KALVARI TLANGAH

Kum sawm zet kal taah khan, he kan Vanglaini-ah hian ka tarlang tawh a, Kalvari tlang chhipa zozial dik tak, lachhum hringa tawn ngei mai lungchim taka ka zuk hlet hlet thu leh, zan thla eng thlir nana ka it em em thu ka sawi a nih kha, khatih lai khan, thla tiave aia lian mah tawh zawk a en lai a ni nghe nghe a, ka mitthlaah hian a la cham reng mai. Tun ṭumah erawh a ral lam tiave aia lian a nih hnu a ni thung.

Ni 7-2-2015, Inrinni chhun dar sawmpakhat a pelh tawh lamah chuan, Khawruhlian khawi emaw lai thingpui dawra thingpui kan in zawh chuan ding takin Kalvari tlang chu kan pan nghal a, a chabi kawltute an fel em em a, kan la a, kan hawng a, hmana kan tlawh tum nen erawh a danglam hle tawh thung. A tlang chho leivung phihrit kan kalnaah chuan lung an remin kal a nuam hle a, step zau takin an rem a, a khat tawkin lung an phun a, Isua kraws put tan tirh leh a tlukna te, a lemin an entir zel a, he lai tlang hi Catholic Kohhrante humhalh leh siam a nih avangin an fakawm hle a ni.

Ral aṭanga kross lang lurh thin kha tunah chuan a ni tawh lo. Thingte chu a puitling tan tawh a, chuvangin tlang bawk thing hmun a ni tawh a, kei erawh chuan thingte len hma, kraws chiang taka a lan theh lai hun, tlang chhip aṭanga khaw hawi a nawm em em a, hliahtu dang awm loa a thawven lai kha a nuam ka ti zawk a, tunah zawng a pik chuk a, khiang leh hriang thing a ding zen thulh a, zan thla eng thlir nan pawh ka it tawh hek lo. Mahse he tlang hian tlawhtu a ngah a, mi tam takin Bethel a, tawngtai nan an hmang tawh zawk thin a ni awm e. Zep lova sawiah chuan, keini erawh zawng bethel a, tawngtai tura kal kan ni lo va, John-a nen kan pahnihin kan kal mai zawk a ni. Tawngtai lam a ni lo ve.

Kalvari tlang, kalvari tlang, ka ngaihtuah tawp hlei thei lo. Dik taka sawi chuan, a tlang chhip zawl deuh sir chhim lama a thlan an siam a, kan Lalpa ruang an zalhna hmun zawl, hnahthel ro kan rah rik riap riapna laiah khan, Mizo vaihlo zial ka zukna kha a rei tawh em a, han chhunzawm leh ka duh a ni ber mai. Hawi thawvenna tur a awm tawh lo, khiang thingten min hliah zo ta, ka lunglen tur ang pawhin a leng hek lo, chuvangin lunglen tum taka kal kha, a kir zo ta, zozial erawh chulai hmunah chuan lungchim takin ka fawp vawng vawng a, chu chu ka hlawkna ber chu a ni deuh mai. Aw Sihneh kung, a zik var chi ngat kha lo buk li liai hlawm ni tak sela aw, kan thliak ang a, vawksa nen kan buhchiar ang a, kan hlawk hle ni mai tur, a chhim turin Pu G.L. Hnamte chaw eiah ka ko ang a, artui ka chhum thung ang, tihte ka ngaihtuah reuh reuh a, a ropui lua love.

Hmana kan kal hmasak tuma Lalpa ruang lo mu dum zun kha, tunah erawh puan senin an lo khuh tawh a, a kiang hnai maia meizial ka han zu te kha min hmuin rawn sawi ta nise chuan, E khai mei i zu maw, khapna hmun a ni lo va, a thiang e, thenkhat chuan meizuk do leh zu huat hi thianghlimna bera ngaiin thil dang leh sual dang pawh ngaihthah thak khawpin an hmanhlel a, i meizuk avangin vanram i kai phah lo vang, hremhmun lah i kal phah hek lo ang. Mihringte chuan pawn lam lan danin in en thin a, kei chu rilru leh thinlung entu ka ni, a rawn tih hial te ka ring a, ka suangtuah neuh neuh a nih chu. Mahni tawkah suangtuah tha ve hlete chuan ka inhre thul, nuam ve deuh chu a ni. Nia, Bible-in sual a tih aiin keimahni sual siamchawp hi kan buaipui zawk ni berin a lang.

Thingbuk kar aṭang zawngin Chalfilh tlang pawh a lang hlei thei lo va, a piah lawka Lailak khua, Khanpui leh Hmunnghak pe iar iar thinte pawh hmu tur chuan thlek zawk zawk a ngai ta, Fu leh balhla zawng i rawt ang aw, Charchhawna venga nuthlawi leng thlir a dal e, A sang hlei reng reng ka ngai thei lo, tih hla ang deuhin a thing ding phui ta chuk kraws hliahtu mai ni tate chu rawta kih vek atan ka va it si em. Kan thinlunga kraws hliahtu a tam thinzia a entir a ni deuh ber mai. Kalvari tlang a nihzia lantirtu, kraws langsar taka a awm lai kha a ngaihawm a, chutiang deuh chuan biak in tha leh nalh kan duh, a dik, mahse a hluia kan inkhawm thin lai kha kan ngai leh duh khawp mai thin ang deuh hi a ni ta ber awm e.

A ni tak a, biak in chhunga meizial zuk an khap hi ka la hre miah lo, mahse zu duh khawpa a leh mawl erawh ka la hmu miah thung lo, meizukte pawh danin a khapna hmun, zuk phal lohna hmun a tihah chuan dan zawmin kan zu lo mai a, meizial zu ngai reng reng lo ber ni awm fahranin kan inkuangkuah hmiah mai, mahse danin a phalna hmun, khapna hmun ni loah erawh chuan a tui ti ber ni awm fahranin kan si hliah hliah a, kan hip khu veng veng leh mai, chu chuan dan kan zaha kan zawmzia nasa takin a entir a, dan chu kan zahin kan zawm tur a ni miau a lawm. Kalvari tlang chhip, kraws ram reh laia tuma awm ve loh lai leh dan bawhchhe hauh si lo va, kraws thlir chunga Mizo vaihlo zial dik tak duh taka kan han fawp khu liai liai mai te chu e, vanram thlenga chhawm theih nise tih palh pawh a awl rum rum mai. Duhin chak thin mah ila, chhia leh ṭha hriatna avang leh dan zawmna avang pawhin khapna hmunah chuan insuma zuk loh mai a, phalna hmuna zuk mai hi dan zawm kan lo ni reng mai a lawm mawle. Dan a lalna apiangah zalenna a awm ṭhin, tih a ni si a.