh bak chu kawngchhe siam tura tanlakna tak tak hmuh tur a awm lova, mi hnatlang lo tawiawm ve hi sorkar hian a tel vena tur tawkah a ngai a ni ta ber mai. Tun ang hun kawngchhiat lutuk laia kawng an siam loh chhan chu ruahtui tlak vang a ni leh mai a. Khua a hul veleh hian an bung nghal chat em tih erawh chu kan lo en kar ang.

Kawng chhiat thata mawhphurtu ber chu PWD hi a ni a. Engineer-in-Chief bakah a hnuaia Chief Engineer rual, Superintending Engineer thahnem tham tak, a aia tam Executive Engineer leh an hnuai leh a SDO leh JE rual nen hi chuan Mizoram te ang state liana EE bial tiat lek hi chu enkawl hneh hle awm a nih lai hian chutiang chu a ni der si lo. Kan kawngpui chhiat em em chhanah leh kan lei (bridge) chim ta fo-ah hian a mawhphurtu chu mipui-in kan hriat ngei a rinawm. Ka hriat pakhat PWD SDO patuai ang reng tak chuan cheng nuai 25 chuangin inhmun a lei a, chawl hauh lovin concrete building a sa nghal char char a, car man to fe a lei thei tho bawk. A hlawh aṭanga a sak vek a nih chu kan ring hauh lovang. Hei hi a kaikuang pawimawh zinga pakhat chu a ni thei ngei ang.

Ministry apianga a lal ber (Chief Minister)-in a hna chanpual atana PWD a hauh chat zel hian chhan thuk tak a nei ngei ang a. Chutih laiin kan kawngpui chhe em em leh kan lei chim leh thin ngaihtuah hian kan PWD hotute mimal insak ropui leh mawizia, sum an sen hnemzia hian inzawmna a nei thuk hle bawk ngei ang. Kan kawng sialna leh siamthatna tur hi kan ram hruaitute leh PWD hotute inkar velah hian a bibova, kawngpui tha ai-ah mimal in tha pui pui kan hmu ta teuh mai a ni thei em? An tu leh fate zirna hautak ber bera an kaltir theih dan leh thil dang sawi tello pawhin.