THLARAU INPUI

Keia kar hi Kelkang chungchang i la rawn ziak ve miah lo a, min ti hi an awm ṭhin a, a dik reng mai. Ka u Revd Chuauṭhuama leh Pu M.Lalmuamzuala te hi, lam an ngaina bawk a, an ziah atan kan khek deuh a nia, anmahni taka hi chu an lam thiam vak lo pawh a ni mahna le! Ka u Chuaua ngat phei hi chu ṭawnghriatlohin zai ta se, P.L.Liandinga lam thung se, entu kan tam ngawt ang mawle.

A ni tak a, kan sawi chamchi a, India danpui hian keini khua leh tuite hi sakhaw zalenna min pe a, chumi awmzia chu sawrkarin sakhaw tihbik a nei lo va, mi mal tinte hi ṭha kan tih leh duhzawng sakhua kan zawma kan biak min phalsak a, chuvang chauha keini pawh helai hmarchhak ram kilkhawrah Kristian sakhua vuanin kan lo inhap buk thei a nih hi, chumi avang vek chuan ṭhenkhat kan lo inti Juda thung a, kan Ukil Dr. CVL Auva te meuh pawh an Juda em em ringawt a, keini lahin a intih Israel em avangin ram dang mi, tiin kan mantir lo chauh kha a nia, chupawh danpuin sakhaw zalenna min pek vang tho a ni.

Tun hma deuha thingtlang lama nuho hlim lam phei chu, khawi khawiah emaw chuan, thlawhtheihna hniam deuha a lo thlawh changte a awm a, anni an lo lam tui ve si, mahse an hmu duh bawk si, a hniam lutuk tih paha tukverha daka an han en a, a thlawh hniam hnua lam chhunzawm leh mai tawkte pawh an awm ni awm tak a ni. Hlimin lam ve mah suh ila, mi hlim zinga tel ṭhang ka ni ve deuh roh a, an sawi ka la hriatreng chu, khaw pakhatah an mual inkhawm a, an hlim hle a, hmeichhe chau tlu lah an tam a, an mu phung mai an ti. Chutihlai chuan an chhak awipangah bawng nu-hur zui bawngpa an insi ta mai, an rawn chil khu thla rum rum mai chu, bawng insi khan a chil an hlau bawk a, chaua tlute pawh an chau hleithei bik lo a, an tlan chhe chum chum mai an ti. Chau tan pawh bawng insi chil ai chuan tlanchhiat mai kha a him, kei pawh ni ila ka ti tho chuan ka ring.

Kum 1937 velah khan Kelkangah hian hlimna nasa tak a lo awm tawh a ni, tih chu sawi tam ngai loin kan hre tlangpui vekin a rinawm a, khatihlai kha chuan Kumpinu awp kan la ni a, India pawhin zalenna kan la hmuh hma a nih tawh chu. Tunah he khuaah bawk hian nikum hmasa aṭang khan a ni awm e, vawiin thlengin hlimna chu a la kal zel a, zan tin an la inkhawmin hmun hrang hrang aṭangin miin an pan a, mikhual an nghah hle thin bawk, a khuaa awmte tan chuan hnathawh hman pawh a ni meuh loin, mikhual buaipui chu an hna ber ni awm tak a ni. Kelkang mipuite an fakawm hle, chuvangin kei chuan Thlarau Inpui tiin ka vuah ve tawp mai. North Vanlaiphai lamah pawh khan thlarau nausen an ti emaw ni, thlarau pangchang an ti zawk emaw ni, kha a thawk bawk a ni em kha?

Kan ram danpuiin zalenna min pek a zarah thlarau pangchang pawh kan dawngin kan chang a ni e, ti ta ila a dik lohna a awmin ka hre lo. Pathian thlarau hnathawh dan hi mak tak tak a awm a, tun hma phei chuan an hlim lutuk khanchhuka uai a, inuisa lehlinte pawh an awm thin. A ṭhen an nui a, a dang an ṭap a, lamtualah an mu a, an khawng a, an hnungtawlh a, an bingbilet a, lu thing ta met met an awm bawk laiin, kut lehlam chauh ṭul em em an awm bawk. Thlarau nazawng ring suh u, tih ziak a lo awm ve bawk si a, chuvangin ṭhenkhat chuan Pathian thlarau hnathawh ni lova ngaia puh ta mai tawk an awm ṭhin.

Buhlem leh tak chu a to zaho tur a nih si avangin keini erawhin kan hre hrang thei lo. Pa leh Fapa sawi chhia chu ngaihdam theih a ni a, Thlarau Thianghlim meuh sawi chhetu erawh chu ngaihdam theih a ni lo thung. Hei hi kan Lalpan a sawi chhan chu Belzubula a zawl an tih vang a ni. A awmzia chu Pathian Thlarau hnathawh ring lo va, ramhuai hnathawha ngaih emaw rin emaw hi a ni, Thlarau sawi chhiatna chu. Amah kan duha kan hmangaih theihna turin hmel mawina reng a nei lo, tih a nih avangin Pathian Thlarau hnathawh tam takte hi mihring lam thlirna aṭang chuan a mawi lo a, duh chi pawh a ni lo fo reng a ni.

Pu Chawngkhupa pawh Thlarauin a thuam a, mihring finna leh mi fingte ngaihah chuan mi â a ni, mahse a a si lo, chuvang chuan a ni, Mifing mihrinna hianin a ngaihtuah chhuak zo lova che, Ka Chhandamtu i thuruk hi, a lo tih phah hial reng chu. Kelkang hlimnate pawh hi lo rin loh ngawt chi a ni lo, ramhuai hnathawh ang dawn dawna lo ngai tawkte an awm ṭhin, Thlarau Thianghlim kan sawi chhe palh ang tih hi a hlauhawm khawp mai. Kei erawh chuan dan lam aṭangin ka lo teh ve thung a, India danpuiin sakhaw zalenna hlu tak min pek avanga Kristian sakhua zuia hetianga hlim thei kan nih avang hian lawmawm ka lo ti ve thung ṭhin a ni. Mahnin chan ve loh avang leh dawn ve loh avanga Thlarau hnathawh hi lo rin loh ngawt chi niin a lang lo, Ring la i nung ang tih hla ang khan.