LO HAL

Tunah chuan Chap-char Kut pawh kan hmang zo leh ta e. Dam takin tlangzapui chu liam ta la, Zunleng rauthla kan awih changin, Awmhar zai tin kan rem runah, I sakhming Parte a chul dawn lo, Tanpuian a lo ti ang deuh khan kan Kutpui chuan mual min liamsan ta chu a ni a, dam rei nghah thil a ni leh ta. Anthurium Kutpui kan la hmabak a, mahse tun hmaa nipui ruahsur hlauhawm loh laia an tih thin, aw ka Reiek tlang ngeia an nghah thin kha a hun leh a hmunte min sawnsak ta daih a, a kal pawh ka kal duh tawh lo, ka lunglen a hnawt tiau zo.

A ngaihzawng pawh ni uk lo, an khua Sialsuk nula fel leh zaithiam, a hlaa Tanpuian a hming a lam fo thin, Zamuang lama pasal a neih hnu pawha hlaa a la umzui:- Awmhar champion lunglen zai a kir leh ta, Chhingkhual lungduh chawi a rem lo, Lenkhua kan tlai lung a rual lo, Awi leh nang e, Kungliani khiangawi hnu, a lo ti ang deuh khan kan Kut la hmabak Anthurium Kutah kan lung a rual thei ta lo a nih pawhin, Thalfavang kut kan awi leh mai a ni ang chu.

Chapchar pawh a ral dawn ta, sawrkar thuchhuak angin kar leh mai khian lo hal tur a nih hmel a. Aw parchhung khawpa lo kan hal thinte tak kha aw, thangthar zawk tamtak chuan parchhuang pawh an hre ve si lo. Lo an hal a, a kang duh em em a, meikhu chu chung lamah khian a inpang-aw-zial chho tup tup mai a, lei atang hla vak lo sang lutuk lo chu a dum nguk a, chumi chungah chuan vanchung nulaten la her hnatlang an nei ta em ni, tih palh mai awlin meikhu ni si kha lapua ang mai hian a lo var ta hluk mai a, a tuihnai em em a, chutiang chu a ni parchhung an tih chu. Chumi hun chu kan hma lawkah a awm ta.

Lo hal chuan vah bak ram zau tak tak mai kha a kang duai duai mai thin a, a uihawm duh hle thin a, a chang chuan chutianga ram kang chu an thlelh a, changel tum nen talhtum nen meikhu leh meialh karah Mizo tlangval tlawmngaite thih pawh hlau loin a kang zel tur dangin meikhu ur vanga men pawh meng hlei thei lo leh hnaptui nen, nasa takin an bei thin a. Chuti fakaua chhumpui nasa tak anga hualtu meikhu tawng thangte tan chuan, Dr. Thangchungnunga ten, mahni pawhin nghei duh bik si lo hian, meizuk chu a hlauhawm, tia min han hrilh thinte hi chu e, keini ang kangmei thelha meikhu chhum zing hnuaia lo tal hrep tawhte hi chuan zungchal pawh tiat lo meizial lo khu let let, hui ha, keini chhak chhuah sen loh khawpa tam kangthlelh laia hip lut tawhte hi chuan, sakei ang sen huam kianga sanghar hlau zawk te pawh kan tehkhin rum rum ta ve ang,.

Kan sawi meklai lo hal chu kan hma lawkah a awm ta, tunlai hi chuan mi an fimkhur tawh a, lo vah bak a kana ram ruak leh awlte kangmeiin a tihchhiat loh nan meikawng an sat a, lo bak tumahin an tikang duh tawh lo, a hlauhawm deuh a nih phei chuan lo mawng atanga hal thin mah nise, a lu lam atanga hal changte pawh a awm bawk thin. Meikawng sat tha peih lo leh fimkhur lo deuhten ram an tikang thin hi chu a pawi em em a, chuvang chuan lo neia eizawngte pawh kan fimkhur a, ram tikang lo tura tan kan lak a ngai tak zet a ni.

Duh leh parchhuang nguk nguk khawpin lo chu hal tur a nia lawm, mahse vah bak ram tihkan erawh chu a dik lo va, T. Melody ten, Mahni inhrem reng mai zawng, A nuam ngai em nii? An ti ang deuh hi a ni. E, anni sawi taka zarah chuan, anni a mikhual zawk khan hman kum khan chawi eiah min han sawm tlat peka a lawmawmin an zahawm hle. Chaw eina tur Hotel Khatlaa mi, Baptist Bookroom piaha mi saw kei a tualchhung zawk khan kan lo hre lo pek a, min hrilh chawp a, kawtah min lo hmuak, a nuam e,, zahthlak bawk si.

A hun leh ni chu a thleng dawn ta e, tun ang hun leh kan hma lam hun eng emaw chen hi chu khua a roin kangmei chhuah a hlauhawm takmeuh meuh a, mei lakah mi tinte kan fimhur a tul khawp mai. Lo hal hun a han nih meuh hi chuan e, fartuah leh vau pawh an vul tawh a, romei zamah keini ang hi chu lunglengin kan kan tuiral lo chauh chu a nih tawh thin hi, mahse lunglen lam a ni lo, kangmei lam zawk hi a ni, ngaihtuah tul thin chu.

Kan sawi tawh a, kan sawi zel bawk ang chu. Ram tihkan leh lo hal fimkhur loh avanga kangmei chhuah hi a pawi thui thei em em a, IPC an tih mai angin chutianga kangmei tichhuaktu chu lung inah rei tak tan theina a nih mai bakah tangka tamtak chawi theih a ni, tih hi i hre nawn fo ang u aw. Meivap leng chum chum leh ni sen rum khawp a, a ni, zan thla eng pawh chawke nirui meng ang maia sen rum pawhin awm phah ni mah sela, lo hal vang a nih chuan dan reng a kalh lo ve. Mahse fimkhur loh leh inthlahdah avanga ram tihkana kangmei tihchhuah erawh chu dan kalh a niin thiamthu sawi tur reng a awm lo vang a, dan anga kan chunga rorel kha kan hmabak a ni mai zawk si a.