ZU KHAPNA DAN THAR

Mizo pa lar tak ṭhin Bantawia kha, kei pawhin ka hmu ve tawh nghe nghe a, a chhungten, Bana nupui te hi nei ve tawh teh, i phutawk hi i hre lo a ni ang e, an ti a, ani chuan, “Ka phutawk chu ka hria a lawm, an chhe ema ka duh bik lo a nih hi,” a ti e, an ti. A ni thei dawn khawp mai, P.L.Liandinga nupui hi chuan a phutawk a hria, a iai lo, lawm takin a pawm mai, entawn tlak lehling khawp, ka tahte a nia chhuak rum rum. Chutiang deuh chu a ni ang, Mizoramah kum sawm chuang fe zu khapna dan, MLTP Act hman a ni a, kan inphu tawk kei chuan ka ti.

Mahse kha dan kha kan phu lo nge min phu lo zawk ka hre hrang thiam lo, tlangval pakhatin, ka nu arbawm chhunga vawkte pathum hi ka chhiar thei lo, pakhat, pahnih ka ti dawn chauh a, an infin ruih zel, a ti ang deuh kha ka ni ta ber awm e. Khap ni si kha zu a tam em em reng tho a, a in mite, Pute R.Thangkanglova leh Lalber Huma chhiar telin, chuan zan tin, ni lo, tlai tin tih tur a ni zawk ang, an nghei lo ziah. Kan Chief Secretary ṭhin, Pu H.V.Lalringa, IAS-in, pa pakhat chuan ‘kei chu zu nghei ka sim,’ a ti e, a tih ang deuhin Pu Kanglova te thian dun pawh hian zu nghei an sim tlai tin a ni deuh ber mai.

Khap ni si, khap loh ang maia zu tam tho si ta chu, a tihdan ṭha zawk ngaituahin dan siam pawl chuan, zu khapna dan ni tho si, zawrh theihna ni bawk siin dan a siam a, chu chu Mizoram Liquor (Prohibition and Control) Act, 2014 tih a ni a, Larsap pawmpuina pawh nikum July ni 11 khan hmuh a niin, sawrkar chanchinbu, Mizoram Gazette an tihah nikum July thla ni 22-ah tarlan a ni nghe nghe a nih kha. Hmarcha pawh a te te hi a thak e, an tih ang deuhin kan Excise Minister Pu R. Lalzirliana pawh hi, a pa te tihna ni loin, ni lo lo hek loin, a chhip zawlah ka chhem pha ka ti a ni zawk, a chakin a huaisen a, a ti ṭha hlein mipui tam zawk hi chuan kan ngai a ni, a fakawm hle e.

He dan thar, MLPC Act an tih mai hi tunah chuan Mizoramah hman a ni ta, a hmaa khapna dan kha a rawn luahlan ta, zu erawh chu March thla tir lamah he dan ang hian zawrh a la ni dawn thung ni awm tak a ni. MLTP Act ai khan he dan hi a vin zawk a, a hremna pawh a na zawk daih mai. Dan hmasa ang kha chuan phalna lova zu zuar, kawl leh siam tih angte kha chu court-in thiam loh a chantir chuan a rei lo berah thla thum tan bakah cheng sangkhat tal chawitir bawk tur a niin, kum nga thleng tantir theih a nih laiin, tuna danah hi chuan a rei lo berah thla ruk tantir bakah cheng sangnga tal chawitir bawk tur a ni a, kum nga thleng tantir theih a ni bawk.

A danglamna pakhat awm leh chu, a mantu tan doctor hnena hruaia endiktir kher ngai loin, zu in hriatna hmanrua an hmang thei ta hi a ni. Chu chu Hydrometer an ti a, ka la hmu chiah lo, zu rui emaw in ngei nia an hriat an mante chu kha hmanrua kha an hmuamtir, hamtir a ni awm e, mahse zu in chu zawrh hunah chuan a thiang dawn a, ruih erawh a thiang lo thung, rui chin tehna a ni a, in hriatna a ni bawk. A ṭha khawp mai. Dan hmasaa zu in leh ruite ni sarih tal emaw an tang tur a nih lai khan, he danah hi chuan thla khat tal tantir bakah cheng sangkhat tal chawitir bawk tur a ni, a hremna hi dan hmasa ai khan a na zawk em em a, zu in mite tan chuan fimkhur a ngaiin a hlauhawm fe zawk a nia.

Dan hmasa aia a danglamna em em lehna pakhat chu, zu in emaw ruih emaw avanga thiamloh chantirte kha, court-in a duh phawt chuan tantira chawitir loin, a chhuah thei a, ni nga aia rei lo vantlang hna, kawtlai emaw khawi lai hmun emaw phiah fai ang chi te, ti turin a ti thei a, chutianga hna an thawk chu Police emaw Excise Officers-ten an vil tur a ni thung. Chutianga ti tura tihte chuan, court thupek an zawm that loh chuan, a chunga hremna kan sawi ang khian hrem theih an ni a, thla khat tana sanghnih chawi bawk emaw, sangkhat emaw chawi ai chuan ni nga chhung chu phur taka thawh mai kha an duh ngei chuan a rinawm. Lo duh lo ta pawh nise, court-in ti tura a tih miau chuan tih a ngai tho tho. Tun apangin chutianga tihtir chu an awm nual tawh mai. A tha, zu ruia inti vai tingtang tak tak emaw, rui chunga khawlaia inti pawr viaute hi dim tur a ni lo, dan angin na tawka hrem hi an phu hle reng a ni.

Treasury Square vela mi tamna leh vei hut hut laia Police/ Excise te venna hnuaia hnahthel tling khawm-darh nuai phiah fai chu, intih cham a har duh khawp ang, an tlawmngaih avanga phian an ni lo tih lah chu a chiang dawn ropui si, zu in vanga ruih kher tum chu a at thlak ngawt ang le. Phaiah pawh an hung sen thut a, tumah rui hmuh tur an awm loh khu, hmana zu zawrh a nih khan khutiang khu kan ni hman tawh mawle, mahse khap hian ruih a awl a ni awm e. He dan thar hi kan hriatah a tlangpui takmeuh kan tarlang ve a ni e, khawlaia zu ruite hi an chimawm a, dim hauh loin dan anga na taka hrem hmiah hmiah mai zel a ṭha. Dan kan zaha kan zawm hian kan chunga roreltu thu kan awi tihna a ni a, chu chu kan Pathian thu pawh a ni si a.