CENTRAL LEH STATE

Kan ram hruaitute hi an ‘piangthar’ kan ti dawn nge an harh chhuak ve ta kan ti dawn tih chu ka hre lo na a, an piangthar tlai viau a, a pawi lo turah erawh chuan i ngai teh ang. Tunlaia social media lama mahni ngaihdan huai tak tak a sawi peih em em, thil chhut chiang peih hauh lo ang hi tunhma deuhva kan ram hruaitu atana kan thlanchhuahte kha an ni thin a. An duh leh duh loh chu sawi loh, a tha leh tha lo pawh ngaihtuah a chik peih lo leh politics a hamthatna an chan theih leh theih loh tur ringawt ngaihtuah thina puh an awl khawp mai.

Mizoram University din tur chungchang a, Assembly inkhawmna a kan aiawha kan thlanchhuahte thusawi leh inhnialna kha uluk takin kan lo ngaithla ve thin a. A tirah chuan khatihlai a sorkar Congress lam hotute khan central university kha an duh loh thu leh state university an duh zawk thu kha an sawi a. “Jawaharlal Nehru University (JNU) ang mai khuan ‘hotbed of politics’ (politik firfiak inzirtir chhuahna hmun)-ah a chang mai dawn a ni,” tiin hruaitu lawk tak khan a sawi a nih kha.

A taka university nei thei mai tura boruak a awm hnu khan eptu lam (MNF) MLA zinga an thiampuipa tura ngaih, doctoral degree nei meuhte pawh khan rorellai Congress hotute rilru inthlak ta dodal hrim hrim tur khan state university an sawimawi leh chiam thung a. MNF hotupa Pu Laldenga’n hun rei lote a sorkar chhunga Mizorama university din a nih theihna atana sorkar laipui a rawtna a siamte kha an chhiarin an hre hauh lo tih a lang chiang khawp mai.

Pu Laldenga khan a sorkar laia Human Resources Development Minister Pu P.V. Narasimha Rao hnena a lehkha thawnah chuan Mizorama university din tur chu Mizo mipuite beisei (aspirations), ram dang zirlaite pawhin an pan tlak tur leh a hlawhtlinna tur leh sorkar laipuiin a enkawlna senso a tum vek tur ni se, tiin a ziak a. Sorkar laipuiin a din leh enkawlna senso a tum vek university chu central university chauh a ni a, chu chu University Grants Commission (UGC) kaltlanga sum mamawh ang diktak chu pek a ni.

“Kan thuneih ve theihna tur” tihte, “Mizo ngeiin a hna pawimawh leh sang ber bakah hnathawk dang tam zawk pawh an chang tur a ni,” han tih ngawtte hi ‘thliarkar rilru’ diktak atanga lo chhuak. Zirna-in tha, zirtirna tha leh zirlai chhawr tlak leh hman tlak chhuah theihna tur ngaihtuahna tel reng reng lote thluaka lut nghet bur mai, mahse, mi thenkhat, ngaihtuah chiang lem lote’n an thlawp em em a ni fo. An rilru hi thliarkar rilru mai ni lovin ngaihtuahna chhangchhe tak a ni.

An ngaihtuahna hi a dik lo hle tih a lo lang chhuak fo thin a. Mizoram University din a nih dawn pawh khan thenkhat chuan vice chancellor chu Mizo ngei ni se, tiin an duhdan an aupui nasa hle a nih kha. Mahse, chu ai chuan ngaihtuahna fim zawkin ro a rel ta hlauh mai a, lehkhathiam (academician) an rawn dah ta zel a. Mizote paw’n he dinhmun hi an chelh tho mai. An thawh that leh that loh chu zirtirtute leh zirlaite hriat tur a ni awm e.

Hun a lokal deuh a, Mizoram University chu India ram puma university tha thlanchhuah zinga 78-na lai-ah a inhlangkai ta mai a. July ni 2, 2001 a din chauh ni si hetiang dinhmun a ding thei ta mai hi chapopui tham a ni. A hnuai a MZU enkawl college kan neih chhun, kum 1958 a din, Pachhunga University College (PUC) pawh National Assessment and Accreditation Council (NAAC) chuan a dahsang hle mai a. “A+ grade with a CGPA of 3.37”-ah dahin India hmarchhak state 8 zingah an sang filawr lak satliah a ni mai lova, hetiang dinhmun luah pha hi an awm ve lo. India ram puma college tha thlanchhuah zingah 45-na a hauh a ni a, thil namen a ni lo.

PUC-in hetiang dinhmun a thlen theihna chhan hi Principal lo ni tawh, ni mek leh zirtirtute bakah hnathawktu dangte leh zirlaite an ni ngei ang a. Mizoram University pawh chutiang tho chu a ni ang. Chumi kawngah chuan zirna-in hotupa/hotunu ber Mizo a nih leh nih loh thlu hauh lova, mithiam (eminent academician)-in an ho thin avang leh an thawhpuite’n an thlawp that vang a nih ngei ring nghet tlat ta ila a fuh a rinawm.

Mizoram University leh a hnuai a college pakhat awm chauh hi a ni lova. Manipur-a Central Agriculture University hnuai ami Selesih a College of Veterinary Sciences & Animal Husbandry pawh hi state tam tak atanga zirlaite’n an rawn pan huai huai khawpa tha a ni ve a. Regional Institute of Paramedical and Nursing Sciences (RIPANS) kan neih pawh hi Ministry of Health and Family Welfare hnuai ami, senso tul zawng zawng pawh sorkar laipui rawn tum vek a ni a, nurse leh damdawi lama enkawlna peng hrang hranga mithiam chherchhuahna hmun tha taka ngaih a ni.

National Institute of Technology (NIT) hi sorkar laipui enkawl a nih rualin thuneitute’n a tirah an chhaih fuh lova. Mizorama campus din an hmanhmawh luat avangin an pamtul thelh a. Tunah hi chuan a changtlung sawt tawh hle. Lunglei lama Engineering College din tum lah chu Mizoram sorkarin a building sak hna a thawhtir contractor-te thiam loh ni maw, tun thlengin luah theih lohvin a la awm thung a, pamtul mai a hlauhawm hle. Mizoram state sorkar a inrawlh vena chin hi a buarchuar deuh zel niin a lang zawk.

Tun hnaiah Mizoram sorkarin Zoram Medical College (ZMC) hi a enkawl a hautak avang leh chhan hrang hrang avangin sorkar laipui kuta dah a nih theihna atana sorkar laipui thuneitute Chief Minister-in a dawr thu kan lo hria a. Hei hi chik peih lem lo mi thenkhatin an lo pawngpaw sawisel nghal chiam chiam a. Sawiseltu thenkhat hi chuan politics a hamthatna hmuh beisei a sawisel an ni a, thenkhat erawh chu sawisel hrim hrim tur zawn avanga sawisel an ni.

ZMC hi Mizoram Institute of Medical Education and Research (MIMER) a nih lai atang tawh a, a enkawltu tur society din a, sorkar laipui Ministry of Health and Family Welfare hnuai a awm ni se ti a duhthu lo sam ve thin tawh ka ni a. Kan state sorkar hnuai a a awm chuan medical college rintlak loh deuhvah a chhuah hlauhna lian tak ka nei a, ka hlauh chhan hi ka hre chiang hle bawk. Tripura a an medical college pakhat a zir chhuak doctor-te chu mipui tana inentir ngam chi pawh an ni lo ti hialin hmanah khan an health secretary-in a sawi chanchinbu-ah ka lo chhiar ve tawh bawk.

Sorkar laipui hnuai a dah ni se tih rawtna sawiseltu thenkhat hian ZMC enkawlna sum hautakzia te, zirtirtu (faculty) hlawh kan pek tam theih loh avanga zirtirtu (doctor/professor) tha phailam mite kan hmuh theih loh dante an ngaihtuah chiang pha (duh) hauh lova. A nihna takah chuan ngaihtuah chiang lovin an rak ve mai mai a ni ber. Thil hre awma ngaih doctor thenkhatte’n sorkar laipui hnuai a a awm chuan Mizoram atanga MBBS lut duhte tan seat hauh bik (reservation) a awm tlem lutuk dawn ni te-in an sawi bawk a. Doctor ka biakte erawh chuan institution awmna state tan 50% seat hauh hi hmun dangah pawh a awm deuh vek an ti thung.

Duhthu han sam ta ila, sorkar laipuiin engkima a enkawl All India Institute of Medical Sciences (AIIMS) te hi Mizoramah ngei hian din ve ni se a lawmawm hle tur a ni a. Sorkar laipuiin a sem laiin kan chang ve ta si lo. Medical college kher lovah pawh Delhi Public School (DPS) neih ve kawngah hian rualawh a na thin – state dangah an din teuh tawh si a. Kan thenawm state tenaute pawhin sorkar laipui enkawl medical college tam fe an neih tawh lai a, kum 2018-ah chauh medical college, chu pawh state sorkar enkawl kan nei ve chauh hi chu a lungchhiatthlak viau a ni.

MZU hi Mizoram sorkar ta/enkawl ni ta sela chuan January ni 26, 1948 a din, hmarchhaka university hlun ber (Gauhati University) ang chauh khu a ni ang, a chhan chu khu khu state university a ni miau a. An research scholar-te pawisa hmuh tur takngial pawh an pek theih loh zozai khu tam takin kan hre pha lem lo. ZMC pawh hi Mizoram sorkar hian engchen nge a enkawl theih ang tih hi ngaihtuah chian ngai a ni a, sum harsatna namen lo tawk chung hi chuan rei tak chu a enkawl thei lovang tih a chiang khawp mai.

Medical college leh institution changkang din a enkawl tur chuan sum neih a ngai a. Hei hi chiang taka hriat a ngai a ni. Mithiam tak tak chherchhuak tur chuan sum a ngai tam a, i-he lova sum sen a ngai. State hausa zawk te pawhin an tlin lo fo. Inelna chimchin (competition standards) sang lutuk ‘medical science’-ah lek phei chuan a hautakzia hi mi naran tan hriatthiam phak a ni lo. Hemi kawnga hriatna thuk leh ngaihdan fel fai kan nei lo hi kan tihsualna bul a ni. Mipui hriselna (public health) leh kan nunna hial pawh an kuta kan dah ngam turte zirchhuahna hmun hi namnul taka kalpui mai chi a ni lo.

Engineer hna thiam lo kutah lei leh in a chimin mihring nunna-in a tuar thei, Law College tha lova zir chhuakin court hma a min dinpui hi hlauhawm tak a ni. Medical science thiam ziktluak lo chherchhuahna phei chu a hlauhawm leh zual. Chuvangin medical college rintlak din a nih theih na’n kan doctor zir mekte zirtirtu mithiam rual huikhawm thei tura chetlak hi a tul em em a ni. Sorkar laipui hian ZMC hi a la duh a nih phawt chuan enkawl teh se.