MAHNI SEH SEH MUAL HRANAH

Mipui an thuhmun fo thei lo, dam leh damlote an awm ṭhin, tih hi a dik ber fo si ṭhin. Zoram hmun hrang hrang ai maha hluarin, Aizawl khawpui veng hrang hrang aṭang pawh a, Ni tin mi an thleng thla tin an tam, Kum tin an pung zel, tih ang maia ni tin deuh thaw, a inban leka veng pakhat aṭang pawha Bus sawm chuangte hmanga Kelkang an pan ruih ruih a, a kal tawh leh kal lem lo pawh thimhlim leh zan rei a, kawng sira Amen Haleluia, tia thawm an dim vak loh lai, a dangte tui taka an zai khawm tluk tluk laiin damdawi ruihtheih zuara hmanhlel an lo awm mek bawk.

Pulpit deuh khera patling ṭhan kin tawh leh patling kher lo pawh, nau hrin tum an awm lai mekin keini Kelkang chu chu sawi loh, Beram-kang pawh la hmu lo leh la kal ve hman lo remchangte, kal tawh ṭhenkhatin min hmuh mi khaw sial deuh roh lek lek phah lai, ni 28-5-2015 chawhnu lam khan Ziritri College lamah an zirtirtu Masangi hoin dan lam zirin zirlaite nen mahni tawkah kan lo Amen ve tumhrang a, rau lamah hlawk lem mah suh ila, tisa lamah chuan kan hlawk lo bik lo lem lo.

Chu mai a la ni lo a, ni 31-5-2015, khaw lum em em ni khan Central jail lamah kan zu Halelui leh a, damchhung tang tur te, kum swm, kum sarih, kum nga tang tur leh an thubuai ngaihtuah mek te, chhui lai mekte an inpawlh nuai a, chung zingah chuan court lam aṭanga hmelhriatte pawh an awm ve nual avangin kan inchibai lawp lawp a, min haw viau dawn emaw ka tih rilrukte chuan hlim takin min thlah lawi a, lawmthute chu an sawi letling ang mawlh mawlh a, a zia phei chu a awm viau e. Jail chhungah chuan Kelkang lam an hre ve meuh lo.

Putar luṭuak var vau tawh an awm nual laiin a tam zawk erawh chu an la tlangval a, an tan chhan erawh a inang lo hlawm hle thung. Nang chu jail chhungah i lut zeuh zeuh tawh niin a lang a, thu sawi teh le, an ti ta mai hi a ni deuh ber mai. Cr PC an tih mai, chumi chang 360-na ang chuan, thil sual lian tham lutuk lo ti, court pawhin thiamloh a chantirte, hrem kher lova zilh hauin emaw kum hnih khat chhung emaw an nungchang enthla zuia intiamtirin emaw, jail-a khung lova an zalen a, ngaihdam an nih theihna a awm tih an hriat leh hriat lohte chu kan inzawt a, an lo hre hlawm a. Mahse, sual sim em em, inchhir, ngaihdamna chang si lo an tam khawp mai.

Engvanga thiamloh chang hnu, sima inchhir kha tang lova a zalen ngawt chhan chu Court-in a chunga dan kan sawi hmang khian a ngaihdam avang chauh a ni a, simin inchhir hle pawh nise, court khan a ngaihdam miau loh chuan hremna an pumpelh chuang lo. An sim avangin an zalen a ni lo, ngaihdam an nih avang a ni zawk. Kan ramah thlarauly-in a ni ber ang chu, sual inhriatna chang, mahse ngaihdamna chang si lo, chutianga ngaihdamna a awm tih pawh hre lo, inawkhlum ta mai hi engzata tam awm tawh tak ang maw?

Cr PC dan kan sawi khi chuan sual ngaihdam theih chin a nei a, Pathian Cr PC erawh chuan ngaihdam theih loh a nei lo va, eng sual pawh a ngaidam thei a, chu ngaihdamna chu a chan theih a, a chan theih dan pawh Pentecost Ni khan Tirhkoh Petera khan a sawi kha, chu lo chu ngaihdamna dang a awm lo, te ka ti ni tain ka hria. Kelkangly-in sawi ta ila, thlarau leh khawvel dan kan zu zir ho a nih deuh ber mai chu, hrethiams? Pu R.Thangkanglovan, IPC an siam danglam tawh si a, nula pawh an kum zat hriat theihna lehkha ṭha tawk an neih loh chuan ka hnimhnai ngam ta lo ve, a tih nen chuan kar hla tak a ni. Keinin dan kan sawi laiin Pu M.Lalmanzuala chu kal ve nise, thlarau lama hlima lam a pawimawhzia leh ṭawnghriatloh zai a tuipuizia a sawi ngeiin a rinawm.

Zu avanga tang pawh an awm nual mai. Ka u Revd. Chuaua kal nise chuan e, Cana khua inneihnaa kan Lalpan thil a tihpun tui an tihzia leh a bang pawh awm lo khawpa an duk zawh vek thu, chhang leh sangha erawh an ei ban hnem sizia a zu sermon leh nghek ngei ang tih a rinawm hle bawk. Keini erawh chuan dan bawhchhiat leh a kalha awma khawsak chu jail-a tanna a nihzia leh dan zaha zawm a tulzia kan sawi zawk thung. Ukil pawl, Bar Assosiation an tih mai hotu Pu L.H.Lianhrima kal ve ta ni se, dan ai mahin, pulpit tlanga puan inzar hliaha nau hrin a tum lohzia leh thlarauly-a mipa nau hring chharsak a inhuam loh thu a sawi ngei ang tih kan ring.

Tichuan mahni buai buaiin kan buai a, mahni seh seh mual hranah tih ang mai kan ni zo ta. Chuti chung pawhin zan thla eng leh dan pawimawhzia sawi erawh kan bang tak tak thei dawn lo chu a ni hi.