LALMANGA NU LAWM RAWIH NI

Huiva te, hawngah mi sawm em ni? Kan la tiam lo hmatiang kan sawn rih dwn e, Mi u an au lo ve swralah. A ni e, hlo kan thlo va, lawm kan ruai a, zan lamah bialnute kan rim a, mei min zialsak a, chu chu kan pai ngei a, ngaih hi a tha veng veng mai. Pa neinung deuhten laltin chhit en tur an nei a, chu pawh a nazawng chuan an chhi phal bik lo va, thingtlang khua tunlai anga elektrik eng reng reng awm lohnaah kan khawsa a, thuka mei an tuah chu kan eng neihchhun a nih avangin kan tan chuan e, khua a han thiang vuk mai a, zan lama thla a han eng thinte chu a hlu bik em asin.

Chu chu hlo thlova eizawng mite kan khawsak dan a ni a, lawmte kan han nei a, lawm rawih ni chu kan nghakhlel em em a, kan han bung chu maw, hmalai kan chawl a, fanghma rah a lo let phung mai a, chemkawm lei kai berh ang lei luai khan kan han vel a, a chhip chu kan thlawh leng diai diai a, kan hlim em em. Fanghma rah chu kan lo va, a pangah chuan kan vit chik hrep a, hming lam tawiin kan ziak a, kawng pengah tute emaw kan chhawlthuai a, Fanghma tuaitir tein chhawl min thuai, Chang lo mah se a chia zuah ka nuam e, Vanneih thil thu-ah a to mahna, tih ang khan.

Vawiin hi Lalmanga lawm rawih ni a lo ni ta der mai, kum khata ni rei ni ber a ni a, a va lunglen thlak ve le. Kan pi leh pute khan tunlai angin sana nei mah suh se, ni rei ni berte pawh an lo hria a ni ngei mai, chuvangin Lalmanga Nu pawhin he ni rei ni ber hi lawm rawih ni atan a hmang a nih hmel khawp mai. Tichuan vawiin aṭang chuan ni a kir tan leh tawh ang a, zawi zawiin a rei lo tial tial dawn ta a ni, tihna a nih chu. Thenkhatin Lalmanga Nu hlawhfa rawih ni anga sawi an awm bawk thin, mahse a lawm rawih ni, tih a ni thin zawk.

Khatia lawm kan ruai, hmalai chawlh kan nei a, fanghma chemkawma vel lei kai berh luai mai chu ten hauh loin kan ei a. Thosi nghalsang lah chuan min vir hut hut mai a, zan lama bialnuten mei min zialsak ngei mai chu vuai-kawi ang teng tawngin kan han phawrh a, nawalh sakawr lu chuang ngei mai chu kan han nawt alh pher pher mai a, kan han tankai a, kan hnar khu chhuah hliah hliah a, kan si hlep hlep a, engmah dang reng lungkham kan nei lo, tui kan ti em em a, arsa kanro nen a tui dan erawh chu a inang lo thung. Kan han pak khu chu e, thosi hlau chu a thlawk vawn vawn. Chawfak a lo hun ta, maian sih thar ser sawr hmeichhiain an bai , vau luiah aiawt kan chiah, chakai pathum a lo tla, kan keu pel phawk baia kan thlak kan han hmehte chu e, tui kan ti, kan puar lutuk, thlam namthlakah kan thu a, ke kan then hiai hiai a, puar engang mah ila e, ram thigpui lum bel, chatuana ata nawh tlet hlawh loah Mizo thingpui fe a lang luau luau a phar duh du, a sen dum rui mai no beng nei hlui khawk sil ngai loh tih hriat takah a vumin an thli, a sa lutuk kan in khawp te tein kan chhem dai kan dawt khelh khelh, Mizo zial diktak lachhum hringa tawn ngei mai kan han pak khu liai liai mai chu e, dam man hi awm kan ti.

Chutiang hun lai chu tunlai hi a ni a, Tirhkoh Paul-an dan avangin sual a lo awm a, a tih kha a dikna chen hi a lo thui khawp hi a lo ni a. Tun hnai maiah puipunna hmunah meizuk khapna dante a lo awm ta, he dan a awm hma kha chuan puipunna hmun pawh nise meizuk kha sual a ni lo va, dan bawhchhiatna a ni hek lo, mahse e, he dan avang hian sual ni ngai lo kha sual a lo ni ta tihna a nih chu. Tun hma MLTP Act leh MLPC Act awm hma kha chuan, a ni e, kan pi leh hunah te khan e, zu sak leh in kha sual a ni lo va, dan bawhchhiatna a ni hek lo. Mahse khing dante khi a awm hnu kha chuan hmana sual ni lo kha sual a lo ni ta a, dan bawhchhiatna a lo ni ta, a hmaa sual ni hauh lo kha engvanga sual lo ni ta nge maw a nih le? Engdang vang a ni lo ve, dan avang kha a ni e, Paula sawi hi a lo dik zet mai.

Lalmanga Nu lawm rawih ni, ni rei ber ni-ah hian e, kan rilrua kan ngaihtuah tur chu, kan khawvel leh nun hi a danglam zel a, kan ni tin hnathawh leh ei leh in, mamawh a danglam tak avang hian dan thar siamte hi a lo ngai thin a, hmana sual ni lo kha sual a ni ta tihna a nih chu. Dan chu a hlui emaw a thar emaw pawh ni sela, kan zawma kan zah hi keini khua leh tuite chuan kan bat a ni. Hmana sual ni lo kha dan avanga sual a lo nih tak avang leh khap a lo nih takah chuan khapna hmunah chuan mei kan zu lo mai tur a ni, khap lohna hmuna zuk mai kha kan bat leh kan tihtur a ni a, tichuan dan bawhchhe lo leh sual ni hauh loin kan hnar khuchhuah thiang tihna.

Zu pawh a in duhte chuan dan angin card neih mai tur a ni a, card nei tan lei leh khapna hmun ni lova in kha sual ni lo, dan bawhchhiatna a ni hek lo, mahse a nei lo tan chuan sual a ni a, dan bawhchhiatna a niin hrem theih kan ni, ka u Revd. Chauthuama pawhin a duh phawt chuan khapna hmun ni lovah zu rawh se, ka Zozial lachhum hringa tawn hi ka khilai ang e, mahse a zawngchhang leh a nga a ngawl a vei erawh ka hlau. Thiante khilaia ngawlvei, miin an ti reu reu ang.

He Lalmanga Nu lawm rawih ni hi e, ni rei ber ni a ni a, zan lamah pawh khua a that phawt chuan thla a eng dawn a nia aw, i lo thlir hawh dawn nia ka phal ang che, sual a ni lo ve. A ni tak a, tuikhuahna tur, rel kawng kalna tur nise, a hmaa ram ruak kha a lo ruak lo khat tlat zel a, thlai tha duh mi an lo ching phui chuk zel a, a engamah hma hauhin zangnadawmna a nuai tel, a maktaduai tela pek a ngai thin hi chu kan ram thanmawh bawk a ni e. Hetiangah pawh hian dan lo leh dan kalha thil tih chu a awm thin a ni ang, chuvanga eiruk khapna dan, PC Act anga thubuai siamsak an awm nual a ni. Dan hi lal ber sela, dan a lalna apiangah zalenna a awm thin, tih a ni si a.