APRIL PAR VUL LO E

Lunglei Zotlang lal, R.Thanghuta a ni a, lal fel leh a khua leh tuite pawhin an ngainat em em a ni, tuna Tourist Lodge awmna saw lal in awmna a ni thin. Lal in an sak laiin rangva leh thil dang chu Rangamati aṭanga lak ngai a ni a, tunlai angin motor a la awm lo a, mihringin phurh a ngai a, mi thenkhatin hna a ti tam lutuk a buaithlak tiin lal chu an khing ta a. Lal fel leh tha a nih ve naka laia chutia an khing ta mai chu a rilru a dam thei mawlh lo.

Buaina chhumpui a tana zing chu kiang se a ti em em mai a, tichuan, Buaina lo kiang la ka ram ka chuan ang, Khawvelah hian ka thla a ngam thei lo; Lalpa siam Salem thar ka thlir ang e, a han ti ta a. Aw a chang tawp ber hi ka duh em em mai thin a, a mawi ka ti a, thinlung a fan thin. Ka damlai ni hi thlanah ka pel ang, Mahse min nghahna ram ka pan zel ang, Luipui luang ri rehnaah ka chawl ang, tiin a hla chu a han khar ta a. An lalpain Lalpa a auhna hla an han hria chu a khua leh tui tamtakte rilru a hneh em em mai a, lal in pawh chu phur takin an sak zawm a, 1935 khan an sa zo ta nghe nghe a ni.

A ni e, buaina chhum hian khawvela kan awm chhung hi chuan kian zai a rel tak tak thei lo, tunah pawh April thla chawhnu lam kan lo chuangkai leh ta reng mai, chung lam thla pawh a eng no ruai a, kan lung a leng thin a nih hi. Mahse April par erawhin vul zai a rel thei lo, April par May thlaa vul thin a nihna chu a la pangngai reng a, mahse chumi avang chuan May par a nih phah chuang lo, a hming leh nihna a inhmeh lo a ni ve mai zawk.

Chutianga April par vul sen chuk thin May thlaa kan lung a tihlen a, mawi ti em em leh Pathian thil siam ropuizia tilangtu nia ngaia kan thlir ban loh lai chuan ka u Revd. Chuauṭhuama lahin khawvelah zu hi sual berah ngaiin a lo tawng ve chamchi a, kan lawmpui hle. Sual tinreng bulah an puhthlu lek lek mai thin zawng a nih hi, a ni e, dan lam mit aṭanga thlir chuan maw, keini Mizoramah chuan MLPC Act kan nei a, phalna nei tan chuan sual ni loin leia in a thiang a, a nei lo tan chuan sual a ni thung a, dan bawhchhiatna a ni thung.

Mahse kan Pathian thu erawh chuan zu ni loin, tangka sum ngainat hi sual tinreng bul a ni, a ti thung a, Pulpit tlanga sual tinreng bul Bible-in a tih han sawi ta khiah erawh an tam lem lo hle thung a, ka u pawhin nakkumah chuan zu a vei ang zetin eirukna sual pawh a la vei ve turin rinnain kan thlir a ni ber. Bible-ah chuan eirukna sual hi thih phah an awm tih kan hria a, Akana te chhungkua pawhin an thih phah a, mi ram ni lo, anmahni ram man ngei an lo hlepruka an zep then avangin Anania te nupa pawhin an thih phah a nih kha, April par vul lai a nih leh nih loh erawh kan hre lo.

Kohhran thenkhatte pawhin zuk leh hmuam ti chu sual berah an ngai a, a ropui hle, pulpit tlanga an Aw Lalpa ve pawh an phal lo, an phal hauh loh mai, mahse eiruk hmang Aw Lalpa erawh an khap lem hlei law, mak tak chu a ni. Eiruk hmangh hausa thawhlawm thawh tam thei, meizu lo, kuhva ei lo, sahdah hmuam lo, H.Zoliana tlangval laia ipte chei ak a, Midum nihliap hawla kal paha a pik puat puat anga pik ve lote erawh chu an thianghlim vur ang a, Pulpit tlang aṭangin keini Beram zingah pawh a pisil deuhte phei chu chhuk zawng a, Rul thlahte u, min tih khum thei ta tihna a lo dawn a, chhoh chhan a rem dawn si lo. H.Zoliana sawi takah chuan tuibur pik puat tawh loin Pathian thuhriltupa a lo ni tawh a, kan vengah thuhrilin a lo kal a, ka inkhawm ve a, kan pawl erawh a dang a, Pulpit tlang aṭangin min dintir ta mai a, hei Upa K.L. Liana a nih hi, a rawn chhuk tih chu e, ka ni lo e, han chho tih a rem si lo, ka kohhran Upa din ve top, Upa tak tak emaw min ti hlawm ngei chuan a rinawm, aia naupangte ai chuan ka upa zawk a, a dik ve tho a lawm ti raw maw?

Aw April par chu May thlaah vul mah sela, dan reng a bawhchhe lo va, hrem theih a ni lo va, khap theih a ni hek lo, a mawina a dang chuang lo, ka thlir a bang hek lo. A ni tak a, zu pawh chu MLPC Act angin lei phalna nei lo tan chuan leia in a thiang lo, a sual a ni mai ang chu. Eiruk pawh chu PC Act angin phal a ni lo va, eiru chu dan bawhchhia an ni a, chutiang zel chuan, puipunna hmun leh khapna hmuna meizuk pawh chu danin a khap avangin sual a ni. Mahse danin a khapna hmun ni lova Zozial tui tawk, lachhum hringa tawn kan pak khu liai liai kan si hliah hliah erawh sual a ni lo, dan khap a ni hek lo.

April par chu May-ah vul mah se a pawi lo ve, chu ai chuan dan lo anga khawsaka dan bawhchhiat hi a pawi zawk a, dan pawhin a phal ni na na na sual anga kan en a, ka hmu Hmuithla thin erawh a dik chuang hek lo. Aw kuhva angte phei hi chu e, keima tan chuan engahmah a ni lo va, dan pawhin a khap lo, kan unau tam takten dan bawhchhe si loin ei zawn nan an hmang a, a lawmawm hle mai, kha daih kha asin, chanchinbu lam aṭang pawhin kan hmu a, Bilkhawthlir ringawt pawhin kuhva rah aṭangin nuai zathum zet an lei a ni lawm ni? Kuhva eiho vanga hralh thei an ni si a. Dan reng an bawhchhe si lo.