HLAWH

Hun engemaw ti lai aṭang khan Mizoram sorkar hnathawkte hian an thlakip hlawh, thla tawp ber ni emaw, thla thar ni hmasa ber a an lak thin ang kha an la thei ta lova. Hei hi Covid-19 hrilengin sum harsatna namen lo a thlen avang leh Mizoram sorkarin sorkar laipui aṭanga a chanpual tur a hmuh tlai thin vang niin a tirah kha chuan sawirik a ni a. A hnu-ah chuan Finance department lam hian department thenkhata hlawh siamtute’n sum enkawl dan thar ‘Integrated Financial Management and Information System’ (IFMIS) an thiam chian tawk loh vang niin an sawi leh mek.

A chhan chu engpawh lo ni ta sela, a bik takin sorkar hian electric hman man leh tui hman man bill-te hi sorkar hnathawkte leh mi dang zawng zawng thla bul retah min thing tlangpui a. Kan pek tlai deuh chang chuan min tihtawpsak a, pawisa chawi a, a thara tih leh a ngai fo. Chutiang tho chuan bawnghnute mante, in luah mante leh thil dang dang hi thla bula khawn a ni deuh vek a. Sorkar hnathawk hlawh pek tlai an nih hian harsatna an tawk a, sorkar hian thla tira hlawh a sem theih loh chuan sorkar atanga tui leh kawlphetha hman man bill tal hi ngaihhnathiam ve mai awm tak chu a ni.

Hei bakah hian sorkar hnathawk tam tak hian insakna atan emaw thil dang danga bank leh financial institution dangah pawisa an puk bawk a. Chutianga an pawisa pukte pawh chu thla bul lama pek ngai a ni duh hle. Hei hi sorkar hian a hriatsak a pawimawh viau. An thlakip hlawh hi thla tawpah emaw, thla thar bulah emaw a pe thei lo a nih chuan a theih chinah sorkar pawh insiamrem ve mai sela a dikin a rinawm.

Mizoram sorkar hnuai a thawkte hi chuan ni engemawzat hlawh an la tlai hret a ni mai a. La zia-awm ang reng tak a ni. Sorkarin a chhawr ve tho, tangkai em em, SSA, RMSA, DIET leh NHM hnuaia hnathawk ang chi tam tak hi an dinhmun a chhe leh zualin an lainatawm khawp mai. Kum 2009 chhova SSA hnathawkte’n a hma a an thlakip hlawh thla hlui tawp ber ni emaw thla thar bula an lak thin, thla thum zette an han la thei lo thut mai an manganzia min hrilh kha ka la hre reng.

Dawrah pawisa an ba lo thei lova, thla thum/thla li hlawh an laka an han rulh meuh chuan chan a lawi an nei ngai chuang lo. Sorkar laipui sum hmanga rawih hnathawkte kum chanve zet emaw a aia rei hial hlawh pek loh thin hi chu a tuartu tan chuan hrehawm tak tur a ni. Bihar state a Lalu Prasad Yadav a chief minister lai khan zirtirtu nuai tel tak meuh khan kum 2/kum 3 chuangte hlawh an la thei lova. An hna an bansan chuan hlawh an la thei leh roh ang tih an hlauvin an hna an ui bawk si a, an buai tak meuh a ni, tih vel kha chanchinbu-ah kan chhiar mai thei e.

Hun engemaw chen an chhungkaw innghahna lo ni tawh, sorkar hnathawk (nghet lo mah se) ni a fate’n an hriatte’n thla 6 em em hlawh an la thei lo hi a pawi takzet a. Siam that a tihdik dan a awm ngei tur a ni. A chunga kan sawi ang chi SSA, RMSA, DIET leh NHM hnuai a thawkte hi sorkar hna nghet a ni lo chungin an tel lova mipui kan awm hleih theih tawh lohna an ni tih chu NHM hnuai a thawkte nawrh lai khan a chiang khawp mai. A bik takin mipui hriselna lam leh zirna lam khawihtute hi chu an pawimawh leh zual a ni.

A thenah hi chuan centrally sponsored scheme (CSS) hnuai a thawkte an nih avangin sorkar laipuiin an hlawh tur pawisa a tum lo dolet vena tur (state matching share) kha state sorkarin pek tur a neih loh avanga rei tak tak hlawh la thei lo an nih hmel a. Kan state kumtin sum ruahman (annual budget) hi za zela 80 vel zet sorkar hnathawk nghet leh Provisional Employee ti a an vuah tak hote hlawh, pisa inrelbawlna senso leh pension (hlawh?) atan a kal ral tih kan hria a. Hei hi kan dinhmun a nih miau avangin budget tha tak neih a harsa hle.

Hetianga kan sorkarin a lo do let vena tur sum a harsat chhan lian tak dang pakhat leh chu state sorkarin a thawhchhuah ve (state’s own resources) a tlem em vang a ni a. Chhiah lakna thil tihpun emaw, chhiah rate tihpun emaw hi tu sorkar mahin an ngam tak tak lova, chhiah chawitu mipui lungawi lovin an vote loh phah ang tih hlauhna an neih len em vang a ni pakhat a. Mipui hmasawnna tak tak tura sum ruahman awm uk si lova, chhiah tam lutuk hmanga mipui sawr kha a dik hauh hek lo.

Chhiah lakluh tam theihna ber zu dawr hawn an ngam bawk si lova, dawihzep lutuk chuan thil tha hi tih ngam a harsa reng a ni. Mi sawisel hlau lutuk chuan thil reng reng an tingam lo chauh pawh ni lovin thil tha ni a an hriat reng pawh an ti thei ngai lova, tangkaina an nei lo. A taka thiltih tum, pal thluk pawh ngahte hian thil tha pawh an ti thei thin zawk a ni. Eng hlauhna berin emaw a man chuan mihring hi kan laktlak ngai lo.

Kan sorkar hnuai a thawk, sorkar laipuiin a hlawh engemawzat a rawn tum, mipui leh sorkar tana tangkai tak takte hlawh lak loh rei lutuk chhanah hian sorkar, a bikin an awmna department enkawltute hian an ngaihven tawk lo a ni thui hle. A changtu minister leh secretary, director leh a hnuai lam thleng hian tih tak takin tan la hlawm se la chuan hetiang hian an harsa rengin a rinawm loh. Kan hriat theuh angin, sorkar kan tih leh a thawktu tam ber hi wheelbarrow ang deuh a nawr kal reng ngai an tam mai.

Kum 1998-a Delhi a kan awm ve lai khan kan pu pakhatin a farnu, Delhi hmar lam atanga chhim lama insawn telephone a kum tel an sawn theih loh chungchangah min ruai ve teh mial a. Khatih laia Union Minister of State for Communications kha Silchar bial MP Kabindra Purkayastha a ni a. Khatih laia Cabinet Minister Buta Singh ban hlim a nih avangin Purkayastha hmu tur khan ka va phek chhuak ve ngawt a. Minister Additional PS Shiladitya Dev kha ka va hmu a. Dev-a hi kan ai a chanchinbu thila nau zawk, Assam Tribune a thawk thin a ni a. Engkim min buaipui a, Minister hmuh ngai lovin chawlhkar khat ral hma-in kan pu farnute telephone chu an sawnsak a ni.

Chuta kan pu (a hnu-ah London lama insawn ta) H.S. Rao khan lawmthu min hrilh pahin, “Mizote’n ralthuam leka in awrawl in chhuah hi ka hrethiam a sin. India ramah hian nawr loh chuan engmah hi a kal thei lo a ni ber a. Rel ticket la tur pawhin ticket pechhuaktu kha kuhvakhawr tal pek a ngai chu a nih hi,” tiin a sawi hial. Hei hi thil awmdan dik tak a nih avangin sorkar laipui (ministry) lamah khuan engkim mai hi nawr tlut tlut a ngai fo. Kan hlawh tur a nih loh mai avanga kan hnathawk dangte hlawh kan nawr taima tawk lo leh kan ngaihven tawk lo hian mi tam tak harsatna a siam a ni.

Keimahni lamin a dolet vena tur sum kan neih phawt chuan sorkar hnuai a hna tangkai tak tak thawkte hlawh tur nawr chhuah hi thil harsa tak a nih a rinawm hauh lo. Chutih rual chuan engkim mai nawr chhuah ngaih deuhthawna rama awm kan nih miau avangin a mawhphurtu minister leh department hotute an pawimawh hle. Nawr chhuah theih na na na chu thla tam tak an hlawh la thei lova awmtir ai chuan a thlakipa nawr chhuak tura tan lak mai tur ni awm tak chu a ni.

Heti zawng pawh hian a ngaihtuah theih awm e. Kan sorkar hnathawk nghette hian sorkar laipui-in DA a pek ang diak diaka pek ve an phut a. Chutianga sorkarin a pek chiah chuan a nghet lova thawk, pawimawh em em site tan harsatna a thlen thei a, a thlen mek bawk reng a ni. Sorkar hnathawk nghette’n an chanvo an sual nasat viau lai hian hnathawk zinga a nghet ve lote dinhmun pawh an hriatsak a tul khawp mai. “Sem sem dam dam, ei bil thi thi,” tih thu hi kan vawn tlan reng a ngai a ni.

Sorkar sum dinhmun en hian hetianga a nghet lova thawk, sorkar laipui leh state sorkar sum thawhkhawma rawihte dah ngheh mai hi a la harsa rihin a rinawm a. Sum harsatna namen lo tawk mek chungin sorkar hnathawk nghette hlawh behbawm (dearness allowance) tihpun chungchahah lah chuan sorkarin duap a kai leh bawk si nen. Kan state sorkar hnuai a hnathawk atan kan la dah nghet thei lo a nih pawhin an thlakip hlawh tak hi chu sorkar hian ngaihthah teh suh se, an khawngaihthlak em mai.