NI SARIH TLANGAH

Tuikual min bialtu Pastor Lalengmawian, Lunglente hi i hre ve a ni maw, thla enga i lunglen thute hi i sawi fo va, min han tih chu mawle, ani Pastor pulpit tlanga thusawi thin ai chuan ka hre feee ang. Ka u, Revd. Chuauthuama erawh hi chu mi tumlum ngang hi a ni a, Lunglen ka hre ve lo, ‘pa’ tak ka ni, a ti thung, a nupui a ngaihzawn laia a ngaia a lunglen thinzia leh an inneiha pa pakhat a ṭawngṭai reiziate kha ka la hre ru kiau asin mawle.

Ṭawngṭai sawi taka zarah chuan han duham zel ila, Sumsuihah kan naupan lai a ni a, chunglai chuan pa upa lam deuh tam tak chuan kekawr ha loin puan hi an veng a, Pu Taia kha a ṭawngṭai a, a rei ta lutuk kha an ning a, ani chu puan veng a ni a, puan chu khup thleng velin an veng ber a, khup hnuai lam chu a khuh lo va, pu Aitluangan a kechawnah zawhte a hamtir top. Zawhtein kechawna ham ta chu a ṭawngṭai tui rei ta bik lo a ni awm e.

Khai aw, khawnge kan tum ram lam panin ke i pen tawh ang aw, Ni Sarih Tlang, Seventh Day Tlang an tih bawk hi, zing chhun, zan thla eng leh romei chhum zam paw chiaiah te, ruah sur chang leh favang-thlasik khaw thiangah pawh lungleng takin ka thlir fo va, a tlang bulthut kawngpuiah pawh vawi duailo ka kal tawh, mahse e, chuti chung chuan he tlangah hian vawi khatmah ka lo kal lo a, kan in aṭang pawhin a lan avangin zing leh chhun, tlai, zan thla en chang hian ka thlir fo va, mahse ka la kal lo, a hmunah ka la hmu si lo, ka va riang em.

Ka thlir ni tin a, ka thlen hma loh chuan, A hmangaihna eng leh lawmawm chu; Miten chu hmun chu hlui hian ring mah se, Ka sawi thei dawn lo tharin a lang. A ni e, hluiin ring mahse e, a dik a lawm, a rei tawh a, mahse kei atan zawng a thar em a ni. Thla tiave aia lian chu chung lamah khian tuma dip dal lohin a eng kulh a, khua chu a thiangin a vawt em em bawk a, phur takin chu tlang lam pan chuan kan tlan a, chu chu kar hmasa Thawhtan ni 18-1-2016 zan kha a ni. Hrilh chawp zelin Chawnpui panna kawngpui aṭang chuan kan kawi chho a, kawng pawh chu a lo hnum hun a, tuemaw chuan sawi se, Rulnganpa ang zuarin a dum, a ti pawh a ni mahna, chung lamah thla eng chuan a chhun hnim ruih a.

Ka dam chhunga ka hmuh hmasakna ber a niin a hnuhnung ber turah erawh chuan ka phal lo. Gate kawngka chu kan inhawn chawp a, a thlang mai chu Seventh Day damdawi in a ni awm e, kan han lut chu zawl zau nuam tak hi a lo ni a, thla eng thlir nan a nuam em em a, mahse thla eng thlir hrim hrim nan chuan Durtlanga ATC hmun kawt zawl kha a nuam zawk a. Chu zawl sir kam velah chuan sikul a awm a, Hostel a awm a ni ang, elektrik enga sikul naupang hmeichhia han kal kawi vel chu kan hmu a, anni erawh chuan min hmu lo.

A sir hmar thlang lamah chuan thingkung pakhat a ding a, a lerah a buk tawi liai a, a hnuaiah chuan ka va ding a, thla chu a chiang em em a, step chhuk deuhah chuan kan kal a, sikul naupangte chaw ei nawi an lo dah chu ngawi rengin kan la a, biak tur an awm lo va, hmuh tur an awm hek lo, mahse a nuam tho. A hmun hma a nuamin a rem a, a lunglen thlak a, zan thla en zana ka han hmu a, ka han kal ve ta chu vannei ka inti hle mai. Seventh Day unaute hi ka fak thin a, anni chuan Lalpa avangin vawksate hi an ei duh lo va, keiin a thau leh a thithun tui ka tih vei nen maw, chung Mizo sa tui ber maite chu ei loin an awm thei a, ka tluk loh an ni tih ka hriatin ka fak lo thei lo.

Khawi veng emawa kan chawlhni a, an tan a ni ve lo a, thil an lo zuar leh dawr an lo hawng an han khapa an han phal lo mai thin thawmte kan hre fo va, a dik lo a, kohhran inzah lohna leh inhmusitna ni hialin ka hria. An chawlhni ve, keini tana Inrinni kan tihah hian dawr hawn phal lo vein, kawng sira thil zawrhte khap ve ta se, kan ngai thei lo hle si lo ang maw, ka ti thin. Chu tlangah chuan thla bial zan ngeiin va kal leh ka chak hle a, tumah be lo leh tuma biak lohin kan kir leh ta.

A ni e, tunah chuan Ni Sarih Tlangah ka kalin ka hmu ve ta a, zan thla en zan a ni lehzel a, ka thinlung chhung hi a hlim ru veng veng, miten a maktaduai telin Bank-ah pawisa an dah pung thur thur a, an hlim ru viau pawh a ni ang, mahse mihring duhamna chuan chintawk a neih si loh avangin an duh chu “a aia tam” a ni tho a, kei zan thla eng ruai hnuaia lungleng taka Ni Sarih Tlanga ka kala a hmun ngeia ka hmu ka lo hlim ve em emte chu a ropui lo teh e maw, mahse e, hlimna chu chhung lam thil, pawisaa lei chi rual a ni si lo.

He Tlang pawh hi, India Danpuiin sakhaw zalenna min pek avanga Seventh Day unauten an neih theih a ni a, chu zalenna hnuaiah chuan sakhaw hrang hrang kan awm a, keini pawh Kristian sakhua vuan thei kan ni a, chu sakhuaah pawh chuan zalenna zar zo zelin pawl hrang hrang kan awm leh a, hengte hi a nihna dik takah chuan kan Danpuiin sakhaw zalenna a khua leh tuite min pek avang a ni. Chu zalenna ropui tak avang chuan kei pawhin ka la hmuh ngai loh tlang ka lawn phah a, mi fate khawvela tlang sang ber Mt. Everest-a an lawn tluk zetin ka lawm ve tho asin. India Danpuiin sakhaw zalenna min pek a hluta a ropuizia hi ka hre chhuak uar uar a, a hlutzia hi i lo ngaihtuah ve ngai em le?