HRALH A KAL A NI ANG

Lamkawiah thingsiri par lo tla, Ka chhar dawn lo zaiin ka pel mai dawn e, Ka di rim reng reng a nam lo ve, han tih te hi chuan chung lam pawi khi sawi hian ka ring lem lo. Laikhum chungah ka dawn ṭhin ka hmangaih chu, ka zawng ruai ruai ka tawng si lo e, han tih te leh farnu te tak te ka nei, a la umkhel lo a hnute pawh, tih kan Bible-a chuang ngeite pawh hi a rau em emna kei chuan ka hrethiam chiah lo. Thing bul tinah hreipui an dah ta, tih ringa hreipui keng lova thing kih tuma kal a, Bible-ah pawh a awm kha, tih rin ngawt pawh rinna dampui a har mai thei. Tupawh sam tlakawlh chu lu-kawlh a ni, tih erawh hrilhfiah hran ngai pawh ka ti lo, a dik lutuk, a dik ber awm e.

Ni tin mi an thleng, Thla tin an tam kum tin an pung zel, tih hla ang maiin kum sawmpasarih zet Mizoramah zu khapna dan hman a ni a, khap ni ve si kha a tam em em reng a, a in miten tlai tin an nghei lo ziah a, zu erawh chu a chhe em em thung a, hmuihmul ser thura in ṭhinte pawhin a sen hman lo, thla hnih-khat regu taka an in chuan damdawi inah an awm loh vek pawhin an thi, an ti ṭhin. Chutiang chu kan dinhmun a nih avangin sawrkar chuan dan thar, MLPC Act siamin, thunun chunga mumal taka zawrh mai hi a ṭha zawk e, an ti a, he dan thar ang hian zawrh a ni ta ngei mai.

In chunga roreltu thu thuin awm rawh u, tih ringtu kan ni bawk a, kan chunga roreltu dan siam pawl chuan khitiang khian dan a siam a, hman a nih hma hauhin kan han do nghal luih luih a, roreltu dodal chu Pathian ruat dodal a ni, tih ziak ti thleng diktu kan ni ta ber mai awm e. Sakhaw rawngbawltu ṭha leh dik, huaisen, pulpit tlang a, “Tangka sum ngainat hi sual tinreng bul a ni,” tih sawi ngam tlema zawng an awm laiin a sawi ri ngam lo erawh a tam zawk a nih hmel hle. Sual tinreng bul kan Pathian thu pawhin a tih, sawi ngam lote khan sual hmawrfem kan buaipui a ni ber hian a lang.

Zoramin kan pawisa hman hi zaa sawmkua chu sawrkar laipui min tumsak a ni a, keini a hmangtu zawk hian zaa sawm kan intum ve a ngai a, chu pawh chu kan tlin fumfe lo e, an ti a ni lawm ni kha? Fapa in dang tawhin thla tin cheng sing mamawh se, sangkua tumsak ila, sangkhat chu intum ve rawh, ti ila chu pawh intum thei lo se, engtin nge kan ngaih ang le? Chutiang deuh chu kan ram dinhmun chu a ni lo vem ni? Sum dehchhuahna mumal ṭha tak nei lo ta chu, kan chunga roreltu sawrkarin chhiah tlema a han pun dawn hlek pawhin kan phun luai luai a, chutihlai chuan zu chhiah kan it lo, te kan han ti lawi bawk si. Mahse zu zuar tih hriat em emten zu mana an lei buhfai tham leh thawhlawm, sawmapakhat an pek erawh kan Kalhlen Kut phal leh lem hlei law, a ni lawm ni?

Zu kan duh loh tluk hi chuan eirukna hi chu kan do viau hian a beiseiawm loh lam deuh chu a ni e. Tichuan, dan angin zu chu Aizawlah hmun khatah emaw lek zawrh a han ni ta a, ni khatah um sanghnih dawn lai mai hralh a niin zu man cheng nuaithum chuang zet hmuh a ni a. Chuti a nih chuan thla khatah chuan cheng 10,000,000 vel zet chu zu man hmuh a ni dawn a, chumia sawma pakhat chu cheng 1,000,000 vel tihna a ni dawn tihna a nih chu. Heti zat hi thla tin thawhlawmah emaw sawmapakhatah emaw rawn pe dawn ta se, zu man a nia kan duh lo tiin kohhran hian a lo hnar a ngem le?

State dan siam pawlin dan a siam a, chumi ang chuan a lei duhte pawhin permit an neih a ngai a, chu chu dan a ni. Kohhran ṭhenkhat phei chuan, rawngbawltu zu leina tur permit laa neite chu phuar tur an ti ni awm tak a ni. Sipai bang emaw pension emaw ration card neia zu la ṭhin leh lakna tur Sipai aṭanga card neite an phuar ve tho dawn nge ni anga State dan siam anga permit nei chauh an phuar dawn, tih chu ngaihtuah tham tak a ni awm e. Permit a hminga laa nei ve, mahse a taka hmang ngai miah si lo pawh phuar tur a nih hmel a, zu kha nge an huata a card, permit kha aw, tih palh rum rum a awl hmel e. A nih an taksa tana ṭul, doctor-in a chawh avanga damdawia hmang ṭhin permit neite kha an phuar tho ang em le, tih pawh chu ngaihtuah tham fe zawng a ni awm e.

A la tir deuh bawk a, tunah chuan hralh zawng a tla hle ni awm tak a nia, hetiang reng hi erawh chu a ni hauh dawn lo. Hei hi erawh kan hriat a ṭha, dan angin lei thiangin in thiang mah sela, ruih erawh a thiang lo, khawlaia ruih leh hnawksaka khawsa, buaina siamte phei chu khapna dan hmasa ai khan a hremna a na zawk tih hi. Ruia buaina siam a, hnawksaka awmte leh vantlang hmuna zu in leh motor khalh phei chu a rei lo berah thla khat tal tan tur a ni a, kum hnih thleng tan theih a ni, emaw cheng sangkhat tal chawtir, sangnga thleng chawitir theih a ni, emaw vantlang hna ni nga aia tam lo thawk tura tih, chutianga hrem theih chu a ni a, zu ruia motor khalh phei chu an license tihtawpsak theih a ni bawk. Hengte hi hrereng ila, zu dan anga kan leia kan in a nih pawhin, dan vekin ruih a khap tih i hria ila, i fimkhur ang u, dan hi kan zahin kan zawm tur a ni si a.