Chhuak zung zung lem lo

Chhandamna Sipai Pawla an Officer, Lt. Khuanghnuna chu Ratua a awm laiin a pawlte chuan an nelin hrawn nuam an ti a, mahse Ratua awm reng thei erawh a ni ngawt bik si lo. Hun a lo kal zel a, hmun danga a insawn a ngai ta a, an ui em em mai a, mitdel hla phuahthiam, hla tha tak tak phuah thintu, Laithangpuia chuan a pualin hla a phuah ta a.

Hun tlem te chauh kan nei ta, Rualduh kan len za nan, Nemten la i, lei awmhar chu, Keini min ngai lo ang che aw, Chatuan ramhlun khian inhnem la, a han ti ta a nih chu. A tha thlawt asin. Lunglen tinkim dawn za a, Ngai chunga ka ṭhente; An kal lai ni aw tinem la, Thlemna chhumpui lo zing mah se, An kawng Lalpa tieng zel rawh, a han tite hi a lungrun thlak takmeuhin ka hre ṭhin. Aw kan hranghlui hla phuahthiamte kha an va lo hlu em, an hlutzia hi thangtharte hian kan hrethiam lo palh ang tih hi ka hlau ve fo ṭhin.

Mualcheng khua Thangsela fanu nula a thi a, a tuar em em mai a, nu tel lova a lo enkawl seilen ve chutia a han thi ta mai chu Leng lal Saihnuna hla phuahsak tura ngenin lehkha a thawn a. Ka fanu hi nu nei lovin rethei takin, mi vawk chaw pek tluk pawh ei lova ka chawm len ve a ni a, a lo nula ve a, ka lawm tehlul nen, min thihsan ta si a, tiin. Chu lehkha tawi te chu Saihnunan a han chhiar chuan a hnuk a ulh a, a mittui chu dan rual loin a sur zung zung a, A ni tak e, he lei hi zawng chatuan ram a tling lo, a ti chhuak phawng mai a. He lei hi chatuan ram a tling lo, Lungngaia ṭahna a ni maw, Lalpa? tih hla chu a han phuah ta a nih chu, vawiin thlenga khawhar ina kan sak lar ber pawl a la ni ta zel a nih hi.

A ni e, thu hi hla a ni a, hla hi thu a ni, an ti thin, a dik ang, chutianga keini hlaa kan lung a len a, zan thla eng leh fartuah par, vau para kan kur mek lai chuan, court lam lah hian an chhuah zung zung zel a, tia lo phun tawk kan awm thin a nih hi. Mipui an thuhmun fo thei lo, dam leh damlote an awm thin, tih hi a ni leh mai si thin. Mi tinte hi kan sawi tawh fo ṭhin angin mahni ram dan chu hre veka ngaih kan ni a, dan ka hriat loh vang a lawm mawle, tih hi chhuanlama hman theih a ni lo.

Chhuanlama hman theih nise chuan e, pu R.Thangkanglova hian a nuthlawi it zawng tak a pawngsual ang a, dan ka hriat loh vang a ni e, a ti ngei ang. Ani hi a damlo Delhi-a inentir tura a kal dawn khan, eng dang a ni lo ve, AIDS ka vei a nih loh chuan cancer a ni mai, a khawi emaw zawk hi chu a ni hrim hrim ang, tiin inthlan dawna Party zawlnei thu puang, dik leh chuang lem hlei lo aia zawlnei zawkin a lo puang tawh a. Ani zawng Party zawlnei a ni lo va, a sawi dan chuan Party ka han zawm ve tawh hi chu an tla zar zar zel, a ti. A lo puan lawk ang ngeiin a vanneih asiamin AIDS ni loin cancer a lo ni hlauh a, dan hriat loh chhuanlama hmana nula khuaikhem pawh a tum loh phah ta, kan lawm hle.

Mi dan bawhchhia a, thil sual tia an puha an man emaw thubuai an siamsakte reng reng hi, an thubuai siamsaka zir khan charge sheet an tih mai hi court-a an thehluh hunbi tiam a awm ve a. A hremna kum sawm chung lam, dam chhung tan theih emaw khaihlum hial theih emaw a nih chuan ni sawmkua, thla thum chhunga thubuai chhuitu khan a thehluh a ngai a. Kum sawm hnuai lam a hremna a nih thung chuan ni sawmruk thla hnih chhung a ni thung a.

Khimi hun chhunga a chhui zawh hman loh a, charge sheet a thehluh hman loh chuan, bail-a chhuah ngei ngei a ngai a, diktak chuan jail-ah dah zel kha a thiang lo a ni. Bail-a chhuah thiang lo thubuai kha bail-a chhuah tur thubuaiah a lo inlet ta a ni, ti ila kan daw tampui lo vang. Keini jail-a luta tang ve lote tan chuan thla thum emaw thla hnih emaw chu rei lo teah a lo ral thuai a, a tanga tan erawh a rei viau thung ang. Tichuan, hun tiam chhunga thubuai an tihfel hman loh lah chu a tam mai si a, a chhuitu tan harsatna tam tak a awm tih reng kan hriatthiampui si lo.

Hun chu a ral a, court chuan i duh ang leh ka duh ang ni ngawt loin, dan anga thil a tiha ro a rel a ngai a, khuangpui leh baja, haw-hawa au zam chi a ni lo va, nawr luih chi a ni hek lo, dana dinga dan anga rorel tur a nih miau avangin dan angin a han rel ta ngei a, mi tang kha bail-in a chhuah a, keini lah chuan danin engtin nge a tih, tih lam ngaihtuah si lo khan, court lah hian bail-in a chhuah zung zung zel a, te hi kan lo ti thlazen hman bawk thin a nih hi. Chutiang a nih loh pawhin damlohna avang emaw, harsatna eng emaw avang pawhin bail theih loh thubuaia tang kha court chuan bail-in a chhuah thei tho, tih lah kan ngaihtuah hek lo. A thawka phita court lam lo dem ve ngawt kan ching fo, hria sela chu ropuina Lalpa an khengbet lo tur, ang hi a ni ber mai.

Hengte hi kan sawi tawh ṭhin a, mahse sawi nawn a ngai fo ṭhin a lo ni e. Kan pian ve hma kum thum aia rei tawh, zan thla eng leh nipui khaw lum pawh kan hriat ve tho ni mah se, kan inhrilh mawlh mawlh tho a, chuvangin kan hriat hnu pawh lo ni tehreng mah se, han sawi nawna han inhrilh leh hi ka inthlahrung bik lem lo a ni e.