HLA LEH A PHUAHTUTE

E khai, zanin hi thla bial zan a ni e, khu a thata a ven vuk chuan June thla eng thlirin kan lung a leng dawn lawm ni? Khi thla chanchin khi ka hre tawh, Lungleng miten an thlir dawn a ni, Nimahsela thlaah khian hmun, Ka tan buatsaih leh peih diam em ni? Ti ngawt mai ang aw. Zan thla eng avang hian hlate hi a pian tam phah teh asin, keini lungleng mite chu thla engah kan uai chang a ni lo va, hla leh a phuahtu, an phuah chhanahte thlengin lunglen hnemtu kan zawng thin a nih hi.

Pathianin Davida, ka thinlung ang pu mi, a tih ang deuhin hla lama tui ve mi, ka lunglenpui ni ngei tur Pu Laltanpuia Varte ka tawng ta, ka lawm hle mai. Pu C.Z.Huala hla, Tunah buaina tlang chhipa dingin, tih ka ziak, a phuah chhan nena ka tarlan, a dik chiah loh thu leh a dik zawk nia a hriat, chipchiar leh ngaihnawm takin a rawn sawi a, Vanglaini ni 26-5-2015-ah khan kan chhiar hlawm awm e, ka lawm em em a ni. Hetiang lam hi ka tuina zawng a nih avangin leh a tui mite mi dangte pawhin ngaihnawm in ti ngei chuan ka ring.

Ni 23-7-2009 kha a ni a, Pu R.Lalrawna chuan, MZO ROHLU (Revised & Enlarged), chhut hnihna, ama siam, Aizawl Electric Veng YMA-ten khawhar ina hlabu atana an hman ni ta nghe nghe chu, min rawn pe ve nawlh mai a, ka lawmzia chu nasa tak a ni. Chu lehkhabu phek 56-na, No 55-naa a phuah chhan a sawi, tlema a thluk tidanglam hretin ka han sawi ve kha a ni a. He lehkhabua sawi ang chuan, a phuah chhan Rothangpuii khan a hnu-ah Vanzau Melveng lal Thantluanga pasala neiin fanu pathum an nei a, ni 11-10-1955 khan a thi niin a tarlang thung a ni.

Engpawh nise, hlate hi a hlu a, tun hnuah a phuahtu leh phuah chhan hriat dan inang lo te, chumi avanga rorelna court hial han thleng tate pawh an awm ve nual mai. He kan sawi lai Mizo Rohlu bu, phek 109-ah chuan, Hringhniang an liamna thlafam khua chu e, tih hi Leng lal Saihnunan a nau Lallura fapa mal neihchhun a duhawm lai takin a thi hlauh mai a, chuvanga he hla hi phuah nia tarlan a ni a. Mahse Pastor Chhawna chuan, khi hla khi a fa pathumna Sapbela a thih avanga a phuah a nih thu a sawi thung, INLARNA (Hmutu-Pastor Chhawna), chhut sarihna, 1998, Thuhmahruai phek 8-naah a chuang. Chuvangin he hla hi chu Pastor Chhawna phuah niin a lang, hengte hi kan sawi chhan chu hriat dante hi a lo inang lo thei a ni e, tih ka sawi duh vang a ni e.

Ka rawn fang leh hmana ka tuanna tlang, Tuahpuileh vau an vul leh ta, tih pawh hman deuh khan a phuahtu chungchangah, Vankhama, Lalzova, mi dang zawk, tih chungchang chanchinbu lamah kan hmuh fo thin kha. A ni e, keini chutianga zan thla eng leh fur khaw thiang, thal romei ram ri riai, a ni, thlasik khaw thianga kan lunglen a, hla leh a phuah chhante kan buapui lai chuan, chu tluk zeta pawimawh, pawimawh zawk ti ila a dik ang, motor chungchang hian lung tileng kher mah suh se, sawi a tulna a va tam si ve aw.

Dan angin motor lei chuan, a neitu chuan a insure ngei ngei tur a ni a, a insure a thih lai rei lo tea chhiat tawka mi thi a, hliam tuarten zangna­dawmna an phut a, Company ni lo, a motor neituin a chawi a ngaih tlat a awm fo thin, chuvangin insure hi dan a nih mai bakah motor neitu tana tih ngei ngei tur a ni tih hi i hre thar leh ang u.

Insuar nan pawh sawrkar hnuaia mi, Mizoram, Aizawl ngeia office nei Company hi a tha tih pawh ka sawi duh. Entir nan, New India Assuarance C. Ltd, National Insurance Co. Ltd, United India Assurance, Oriental Insurance angte hi Mizoram ngeia office nei an ni. Agent an tihte chu an awm thin, mahse miin accident thila zangnadawmna an phutin anmahni khan thu an nei lo va, Mizoram pawna an office lam atanga engkim tih a ngai a, mipui an buaiphah a, motor neitu an buai bawk, hei hi mi sawi ni loin, keimah ngei pawhin a taka ka tawn ve ram a ni tlat. Mahni tawn ve loh rau ram, pulpita nau hring ai chuan ka tan sawi a zia e.

Tin, motor lei tumte tana tul leh pawimawh em em chu, Mizorama Branch Office nei ngei mai Insurance Company-a insure-a tih a tha e, kan tih kha, a motor hralhtuin chumi khami Insurance Company-ah chuan tih tur, an lo ti pawh a ni mahna, mahse chu chu a dik lo va, i motor i ta, i lei a nih dawn avangin i insure-na tur chu nangma thu thu a ni a, i duh lohna Company-ah motor hralhtu khan a tihtir lui thei lo che tih kha hriat a tul khawp mai. I motor a nih dawn avangin a insuar-na tur chu tumahin an thlansak thiang lo che a, nangma thu a ni tih kha motor lei la tum leh lei turten i hre bawk ang u. Inte pawh hi insure theih a ni a, kangmei leh chhiatna dangah a tha hle. Hman kuma Laipui tlang leimin vakah pawh khan Ramhlun pa, mi pakhat chuan a in chhiat avangin, a lo insure hlauh mai a, nuai tam tak a la a ni. Hengte hi mipuite tana pawimawh leh hriat tul nia ka hriat avangin lunglen hnemah kan sawi ve a ni e.