GOOD FRIDAY

Lallukhum ropui ber mai chu, Hnehtu lallukhum chu, Vanah Isua ka hmuh hunin, Kei pawh ka khum ve ang, tia Mrs Stockton-in a han phuah chhuak mai hi chu a ropui a, a letlingtu Suakkunga pawhin a let nalh kher mai. Tun hmaa pu R.Zuala (L)-te titiah, kan Lalpa Peteran a phat laia ar khuang kha tu ar nge ni ang le? Tia an zawhnate chu rinthu mai lo chuan hriat a har khawp ang.

Kan tana a lo pian hun Krismas kan lawm thin, a ropui e, lawm tlak a ni, mahse kan tana a thih hi a ropui a, keini ruaiin kan hmang thin a, kan hma lawkah chu hun chu a lo awm leh ta. Thla bial lai nena hmehbel thin a nih avangin a thla erawh a dang fo va, Zirtawp zanah kher a lo bial bik thei si lo. C.I. thin Pu Zatluanga tawngtaiin, Lalpa Muka ten ngil auaha dingin an fak che a, keinin khuang leh lamin kan fak che a, khawi hi nge maw i duh zawk lo ni reng le? A ti a, Lalpan a zu chhang chiah lem hlei lo ang deuhin, ka u Revd. Chauthuama te ang hi chuan lam leh kutbeng zawngin an fak khat ve ngawtin a rinawm.

Tumkau Chawlhni zingah naupangten tumkau kengin kawng zawhin an fak a, an zai a, kan Lalpa hi naupangte fak tawk velah kan ngai emaw tih a awl rum rum thin. Kan sawi tawh thin a, ka sawi leh dawn tho. Kan Lalpa khan Jona chhinchhiahna lo chu chhinchhiahna dang a neih loh thu sawiin, Jone nghapui kawchhunga ni thum leh zan thum a awm angin Mihring Fapa pawh leikawrawng chhung (chu chu thlan a ni a)-ah ni thum leh zan thum a awm tur thu a sawi a. Zirtawpah a thi a, Sunday zingah a thawh leh si chuan leikawrawngah nithum leh zanthum chu a awm thei lo hrim hrim mai.

Zirtawpah a thih chuan, dar 6 velah an phum angah ngai ila, Zirtawp zan zan khat, darkar 12 chu. Inrinni nileng a mu a, zan khat leh ni khat darkar 24 a ni ta. Inrin zan zankhuain thlanah a awm a, zan hnih leh ni khat a ni ta, darkar zawng chuan darkar 36 tihna a ni. Sunday zingah a thawh chuan thlanah zan hnih leh nikhat chiah a awm a, a chhan chu Zirtawp zan zan khat, Inrin nileng leh a zan zankhua, zan thum leh ni thum chu a ni lo chiang mai. Chuvangin kan Sabath unauten an chhut dan thin hi kei chuan ka pawm khawp mai. Anni chuan Nilaiah a thi niin an ngai a.

Nilaia khenbeh niin tlaiah phum ni sela, Nilai zan zan khat, a tuk Ningani nileng, zan khat leh ni khat, Ninga zan zankhua, zan hnih leh ni khat, Zirtawp nileng, zan hnih leh ni hnih a ni ta. Zirtawp zankhua, zan thum leh ni hnih thlanah a awm ta. Inrin nileng a awm leh a, tichuan zan thum leh nithum thlan leikawnrawngah a awm ta tihna a nih chu. Chu chu darkar sawmsarih pahnih tihna a ni. Sunday zingah a tho lo va, Inrinni tlai, an phum hun, dar ruk velah a tho leh ta a, tichuan a lo sawi lawk angin zan thum leh ni thum a awm ta tihna a ni. Mahse zanah tumah thlan tlawhin an kal lo va, Sunday zingah an va kal a, a tho lai tak chu tumahin an hmu lo va, thlan ruak an va hmu ta a nih kha. Chuti a nih chuan zan thum leh ni thum, darkar sawmsarih pahnih chiah a awm a, a dik thlap mai. Zirtawpa a thia tlaia an phuma Sunday zinga a thawh leh si chuan ni thum leh zan thum a ni thei lo khrim khrim mai.

A tha vek e, a pian ni taka kan hre lo ang bawkin a thih ni pawh kan hre lo a ni berin a lang. Chu chu a pawimawh ber lo va, a lo pianga kan tan a thi a, a tho leh ta zawka kha a pawimawh chu a ni a. Keini Kristiante zingah pawh kan rindan a inang lo nuai a, Bible pakhat hmanga ring theuh theuh pawh kan rindan a inan loh avanga pawl tam tak awm kan nih hi, mahni rindan dik berin kan ngai vek bawk si a, I duh leh ngai thiam la thiam lo la, Kan biak dan hi a rual tawh chuang hlei lo’ng e, Kan kal zel mai dawn e, Zion-ah, tih hi a ni leh mai thin.

Khawvelah hian sakhaw hrang tam tak a awm a, a hmingah buai suh ang u. Setana pawl pawh lo awm ta sela, tha taka an khawsaka dan an zaha an zawm phawt chuan mana hrem theih an ni lo. Isua Krista pawl, Vantirhkoh Gapriel-a pawl pawh ni ila, ruk kan ruk a, tual kan thah a, drugs kan tiha dan lo anga kan awm si chuan kan awmna pawl hmingin awmzia reng a nei lo, mana jail bang zut chiah kan hmabak a ni mai.

Chutiang chuan keini Kristian inti zingah pawh rindan leh duh dan inan loh avangin pawl hrang hrang kan awm fur mai, tu pawl leh tihdan nge dik ber tih chu kan awmna pawl theuh tih dan kha dik bera ngai vek kan ni. Kan duh ber leh tha kan tih ber sakhua kan vuanin kan be thei a, sakhaw pakhat chhungah pawh kan rin dan ang ringa duh vete nen zai khatah kan luang a, zalen takin kan awm thei a, kan Lalpa pawh chu Zirtawpah a thi nia ngai leh ring a awm theih a, Nilai nia thia ngai lo awm pawh nise, an thu a ni a, Thawhtana thia ngai pawh awm se an thu a ni mai. Heng zawng zwwngte hi kan zalenna, India danpuiin sakhaw zalenna min pek, sawrkarin sakhaw tih bik a neih loh a, a khua leh tuite kan duh duh sakhua ringa vuan thei tura zalenna min pek avang a ni, tih hi i hre fo zawk ang u.