KUM 42-NA

Hun leh kumte an inher liam zel a, Ṭhalah hnah hlui hnah tharin a thlak a, A iangin kei ka hel lai di ve khan, Tlei dang tawnah min thlak ta e, tih ang maiin hun leh ni, kumte an inher liam zel a, tunah chuan hmanlai khuarei a lo chang zo ta. Hun ral ta zawng zawng ka thlir a, A chuaiin mual an liam zo ta, tih hi a ni leh mai si ṭhin.

J.L. High Sikulaah 1974 khan pawl kua kan zir a, kan Headmaster chu Pu K. Lawmzuala a ni a, pa zaidam leh hriatthiamna ngah zet, fel tak a ni a, Pi Lalsangzuali(L) te leh Pu Saia (L) te, Miss Rini leh Pu Thatlinga te leh mi dangte kan zirtirtute an ni a. Tunlaiah hi chuan hmuh tur a awm tawh lo va, Wills Plain an ti ni tain ka hria, a kawm chu a var deuh a, a dum hian arang deuh rak a, cheng hnih leh duli man a ni a, a chhungah chuan tlawn sawm a awm a, chutih hun lai chuan a to leh man tam ber a ni. Hei hi sakhi sarep a ni lo va, meizial cigarettes a ni zawk.

Chuti taka to leh man tam bik chu a tui a ni ang, tih chu rinna mitin kan thlir a, kan lei ta a, a hmain meizial kan la zu chhin ngai lo va, nawalh sakawr lu chuang ngei chu kan han nawt zit pher pher a, kan ṭan kai a, kan han zu chu a lo dam diai niin kan hria. Meikhu ringawt hi chu chuti em em chuan a tui lem lo va, puar phei chu har tak a ni bawk, buhchiar emaw kanro emaw chi pawh a ni lem lo, mahse tui kha kan ti ve miau si. Arsa kanro nen a tui dan erawh a dang viau, hrethiams?

Chunglai hunahte chuan e, tunlai angin puipunna hmuna meizuk khapna dan an tihte hi chu a awm lo a ni mai lo, inlarna ropui deuh hmu ṭhinte leh zawlneite pawhin an mang lam ram pawha an la hmuh phak loh a la ni a, khap a nih si loh chuan phal a ni tihna a ni mai. Kan zu kan zu ta mai a, hemi kum atang hian mei kan zu chu a lo ni ta der mai.

Hei le, tunah chuan kum 2016 Vau thla, aw Ṭuahpui leh Vau an vul leh ta, tih hun kha kan lo chuangkai ta reng mai, ka han hawi kir a, a lo reiin a va lo thui ta em, mihring lam kum chhiar ang chuan kum sawmli leh pahnihna a lo ni der tawh mai. Aw thlanmuala ka kal changa lungphun leh thlana inziakte ka chhiar chang hian e, ka meizial zuk zat kum pawh dam loa mual min liamsan hi an va tam em. Meizial pawh zu ve hman lova kal ta lah an tam narawh e. A thawka phita Dr Mamuana ten, meizuk hi dam rei lohna, tia min hrilh thlazen thin hi chu a tak ramah chuan awih a har duh thin lam chu a ni e. Accident-a thite hi asin tam chu, meizu hi an tam avangin accident-a thi emaw, sikserha thi emaw pawh ni se, a tam ber an nih thin avangin, meizuk hi accident-a thihna a nia, ti ila chu an nuih a za leh si ngawt chuan ka ring, Ring la i nung ang, tih ang khan. Chi al ei hi thihna ti ila, thi zingah ei lo an tlem hmel sia a awihawm phian reuh lo ang maw?

A ni e, hei erawh ka lo hre ta, mei kan zu emaw zu lo emaw ni loin, Ka hnaih deuh, ka hnaih deuh, Ni tin ka hnaih deuh thin, tih hla ang khan kan thih ni hi chu mi tina mi te, chi tina mi te, hnam tina mi te, ram tina mi te, awze mi leh Greek mi a awm theih loh, hausa leh rethei, mi lian leh te pawh, kan hnaih hret hret vek zel mai hi a lo ni a. Sikserh a ni emaw, cancer a ni emaw, TB a ni emaw, thih chhan avanga Hremhmun leh vanram kawk lah ni hek suh.

Tunah zawng khua rei a chang zo ta, A tlang a mual mah dang si lo, Ka thlir thin ni chhunah, Suihlung rualpui lenrual zawng khan, Raltiangah thlir ve maw, Hrawvan a lo ti ang deuh khan, thlirin hawi kir mah ila, kum a lo vei hnem ta, hun leh nite a danglam zel a, tunah chuan puipunna hmuna meizuk pawh dan anga khap a lo ni ta. Chhia leh tha hriatna zawka hi a pawimawh ber fo va, he dan a pian hma daih, Thiangzau unauten, Dana lo kiang teh ka nau i ni, Lal Isua nen hmangaih puan kan zawn lai kha, Nang hi khawiah nge i lo awm le? An ti ang deuhin, biak inah tumahin meizuk an khap kan hre lo, mahse zu duh khawpa mawl leh a erawh tumah an awm lo ang hi a ni ber mai.

Chu kumsawmli pahnih chhung chuan thil a inher danglam zel a, dante pawh hi kan mamawh ang zeal siam ṭhata tihdanglam a ni fo va, a thar pawh siam a niin a hlui paih a ni fo bawk ṭhin. Tuna kan dan sawi lai pawh hi thil thar tak a la ni a, a bawhchhia vaia taima fe fe lah an awm nawk a, an fakawm, PC Act dan kalha chea eiru hausa thur thur mana chawitir tur erawh chuan an taimak leh mak loh kan sawi ve tur a awm lo.

He dan thar avangte pawh hi a ni mahna, kohhran thenkhat phei chuan zuk leh hmuama fihlim lo chu pulpit-a thusawi hial an khap a, eiruk laka fihlim lote erawh an khap lem lo thung emaw ni, ka hre law. Inti Kris zual deuh leh inti thianghlim famkim zual deuhte phei chuan zuk leh hmuam laka fihlim lote vankai an ui dawn dawn a, a vanram neitu leh van Gate-pui vengtu an ni lo hlauh erawh keini tan malsawmna. A engapawhchu nise, danin a khapna hmunah chuan kum sawm tam zu tawh mah ila, dan zaha zawm duhna thinlung avang zawkin kan zu lo mai tur a ni a, eng dan pawh nise la, a zawm chu keini khua-leh-tuite bat leh tihtur a ni, tih hi i hre nawn fo phawt mai ang aw. Vawiin hi lo hal huna ruat a ni lawm ni? Zan lama thla tiave dawn eng pawh meikhu avangin a sen rum ngei ang.