SUAL SIPAI RAL

Keinin zan thla eng kal ruai leh fur khaw thianga kan lunglen thu kan sawi thin lain ka u, Revd. Chuauṭhuama te thung chuan z u sual a nihzia leh a ṭhat lohzia an sawi zawk ṭhin a nih hi, ATC kawtzawl, nuam leh zan thla eng thlir nana Khuanu duan ni awm tak aṭanga lungleng taka vawt ti chung chung pawha kan thlir laiin ka u chuan, ‘ka lung a leng ve ngai lo,’ a ti mauh mai. Chutihlai chuan keini thung chuan, Lunglenah rualkhum a awl awm e, kan ti thung si ṭhin. Hnam mualphona, sual tinreng bul a lo ni e, tiin hlaten kan han sak khum thul, mahse kan Pathian thuin sual tinreng bul a tih erawh chu tangka sum ngainat a ni.

Sawi fo tawh ṭhin angin India danpuiin sakhaw zalenna min pek a zarah keini pawh Kristian kan ni a, Kristianah pawh chuan kohhran pawl tam tak a awm leh chhawng a, kohhran nihna avanga khua leh veng aṭanga hnawhchhuah tuar erawh an awm ngai lo tluk a ni. Chutihlai chuan a din tirhin Chhandamna Sipai Pawl zingah kohhran avanga hnawhchhuah tawk an awm a, chu chu Aizawl aṭangin a ni.

Durtlang lal an bel a, a lo hum ngam lo va, Sawleng lalin a lo hum ta a, chuvangin Mizoramah chuan Sawleng khi Salvation Army-te hmun pawimawh leh tamna a lo nih phah ta. Khatia a lo din tirh lam khan an hmunpui Sapramah zu hek deuh an lo awm a ni awm e, chuvang chuan London chuan an inzawmna chu a rawn chhuchat ta mai a. Chhandamna Sipai Pawla mi, mitdel Laithangpuia, hla phuahthiam, hla pawh tam tak phuahtu chuan chu chu hla mawi leh ropui tak phuah nan a lo hmang ta hial nghe nghe a.

Sual sipai ral nen ni tin kan indo thin, Thih theihna tur hmanga min beih chuan Ka chau tawh hle a; Lal Isuan a ralthuam min neihtir hnu chuan, Ngamnain ka um leh ta a ni, tiin a au chhuak ta hial a. Chutah London aṭang chuan an lo kal a, thil awmziate an rawn thli thlai a ni ber a, an han chhui chian hnu chuan an inzawmna hrui, Ka uaina hrui a chat a, A chat ta hmawk a ni, tih ang maia chat tawh chu suihtung-tu-rut ni lo, suihtak ngatin an han thlun zawm leh ta chu, Laithangpuia lawmah a tla a, ani lo pawh an lawm tho mai.

London nen an inzawm leh tak avang chuan a lawm em em mai a, chumi a han hriat chuan, I angchhung muanna tunah chuan ka thleng ta, Kan lawm hla thang chhuak se, lei leh van Mi zawng zawng hnenah; Sual thihna thima leng min chhanchhuak leh ta, Ngaih man i awm ka tawng chhan Lalpa, tiin a hla chu a hmawr a bawk ta a lo ni e.

A ni taka, ni tin mai hian sual sipai ral nen kan indo thin a, kan hneh loh chang a va tam em. Thlemna turni hi ka do zo lo, kan tih a tul fo thin, Amah kan Ukil Pu R.Thangkanglova of cancer-in, kei zawng Setana hian a thlem ve ka ngai lo, min thlem hmain ka tih khalh zel, a ti ang ngawt hi chu a ni thei si lo. Kan do a ngai a ni, sual hmanrua tal kan do a ngai, Lal Krista tan dopui turin sipaiah kan insiam tih ang khan.

Chutianga ralpui phiar taka phiar chuan, kan tlawmngai pawl YMA-te pawhin drugs an do va, anni pawhin, I angchhung muanna tunah chuan ka thleng ta, an la tih ve ngei kan ring a ni. Hetianga sualna do tur hian dan pawh kan nei dim diam sa a, kan sawi thin angin ND&PS Act a awm a, chumi bawhchhia chuan mi tam takin damdawi an zuar a, a chhan ber pawh pawisa vang a ni. Tangka sum ngainat hi sual tinreng bul a ni, kan Bible ngeiin a lo ti hi a va dik em. Chung sual sipai ral damdawi ruihtheihte chu a tam em em a, Thih theihna tur hmanga min beih chuan ka chau tawh hle a, tih mai hi a awl fo thin ngei ang. Mahse dan kalha chea dan lo anga thil ti a, kan thalaite nun leh hmakhua pawh chhe vek mahse, annin an hausak phaha sum an hmuh theihna tur a nih phawt chuan pawiti lotute hi zam lo leh beidawng loin kan do zel ang a, hnehna chu kan la chang ngei ang.

Hei erawh hria ila, hun hnuhnung a ni ta. sualnate pawh a pun tur thu kan Pathian thu-ah kan hmu a, kan theih tawkin sualna chu kan do zel ang a, khawvelah hian kan do rem dawn lo a ni, tih erawh hi chu hre thung ila, chumi avanga inthlahdah phah tur erawh chu a ni reng reng lo. Tun hma kum tam pawh la ni loah khan, khi lamah chuan an faten zu an in chu an lawm a, hahipin an sawi thin, an ti a, a chhan chu drugs ti lo leh ngawlvei lova zu an in kha an lawm a ni, an tih ka hre fo va, ka nuih liam mai ṭhin.

Mahse thawnthu ang maia ka lo hriat leh tak tak tura pawh ka lo ngaih ngai loh kha kan ram ngeiah pawh hian a takin kan lo tawng ta reng mai chu a nih hi. Chuvangin dan bawhchhiaa drugs-a sumdawnga pawisa hmuh dawn avang leh hausak duhna avanga mi dangte chhiatna tur thlen pawh pawiti lotu, drugs, dan kalha tia zuara hralhtute hi dim loin I do zel ang aw, mahse sakawr tawlailir chu a hnuktu sakawr hnunga a awm a, a hmaa a kal tur a ni lo ang hian, keini pawhin kan dona kawngah erawh chuan dan kalha ti loin, dan erawh kan zahin kan palzut mai tur a ni bik lo thung ang.

Sual sipai ral. Dan kalha thil tih hi a va tam em, do tur hi a tam a, kan do zel ang a, kan lama dan a awm tlat avang leh dan pawisa lotu na na na chu kan um liam hun a awm dawn ngei e, zam lo leh tha thlah loin, I do zel ang aw, chutih rual chuan dante hi zaha zawm tur kan nihzia hi I hre thar zel ila, dan zahin zawm ni ila chu maw, a kalha chein drugs ti thin leh zuar thinte pawh hian an sim ngei ang. Hausak leh pawisa duh vanga mi dangte tana chhiat theihna tur thil tih a, dan lo anga sumdawng chu, malsawmna pawhin a kiansan ngei ang mawle.