TLANSAN RAWH AW

Kan tleirawl ve ek ek tawh a, Tuirivangah Pu Pasena nen kan kal a, lungpui chungah hian tui a lo tling a, sangha te reuh te te a awma tui chu ka thehkanga sangha chu ka mana mautheiin ka chhum a. Lungpui chungah chuan chaw kan fak nghal a, sangha chhum suan hlim kha kan hmeh a, mautheia mi a tui kha ka in chu duh aia tam a rawn baw ta huk mai chu le, ka chhak zak si a, a so suan hlim mai a ni bawka a sa lutuk ka hmuam dai ṭhak chu maw, ka ka hi a sa hut hut mai a, a durh pilh puap mai. Sa tak a ni sa tak. Hremhmun kal zuamawm loh tak a ni. Pu R.Thangkanglovan, kei chu vanram aiin hremhmun lamah hmelhriat ka ngah zawkin ka ring, ka kal chak zawk, a tih nen chuan inang lo tak a ni.

Dam lai tuipui fawn piah lamah chuanin, Ka lungkham ram eng mawi chu a awm, tih hla mawi zet chu 1923 khan Pu C.Z.Huala chuan a phuah a, chu hla chu Khawbung khaw hla phuah thiam Patea chuan tha a ti em em mai a, ni khat chu feh thulh hialin hla phuah turin ramhnuaiah a chhuak ta hial a, Pathian hnenah hla dilin a tawngtai a, mahse eng a ang chuang lo, a hlawhchham thak a. Tlaiah mite feh an haw tawh hnuah a haw ve chauh a.

Kawtchhuahah Khawbung lal lungdawhah a chawl a, a thu a, chutih lai chuan thlipui leh ruah a lo thawk ta chuk chuk chuk mai a, savate chuan an hlau a, a thutna kianga bung chu an rawn pan nak nak hlawm a, ani chuan a lo thlir reng a, a rilruah chuan Angel leh chhandam faten, savaten him nan bungpui an bel ang khan, him nana Lal Isua an bel tur chu a suangtuahna ramah chuan a lo lut a. A hma zawng khami nia hla phuah tura chhuak pamtul khan awlsam tein hla mawi leh nalh tak mai chu a han phuah ta lawi si a nih chu.

Ka damlai thlipui a ral hunin, Ka lal chhandamtu hmel chu ka hmu ang a; Chutah ka lawmna a chuai lo ang, A hmelah van pangpar a vul reng ang a, tih chu a han phuah ta a. Thlipui leh ruahpui hlaua savaten bung zar an bel ang khan, Angel varte pawhin Nunna thing Lalpa chu an bel ve dawn a ni tih chu a thinlungah a lo lang uar uar a. Aw nunna thing, i zar hnuaiah, Van Angel rual hlimin an leng; Aw chutah kan chawl ve ang, Israel tlang thianghlimah chuan, a han ti zui ta nghal a nih chu.

Kan ramah MLPC Act angin zu zawrh a ni a, mahse damdawi ruihtheih, heroin an tih mai hi tunlai hian a hluar em em mai a ni, tih chu zep thu a cheng lo a, kan hre vek awm e. Hmana to deuh deuha an lei thin kha tlawm tak takin lei tur a awm niin an sawi a, a dik pawh a dik ta ve ang. Hetianga damdawi zuar a, ti a, dan lo anga khawsa thinte hremna turin dan ding sa, ND&PS Act an tih hi kan nei reng a. Heng ang avanga an mante thubuai hi Special Court khawih a ni a, Ukil ruaia an manten bail an dilte pawh Court hian a chhuahsak duh ngai meuh loh avangin Ukil thenkhatte phei chu an vui hial nia sawi a ni.

Amaherawhchu, Cr PC an tih mai, chang 167 anga a hun chhunga charge sheet a mantu lamin an peih hman loh chuan court chuan dan angin a chhuah lo thei lo a ni mai a, chu chu thudang ni se. Kei tehlul hian zawhna ka dawn tam ve, a chhanna dik ka hriat theih si loh chu hei hi a ni. Dan angin zu zawrh a ni chung sia engvanga drugs hi hluar em em nge a nih a, a man hial tun hma aia a tlawm theih zawk le? Tih hi a ni. Zu card nei ve ta lo chuan an zawrh pawh chu ka la tem chhin si lo, an damdawi lah chu ka ha nget nata hman kuma ka hnawih, a dam chuang si lo a kha em em tih loh ka la tem ve bawk si lo, a chhan dan thiam har tak a ni.

Ni e, zu hi dan anga zawrh a ni ngei mai, mahse card neite chauhin an lei thei a, a zalen lo chu kan ti lo, mahse zalen takin bawm tawt takah khung hnan a ang berin kan hria. Hmanah kha chuan kum 18 chung lamain a duh duhin an lei thei a, tunah hi chuan lei phalna nei card neite pawhin lei turin harsatna an tawk fo niin an sawi a, dik maw dik lo maw, ka hre lo. Zu hi zalen taka zawrha in theih angin a lang a, mahse a nihna takah erawh chuan, khawvel ram zau taka thereng chi khat Chepchep a chep ang deuh hi a ni ber ang. Ka Pu Lalber Huma Mizo chuan, Zu hi a zalen lo, lei tur chuan beih fe a ngai a, chuvangin kan thalaiten drugs an tih phah ta a nih hi, a ti ve thung, ani sawi hi chu thudik pawh nise dawt a ni tho ang, hui hammm.

Awle, tunah hian man tlawm zawkin drugs a tam pawh a ni thei e, mahse nakin lawkah i tana hlauhawm leh chhiatna tur a ni e. A thlawn pawhin lo awmin pe che mah sela, aw thalaite u, drugs leh zu hi tlansan ang che, i tih loh avangin i thi dawn si lo va, tunah tlawmin lang mah se, tamin itawm angin inlar mah sela, hnung chhawnin i lo tlansan zel dawn nia aw, drugs bawiah lut ngai suh la, a lut tawhte hi en la, chhuah a har em hi, nang chu lo inthiar fihlim la, chu chu dan pawhin a phut che asin. Lo fimkhur ang che.