CHAPCHAR KUT

Kutpui kan ur khuangruah chhiar nghiang e, Chappui rawh loin a tul ngai lo. Kan pi leh pute Chawngtuia an awm laia Chapchar Kut an hmang kha an tui awm hlein a lang a, Chawngtui chu a hming kan hre fo va, Lunglei biala mi, N.Vanlaiphai atanga hla lo tak a ni a, he Kut an hmang hi an tui em em a, tawp nachang an hre lo va, favang a lo nih chuan vakiin buhvui a pu an hmu a, an darh zo ta a ni, an ti. Thlawhhma pawh la loin an kut mup mup mai ni awm tak a ni.

Tunah chuan Tau thla kan chuangkai ta, Tau han tih hi a lam tawi a ni a, Hmutau lamtawi a niin a lang. Hetih hunah hi chuan Hmutau hi a hmin eng-sen tiar mai thin a, a thlum phian reuh a, mau hi kan tan bung a, a sawh nan sawhfung hmawlh mum kan hmang a, Hmutau rah kha kan lo va, sawhburah chuan kan khung zel a, a sawhfung khan kan zu sawh sawm a, sawhfung kha kan liak khamphei a, kamsir tawn tawn hi a berh sen luai thin. Hmutau hmin hun a nih avangin Tau Thla tih a ni tain a lang.

Mizoten kan Kutpui ber Chapchar Kut pawh tunah chuan kan thleng leh dawn ta, kar tawp Zirtawpni, ni 4 hi a lo ni leh ta reng mai, hawh u i kut ang u, tih ziak ang khan. Tun hma deuh kha chuan sakhuana thuam inbelin kohhran tukverh atangin kan thlir a, kan mi khaw sial hmuh a, kan hmu Hmuithla deuh roh thin a nih kha. Mahse kan kutni vangthlate hi chunglam huat zawng a ni ngawt lo va, mi hnek nana kan hmana pawi sawi nana kan hman thin kan kuttum pawh hi amah fak nana kan ben chuan a lo tha a ni leh mai a, a hman dan leh hmangtu azirin thil hi a thain a thalo fo thin mai zawk a ni tih kan hre zel a, chuvang chuan tunah chuan ka luhchilh ngam ta.

Lei chung zawng zawngah bul hmun khat vekin hnam tinte Pathianin min siam a, kan tan hunbi te ruatin ramrite a kham a, chu a hunbi ruat leh ramri kham chhungah chuan hnam tinten kan hnam zia leh tihdan mila amah kan chawimawia fak chu siamtu remruat dan a lo ni a. Sap leh Vai, Japan hnam tihdan ang khera kan fak a ngai lo va, keimahni hnam min siama ramri min khamsakna chhunga kan hnam nunphung ang leh mila kan faka kan chawimawi kha a duh a ni mai. Chuvang chuan Chapchar Kut pawh chu a lo mi khaw sial hauh lo mai a, tun hma deuha thalai khawmpuina tual zawl zau sir thim china hmeichhe kekawrte an chhar teuh ai chuan a lo lei lam thil bik awkawng lo mai.

Hlim takin he Kut hi i hmang ang u, chunglam pawi reng reng a sawi lo vang. Mahse kohhran thil a ni lo va, a kut nan sawrkar bungrua an lo hmanga an hawha an lo ti a nih pawhin a inhmeh a, a awm khawp mai. Keini kohhran zawk mah pawh hian kan khawmpuiin sawrkar kan tibuai fo a, sawrkar puihna tel lo chuan khawmpui lian pawh kan hmang hlei thei lo a ni ta deuh ber mai. Chutihlaiin kan Catholic hmeichhe unaute, Sairanga an YMA President, Pi Teresa-i teho tihna a ni ang, hman ni maia an khawmpui lianah erawh chuan kawng engahmah sawrkar an pur lo va, an tibuai hek lo, an intodelh tihna a nih chu. Pu Petera te hun laia Jerusalem khawmpui lianah pawh khan Rom sawrkar tanpuina an phut lo va, an tibuai hek lo ang deuh kha a ni ta ber awm e. An entawn tlak hle.

Kan Mizo nunphung leh kan culture-a bet tlat a ni a, Kut hian tu pawi mah a sawi lo. Hnam nuna bet thil hi a awm ve a, kan hnam nun leh kan Kutpui neih ve chhunte hi kan humhalha kan hlut loh chuan tunge chutianga rawn ti anga min humhalhsak ta ang le? Bul hmun khat veka min siamtu leh ramrite min khamsaktu Pathian duhdan nia kan rin hi, keimahni duhdan a ni fo va, a duhdan leh duh loh thilte chu Bible-ah a chuang a ni lawm ni? Chunga roreltu thua awm tura tih kan nih lai reng pawhin, tute emaw roreltu an nih avanga an thu hnial tlat leh kan ngaihdan leh duhdan anga thil an tih loha an rel loh avanga dodal phet kan tumte phei hi chu Kristian inti ve site tan chuan a inhmeh lo ngawt thin mai.

Kan sawi tawh thin a, mahse sawi nawn hi a ngai fo va, a ni tak a, zan thla eng leh Reiek tlang, thlasik kaw vawt leh nipuia khaw lum thinte pawh hi kan hmu a, kan hria, mahse kan sawi nawn kum tin a, kan inhrilh chamchi a, a lum chu min hrilh loh pawhin kan hre ve tho, mahse min hrilh tlat tho si thin ang bawk hian kan inhrilh nawn a nih pawhin kei chuan mak ka ti lem lo, a aia mak hi Kristian ramah hian a tam e mai.

Chapchar Kut pawh kan thleng dawn ta e, hlim leh lawm takin i hmang ila, i chai ang u, mahse chunga roreltu thu bawhche si loin. Roreltu thu kan awihna tur chu hei hi a ni, dan siamtu tur diktakten, inhawr khawma thuneihna engmah nei ve uk si loin an duh duh anga dan phuahchawp an siam ang hi ni loin, dan an siamte hi kan zaha kan zawm a, kan awih chuan kan chunga roreltu thuin kan awm tihna a ni a, chutianga dan a siamtu tur diktakten an siam chu miin a bawhchhiat chuan thil sual ti a ni a, chumi dan ang chuan a ni, court pawhin ro a rel thin ni. Chapchar Kut hman nuam vek u le, mahse MLPC Act dan bawhchhe siloin aw ni ang.