ZU LEH DRUGS

E khai, Ramtuk Thla kan chuang kai ta der mai le, farṭuah leh vau pawh an vul leh dawn ta, an thlahtu Thangsira leh Thangzaia aṭangin an thutiam, a ni e, thu an lo thlun, kum tina vul dun tura an tih chu bawhchhe loin vawiin thlengin an la vul dun sen-var chhi chhiai a, an zarzoin sava leh thehleiten an par zu an dawt a, keini a anpui meuha a siam mihringte erawh hi chuan, a bikin keini Mizo Kristiante thung chuan, Pathian leh a kohhran hma meuh pawha thu kan thlun leh tiam, leh thil dang pawh kan pawisa lem lo va, kan bawhchhe thin a nih hi.

Ka nu lungthlu lova khiangawih chu, Ṭuahpui leh Vau an vul zo lentu hnuaiah, Di kan tawng kan tah a tul leh thin, tih hun kan thleng a ni ta, romei zing ri riai hnuaia kham ko nikang pangpera an han vul chuk mai thinte hi zawng a mawi a ni mai lo va, a lunglen thlak thin a ni zawk. Nipui thereng a kungah fuin an hram mawng tawlh herh herh leh ngei dawn si a, Engtin nge maw lunglen ka lo tuar ang, Nghilh loh mi u ka then takte ngaiin, Tinkim ka han dawn a, Awmkhua a har ngei mai.. tih a
ṭul leh si ṭhin.

Keini romei zam paw chiaiin tlang tin mual tin a tuam laiin lunglengin kan lo van a, chutihlai chuan kan ram khawpui zau lo takah hian zu leh damdawi ruihtheih, drugs an tih mai hi a hluar hle thung a, dan ang tak leh MLPC Act anga an zuar hi chu thu hran nise, he dan kalha zuar pawh an la pangngai reng fo va, dan anga zu senchi zuar chu kan sawi tur a awm lo, dan chu kan zahin a lal ber fo tur a ni si a.

A in ve lem lote chuan kan hre lo khawp a, mahse a hriaten an sawi dan chuan dan ang thlapa an zawrh sapzu kan tih mai hi a tha vak loin, damdawi in lam an lun phah hle niten an sawi a, tak tak a ni em tih erawh ka hre lo, mahse dawt vek erawh a nih hmel loh a, chutiangin a zua kha a lo hrisel lo deuh a nih pawhin dana kha a chhia tihna a ni lo va, a siamtu lam mawh a ni ngei ang a, thuneitu lamten beng chhiin enfiah se, FSL lama endiktir emaw thil dang hmanga endik emaw pawh a tha mai thei. Chutihlai chuan rakzu lam thung chu hman aiin an siam tha thung, te an tih chu, tak tak ni maw le!

Tun hma deuh khan kan thalaiten an ruih a, OD-a an thihna tam ber kha spasma proxyvon kha a ni thin a, a hnu deuh hlekah parvon spas an tih kha a lo awm leh a, mahse tunah hi chuan khatiang kha chu a Nova damlai thil deuh ruih tawh a, khatiang avanga thubuai Court lama la awm pawh thubuai hlui deuh la chin fel loh tlem a zawng mai chauh a ni tawhin a lang. Hun rei tak chung chu khitiang damdawi tite chu Assam Drug Control Act an tih mai, Assam pawhin a hman duh tawh loh dan hmangin thubuai siamsak an ni thin a, mahse a hnu feah khan ND&PS Act hmang khan thubaui siamsak a ni ta a.

Ganja leh heroin, No-4 an tih maite hi chu a awm reng a, opium erawh a awm zeuh zeuh a, tlem lai khan Mizoten khehpuam kan tih mai kha a lar hle a, tunah hi chuan khatiang kha a lar leh tawh lo va, No-4 hi a lar reng a, a lar thar leh ta deuh niin a lang. Heng ang titute hi dan kan sawi tak, ND& PS Act hmanga thubuai siamsak an ni thin. Khehpuam kan tih mai kha an man hnem hle a, cheng vaibelchhe tel mante a ni a, khatia Mizorama a rawn lar hma khan mi thenkhat chuan an lo ti hman nual a, hausakpui ngial ngial pawh an awm fur nia sawi a ni.

Khehpuam, proxyvon leh Parvon angte hi chu Vairengte thlang lam aṭanga lo chho a ni ber a, No-4 hi chu khi lama aṭanga lo chhuk a ni thung. Ganja hi khi lam aṭanga lo kal a awm ve zeuh a, mahse a tam lo thung, hei hi chu Manipur lam
aṭang a ni ber a, Mizoram chhungah chuan Hnahlan, Mimbung, Teikhang, tih vel hi a lar hle thung.

An man tam dana zirin a hremna a inang lo a, tlem te a ti thinten anmahni tana an tih, entir nan, No-4 gram 5 hnuai lam ang lek an man chuan a hremna pawh a tlem a, chu aia tam chu kum sawm thleng tan theih a nih bakah pawisa chawi tel tur a ni bawk a. A tam tham sumdawn nana an tih, danin a bituk a awm a, chutiangte phei chu a rei lo berah kum sawm tal tan bakah cheng nuaikhat tal chawi tel bawk tur a ni. A hremna hi a nat em avang hian mi sual lo hrem palh a hlauhawm em em a, chuvangin court sang zawkte chu an fimkhur lehzual em em thin. Hetiang kan sawi damdawi ang chite thubuai khawih tur hian Special Court a awm nghe nghe a, chu court-a Judge chu a reltu ber a ni.

Mizoramah hian hetiang damdawi ruihtheih avanga court-in thiamloh a chantira a hrem hi an tam lo hle mai, a chhan ber nia lang chu a mantu lamin finfiahna tha tawk an neih loh avang a ni thin. Tin, thuhretute court-in an thu hriatte sawi tura tha tak leh tlawmngai taka kala sawi thin an awm zeuh zeuh chauh a, a tam ber erawh chu court-in a koh pawhin an kal duh lo va, an thu hriatte sawi tura an kal duh miau loh avangin sawrkar lam tan pawh an sualna kha court-ah finfiah ngaihna a awm thin lo, chuvang chuan thiamchangin an chhuak lo thei thin lo a ni. Heng drugs avanga sumdawnga mi faten a ngawl an vei phaha an thih phah pawh pawiti lotute hi dan ang taka hrem an nih theih nan thuhretua a mantuten an hmante hi tlawmngaia court-a kal hram hram i tum ila, kal i hreh suh ang u, thingpui in man turte pawh court-in a pe thin a nia, thuhretu nih hi hi hreh loin tlawmngaih chhuahin i awm hram zawk thin ang u aw.