CHHAWKHLEI

Thlir zel ila hmun ropui chu, Angel var leh Varparh Arsi; Romei a zam lung a leng zual, Beram No tual lenna a ni, Pastor Chhawnan a lo ti ang khan, zep lohah chuan romei chhum a han zam paw chik chek a,farṭuah leh vau a lo vul hun meuh hi chuan, lung chu a leng zual ṭhin a nih hi. Ṭanpuian, Ṭhapui nang ngai reng renga khua romeiah, Ka zam nang e, i ṭuanna tlang bawmah, a ti ang hian romei chhuma chana kan ngaihte chenna khaw dai tlang chhipa thlir chung zela zam ve mai pawh a chakawm dawn a lawm le.

P.U.C. Aizawl Colle-ge-a kan zir lai a ni a, tun ang hun February thla hi a ni bawk a, chu chu 1978 kum a ni. Kan Zitirtu Pu C.Lalluia hoin keini NSS-te kha Shillong lama kan hotute nen, Lunglei lama kan thiante nen Mizoram tlang sang ber Phawngpui tlangah kan lawn kha a ni a. Hnahthial pelh a, S.Vanlaiphai penga zo-kawng khu tawka jeep motor-a kan han chuang kha, kawng khu lutuk kan hmaah motor chhe tawk hi a tlan a, a tihrikna a chhe tawh a, an hmaa mi an tlan pel duh chuan chang an tumte kha mitthlaah a cham reng mai. Chutihlaia kan zirlaipui ṭhin, Dusty-a, pui pun nia pi te zawnga ṭap pir per rual, Hnah-thial College-a Pu Vanlalhnema tih hming pua an Principal tuna a lo ni ta maite hi ka lawmpui kham lo, a sakhmel rengin min ko lo ve.

Sangauah kan riak a, kawng a khuk em avanga kan lu chu vai-vutin a puat hian a paw vek a, sam hi a chhah tual mai a, khua a la vawt a, thawmhnaw lah chu han beng ila a khu rum rum a, chuti chung chuan inthlak miah lo leh inbual miah lova kar khat chhung kan awm zet kha chu, faina hapta kan hmang chiah lo a ni ber mai. Chi kan keng theihnghilh a, mipa vek kan ni hlauha a ziaawm, a hrana chawhmeh siam loin dailuah leh chaw kan chhum fin tawp zel, sangha ṭin kha chi ang deuhin kan hmang thung, chaw leh dal chhum pawlh chi awm si lo chu e, hrawkah hian a liam duak duak mawh.

Aw Phawngpui tlang chhip thlen hma, kawng chho deuh iuh euh sir chhak lama rawngal, zungṭang tiat lek lek lo buk tawi li liai kur dilh delhte tak kha aw, lung tileng maitu a lo ni e. A tlang vela chhawkhlei par sen mawi takte kha aw, a va mawi lunglen thlak em. A mawizia sawi sen loh ram chu, tih ang mai hi a ni a, a kung hniam te te zar bing bengahte chuan kan lawnin kan ṭhu ving veng a, khua kan thlir a, thingsiri par ai zawngin a mawi ngei mai. Lamkawiah chhawkhlei par sen lo tla, Ka chhar dawn lo zaiin ka pel mai dawn e, Ka di rim reng reng a nam lo ve, tih loh chi rual a ni lo. Aw Phawngpui tlanga chhawkhlei par mawi vul chhi chhiaite kha aw, ka dam chhung hian ka hmu leh tawhin ka ring lo. Kan ṭhiante chuan hnang an hlai a, pa te an tah a, chutah chuan a par mawi takte chu khungin an hawn a, a ni e, kei pawhin ka hawn ve asin, rei erawh a vul si lo.

Phawngpui tlang chhip, tlang dang min hliahtu awm si lo, khawvel lai tak ni mai awma kan chuan laite kha aw, keini tlang lawn inti ṭhin tak mah ila, Vawmbuk khaw panna kawng a ni thung si, lungphuna inziak mak deuh deuhte chu kan la chhawng a, tunah zawng khuarei a chang zo ta. Kan haw lam kawnga hnathawka lo awm, nu pakhat bana inziak thin an tih, amah kan kawma a hming chu Siamzingi a ni a, a hnuah chuan Laldiheli a ni thung a, Phawngpui tlangah chuan chatuan ro an rel ṭhin a ni awm e, mahse tunah chuan an rel zo tawh a ni ang. Anniho kha, thlang tlak zai an rel deuh a ni ang, hman kum khan Santi Bahini hel pawlin an lo man a, kan police-ten an zu chhan chhuak a ni lawm ni kha? Chatuan khua chu a la var bik chiah lo a nih hmel e.

Tialpari pukah kan lut a, a chhunga lung kha nawhlungah kan hawn a, kan nei ta lo niin ka hria. Min hruaitute sawi danin thawnthu pahnih a nei a, Tialpari chu Pu F.Laltuaia pi kha a ni a. A thawnthu pakhatah chuan he pukah hian sakei nen an tawm dun thin a, fa a neih chuan a lu chuan sakei a ang em a, chuvang chuan Lalsakeia an ti ta a ni, an ti a, a thawnthu deuh hlek, a thawnthu dang leh chu Tialpari a pasal nen an inhau a, an khaw lama a haw chu he pukah hian a riak a, a pasal chuan a um zui a, a chhungah a nupui a riak tih hre loin a puk luhnaah a riak thung a, zinga Tialpari tho kal leh tur chuan a pasal lo la muhil chu a hmu a, ngawi rengin a kalsan a, an khua a thlen hnuin a pasal pawhin a va thleng a, mahse a nu leh pain a hruai kir an remti lo thung a, tih a ni, chuvanga Tialpari puk tih hming hi pu ta a ni.

Chu hun chu, tun ang hun leh thla February hi a nih avangin he hunah hi chuan thinlungah a lo thar leh a, nimin leka thil thleng ang maiin ka mitthlaah hian a thar ṭhin. Miten chu hmun chu hluiin ring mah se, Ka sawi thei dawn lo, tharin a lang. He hunah hi chuan nipui a lo thaw dawn hnai tawh a, khua a ro em em tawh a, kangmei mawlh mai hi a hlauhawm a, chhawkhlei parte chu han kang kher mah suh se, kan ram, thing leh maute hi kan fimkhur loh leh nawma maka kan tihkan tura Pathian siam chu a ni bik lul lo asin, chuvangin mi tinte i fimkhur ang u aw. Fimkhur hun a ni e.

Fimkhur loh vang emaw duh vang emaw ram tihkan te, in tihkan te hi dan pawhin a khap a, IPC an tih maiah hian a hremna pawh a awm sa reng a, kum tam tak lung in tan theih a ni a, pawisa chawi theih a ni bawk, chuvangin kan Phawngpui tlang lawn hun, chhawkhlei par kan hmuh ang hun khua a lo ṭhal ṭan tun ang hun aṭang hian mei leh kangmei lakah mi tinte i fimkhur ang u. Kalsan dawn phei chuan arpui mei pawh tuia leih huh a pawi lo mai thei a ni.