KA HMU TA E

Chhawrthla eng hnuaiah a chiang lo ve, Chungturani a en meuh hunah chuan e, Ram-theihai tualah a ding reng mai. A ni e, thla tiave eng kulh mai zana ka pian aṭanga ka la hmuh ngai loh, ni lo, a hmuh chu ral aṭanga ka hmuh thin, zing chhun zana ka thlir ṭhin, a hmuna ka la kal loha ka hmuh ngai si lohna hmun leh tlanga kal kal a, kawta thingbuk li liai ding hnuai aṭanga chu thla eng tak ka lung tilengtu ṭhin ka thlir thu ka sawi kha kan rilruah cham reng lo mah sela, kan la hre ve ri riai turah erawh rinnain ka beisei.

Rinna hi a pawimawh em asin, Nova pawh khan rinnain a ni, kum za zet lawng a tuk ni, a dung tawng sawmnga, a vang sawmthum, a san zawng sawmthum bawk, chhawng thum, rannung leh ramsa chi tinreng nupa tuak zel lawngah kum khat chhung a chenpui a, Nova te chhungkua leh khang ramsa leh rannungte khan ni tin chawnghei tawngtai vawi hnih vawi thum an neih hmel chiah lo a, an ei tur kum khat tla kha lawngah khung a ngai lo thei dawn lo, saipui nupa kum khat tla an ei tur ringawt pawh kha ka ngaihtuah hian, hmun a awh zauin lawng chhung zawng zawng em a nih loh pawhin a zatve dawn hial a ngaih te ka ring thul, a va hautak tak.

Amah Pathian thuhriltupaten Lalpa lo kal lehna Sap ṭawng tela sawiin, Second Coming, an ti ang deuh hian kei pawh chuan ka ti ve mai dawn emaw ni, kar hmasa ni 6, Feb, 2016 Inrinni, a serhte tana an chawlhni ni thung kha a ni a, Seventh Day kohhran thalai, AY an ti ni tain ka hria, an biak ina inkhawm ve turin min sawm a, ka lo aw ve tawh laklawh si a, ka va kal ta kha a ni a. Sikul tual zawla zan thla enga thingbuk ka hmuh kha ramtheihai a lo ni a, a rah thiah thiah a. Biak in awmna tlangah chuan kan chho a, thing a ding ngaw chek a, a kawt lawka Pastor Quarter chu a lunglen thlak raih mai a.

Chulai hmun chu ka kal vawi khatna a ni a, ka lung a tileng em em a, zan thla bial zana han kal nan ka it, thla eng thlir nan ka it ber zawk a, an biak in chhung nuam leh fai tak, zahawm takah chuan kan vai ui dum luh ve rawih a. Kan Judicia Officer Pu Lalbiakzama ka hmu hlauh a, kawngchung nen nghawngawrh nen a lo induang nalh a, Pastor emaw ka ti a, a lo ni lo hlauh a, a rualin ka lut ve ngam ta a. Ṭhalai leh lai lo pawh an khat hmur a. Anni Seventh Day-te hi rilru zau tak pu an nih avangin kei vawksa heh, Mizo zial nghei tumna rilru la nei ngai lo chu thute min sawitir a nih chu. 2007 nge 2008 khan Lungleia an biak in, pulpit tlangah ngei min dintir phal tawh bawk a, an rilru zauhzia chu in hrethiam mai lawm ni?

Lunglei han sawi takah chuan, khatia hman kuma ka va awm zuai lai khan, Baptist ṭhalai ṬKP an tihten min sawm ve nual a, Chanmary, Electric, Zohnuai leh Venghlun Vengahte an zingah kei an mi leh sa ni hauh lo hi inkhawmin thute ka sawi ve a. Chu chuan Baptist Kohhran rilru zauhzia a tilang a, diktak chuan kei pawh ka pheia ka inkhawmna hmasa ber Chawlhni zingah anni kohhranah hian a ni, ka inkhawm nghe nghe chu. Hman kum lawkah Bungkawn Vengthar Salvation biak inah thalaiten min sawm a, Hall tur an ti, a ni leh si lo, khua a vawt si, kei lah jean kawr nen ka inthuam, biak ina luh mai pawh a inthlahrun thlak tawh nen, an pulpit-a min han dintir zet chu nuam lo tak mawle, an chairman kha a fel em a, pawiti suh, inkhelh thawmhnaw haten a nia kei pawh ka din, te a rawn ti a, chutiangin a ding lo ang tih ka hria, mahse ka zah loh nana a ti, Salvation kohhran zauzia ka hre tawh bawk.

Tichuan, ka dam chhunga ka la hmuh ngai loh, Ni Sarih Tlang chhipah chuan ka kal tawh a, chulaia an biak in mawi leh nalh, thianghlim takah chuan ka inkhawm ve tawh a, an Pastor chenna inah Belphuar thingpui tui tak ka in tawh bawk a, ka lawm hle, ka rilru te te chuan nei ila chu aw, vawk thawha ruai han buatsaih ka va chak em, ka ti, tumah khan an ei ve duh awm si lo va, ka duh lai lai ka ei nghek mai ang, tih rilru ṭha tak ka pu a ni deuh ber mai, hrethiams?

Rilru zau tak puin ka duh duh ka sawi min phalsak a, mahse duh duh em em chu a chi loh, dan lam kan sawi ber a, chu chu an thinlunga ri si lova sawi se min tih pawh a niin ka hria. A ni e, keini Kristiante hian eng kohhran pawh ni ila, tuia inhnim kan ni emaw thlawr kan ni emaw, dan hi kan ngaih pawimawha kan inzirtir hi a lo tul dawn khawp hi a lo ni a, chu chu kan Seventh Day unaute hian an lo hria niin a lang. Kohhran mi leh saten dan lova zu an zawrha an in a, damdawi an tih a, ruk an ruka tual an thaha mite an pawngsual loh nan a, dan zawm leh zaha ṭha taka an nuna an awm a, an khawsak theihna turin he khawvela sawrkar dante hi kan inhrilha kan inzirtir ṭhin hi a lo ṭulin a lo pawimawh hle a lo ni tih hi min tihre chhuak a.

Ringtu, Pathian thi ni lo, Pathian Nung bia intia au aute hian dan hi kan zawm loha kan ruk a, kan eiruk hausak thur thur a, zu kan ruih leh si chuan a dik thei lo ang, kan chunga roreltu thu thua awm tura tih kan ni, roreltu MLA tuin emaw, kha meizial min va lei teh a tiha a thu zawma leisak lam a ni lo, an dan siamte kan zawma kan zah hi, hei ngei hi a ni, chunga roreltu thua kan awmna chu, kohhrante pawh hian kan inzirtir a lo ṭul fo dawn a lo ni e.