ṬHA VIAU DAWN E

Mipui an thuhmun fo thei lo, Dam leh damlote an awm ṭhin, Tlai luatte hian pawina a nei, Tling ṭhelh apiang pawi tih a zual, A tlai lu ta an la ti ang, Nazaret Isua kal liam ta, tih ang mai khan, kan thuhmun fo lo a, kan ngaihdan leh duh dan pawh hi a rual chuang lo a, a thuhmun vek tak tak thei dawn hek lo, pali-panga kan awm khawm chinah hi chuan ngaihdan hi a inkawlkalh nak tawh mai ṭhin.

Kan Pathian thuin min hrilh ang chuan, kan chunga roreltu thu thua awma an thu awi tur ni awm tak kan ni. Chutihlai chuan ngai teh, heti hi a ni a, ni 9-4-2015 zing chuan ka Pu Lalber Huma Sailo, Mizo hi engtin tin emaw hian a ṭhianpa sam sei biang hmul dur mai nen kan inah an rawn tei lut rawih a, eiruka sak a ni nge ni lo kan rawn enfiah dawn, a ti. Zawt lo mah ila min hrilh a chak tawh em em chu Zu Parmit a la neih loh thu a ni a. Excise-ho chuan kei leh Pu R.Thangkanglova hi nei hmasa ber tura min hual kan ni e, a ti bawk.

Keiin engvanga permit tun thleng thlenga a neih loh teh khiah chhan ka zawt a, ani sawi dan chuan, ka ṭhenawmpa Revd. Chuauthuama, i u Chuaua nen a ruala neih ka duh si a, ani lah a hmanhmawh lo ropui si a, zu han ti a. Ka u Chuaua puan dum zar a hlau deuh ang a, a neih loh phah rih ni turah ka ngai tawp. Mahse khap a nih lai pawha tlai tin nghei lo ziah khan permit nei se nei suh se, a nghei dawn chuang lo tih erawh ka hre rin ren. Tin, hetia zawrh a nih avang hian tunah rih chuan khawlaiah rui hmuh tur an tam phah chuang hauhin a lang lo.

Tichuan maw, kan chunga roreltu sawrkar chuan sikul tan hun a tihma a, mipui an thuhmun fo thei lo, tih a dikna a lo lang leh nghal a, ṭha ti leh ti lo kan awm nuai mai. Aizawla awmte chuan ṭha hlein kan hria a, zingah naupang sikul kal an lo kal fai vek a, pisa hun velah motor a ziaawm phah em em mai a, chu tak chu a ṭhatna a ni, mahse a mut lam tlaia a thawh lam tlai thungte tan chuan zing thawh hma chu peihawm loh ṭiah ṭiah viau ang. Aizawla awmten ṭha kan tih em em lai khan, thingtlang leh motor jam pawh awm ve ngai lohna hmuna awmte erawh chuan tha an lo ti ve lem hauh lo thung mai a. An dinhmun ngaihtuah chuan an hriatthiampuiawm hle chuan ka hria.

Engpawh chu nise, kan han ti tan ve dawn chauh chu a nia, a lo ṭha viau a nih leh kan chunga roreltuten an chhunzawm zel ang a, a ṭha ta vak lo a nih leh an titawp leh mai ang chu, a engamah hmaa lo doa lo hnial nghal ringawt mai kha chu a Kris lo deuh niin a lang. Tin, thingtlang hmuna awmte leh khawpui dang, motor jam ngai lohna hmuna awmte pawhin an tana ṭha vak dawn lo leh harsat phah nana an hmang dawn a nih chuan, tidanglam turin thuneitu hnenah an thlen mai ang a, thunetute pawhin an dinhmun ngaihtuahin leh hriatthiampuiin an la siam tha leh mai ngei chuan Ring la i nung ang, han ti top phawt ila, kan thih phah lem lo vang chu.

Persian dan an sawi ang maia nghet bur, tih danglam theih loh lah a ni si lo, thuneituten ṭhaa an hriat chuan Aizawl atan bik chauh pawh kal hma chu an ti mai dawn a lawm, han ti teh ngawt ila, a, i beisei ngawt phawt ang. Dik tak chuan, Kristian kan nihna ang chuan kan chunga thuneitu, roreltu thu chu kan zawm mai tur niin a lang. Sawi tawh ṭhin angin, kan roreltu tuin emaw, Mizo vaihlo ngei mai, ru deuh rimtui bawk si, Zurpui ngat, lachhum hringa tawn ngei mai hi a tui e mai, min va lei teh an tih a, awle Sap, tih kha roreltu thu zawmna a ni ngawt lo va, a ni lo lo chuang hek law. Roreltuin dan an siam te, thupek an siamte kan zawma kan awiha kan zahsak hi a ni, Pathian thuin min kawh hmuh dan zawk chu.

Kan chunga roreltuten dan an siam a, ṭhenkhat lahin a engamah hmain kan lo ṭawng a, roreltu dan siam tiṭhuanawp zawngin veng leh khaw ṭhenkhat kan lo awm mek bawk a, hei hi chu a dik berin a lang lo. Kan Bible ngeiin, Tangka sum ngainat hi sual tinreng bul a ni, a tih laiin ṭhenkhatin zu hi an lo puh ve mek bawk. Ti ta daih ila, hman ni chu Excise Pisa-ah ka leng a, zu lei duhte ta tur permit an tih mai hi a lo intiang khawm thuah urh mai a. Kei ta pek chuan an Officers-te chu, hmana dan anga in zawrh pawhin puitling chin hnena hralh tur in ti mai a, enge tuna taka permit in tih, a buaithlak em kha in tan, hmana in tih ang khan ti leh ula a ni mai a lawm, zuar si zuar lo ni awm ang taka lan in tum a nih hi... te kn ti fiamthu ta mai mai a, an nui tawp. Nih lohna anga lan phet in tum, te ka ti vel, hui ha, te tal kha ti ve se a ṭha tur, an ti miah lo nia.

Khua leh vengah pawh thuneitu VC emaw LC emawten tuikhurah insuk leh inbual khap a ni, an tih chuan keini chuan kan zawm mai tur a ni, chutiang bawk chuan kan chunga roreltuin dan leh thupek a siamte chu keini khua-leh-tuite chuan kan zawm mai hi kan tih tur chu a ni. Mahse, a tha famkim lo laite pawh a awm thei, chutiangah chuan ṭha zawka kan ngaih leh hriatte chu siam ṭha tura ngen kha a pawina a awm lo, chutiang hunte chu a awm ṭhin a, chuvangin dante pawh siam ṭhat a ni foin, a puma paih pawh a awm ṭhin a, a thar ṭha zawk siam chang a awm bawk ṭhin. Chu chu Democracy ram kalphung a ni si a.