A HUN LEH A HMUN

Pa Ranga, Remsang­puii Pa a thih tuk khan kan zu kal ve a, an lo zai tui hle a, an lam mup mup a, mi kan tam deuh avang leh zun in han hre fuh lote kha a awm theih bawk avangin, zai a zo chiah kha mi pakhat khan ring deuhin zun chhuak inthiar duhte in awm a nih chuan, Varanda thlang lamah hian a awm a nia, a ti a. Chu thu a sawia a puan avang chuan mihlim nu pakhat, amah pawh ka hriat ve em em ṭhin, mahse a hming ka theihnghilh daih tawh turah ngai la, chumi chuan ring tawkin, Haleluiah, a rawn ti, kan nui dar dar.

A ṭhain a ropui viau mai thei, mahse han Halelui-na hun chu a ni em em lem lo deuh. A rei ta viau mai, kan vengah mitthi an awm a, an vui a, an hlim em em a, an lam nasa a, ṭapte chu ṭahpui rawh u tih aiah ṭapte chu lawmpuiin lam mup mup rawh u an ti a ang deuh ber mai. Nipui khaw lum lai a ni a, a lum em em bawk a, chutia an hlim em avang chu a ni ang chu, mi pakhat khan, Hlimna ni ropui chu a eng, Zantiang hi kawlrawnah a liam, tih kha an thlang tlat pek a. A sak chu an sa, mahse vawi khat an sa chhuak hram, a chhan chu chutiang hla sakna hun leh hmun a nih loh vang a ni.

A hun leh hmun hriat loh hi a buaithlak fo ṭhin a, chumi hre lote chuan mi mawl leh chhaw, mi a nih kan hlawh ṭhin. Tun hnaiah India ramah puipunna hmuna meizial zuk khapna dan siam a ni a, keini Mizoramah ngei pawh chumi dan bawhchhia chu man tuma vaiin an taima em em a nih hi. Mahse khapna hmun bik a awm a ni mai chauh a, chumi laia meizial zuk lo tum tlat chu a dik lo a, dan bawhchhiatna a ni. Khap lohna hmuna zuk erawh manin chawitir a thiang lo thung a, dan bawhchhiatna lah a ni hek lo, a va nuam reuh tak.

A hun leh hmun hriat loh avangin mi tam takin meizuk chungchangah pawh lei an chawi phah fo va, danin a khapna chin ni loah kha chuan an duhtawkin zuin pak khu luai luai mah sela a thiang a, dan bawhchhia lah an ni hek lo va, chuvang chuan a ni, keini pawhin dan zah chung zelin leh bawhchhe loin, meizial zu man chaka phe phete pawhin an man thian lohva an man theih lohna hmuna tui ti taka Mizo vaihlo zial diktak tui ti tawka nghei tumna rilru reng pawh la nei chhin ngai lova kan pak khuk liai liai ṭhin. Vanahte hial chhawm chhoh theih nise, Tirhkoh Paul-a te meuh pawhin zuk ve chhin chakin min dil asin ka rin ut ut. Ring la i nung ang, tih ang khan.

Chutiang zel chuan tunah pawh MLPC Act hmangin dan angin zu pawh zawrh a ni ta, card neite tan chuan zawrhna hmuna lei kha a thiang a, dan ang a ni, mahse rakzu erawh dan anga zawrh a ni lo va, zu ṭheuh ṭheuh kha a, dan kalha zuar leh a leitu chu dan ang bawkin hrem theih a nih chu. Mahse mi kan fingin kan changkang tawh a, dan anga leite leh dan kalha inte pawhin tunlaiah mi hmuh tur leh khawlaia rui chhu chhu nih an duh tawh lo, a zahthlak a, a changkan loh thlak bawk, chu ai chuan Kelkangah an kal zawk thin a nih hi, zu ni loin rau an rui halelui zawk, khawhar ina zai tui laia din chhuahpui tum phet erawh a ṭha chuang lem hlei law, miin an nui tet tet duh.

Dan kalh hauh lova vawksa zuarte chu, keini zawng vawksa hi ṭha kan ti loin kan duh loh zawng tak a ni, kan do bawk, tih avangin Pu G.L. Hnamtea ten vawksa lei tum dangin an thu khawm tuau tuau lo va, lehkha an tar lem bawk lo, an Chawlhni ve Sabath, keinin Inrinni kan tiha hnathawk leh dawr hawng an khap hek lo va, an mi khaw sial en hru hru hek lo. Chuti a nih chuan MLPA Act anga dan anga zu zuar leh phalna neia leitu turte tibuai zawnga lo inhawr khawm tuau tuau pawh chu a dik bik chuang hek lo ang.

Sawi tawh ṭhin angin India ram chu sakhaw zalenna ram a ni a, inthlang ram a ni bawk. Hindu sakhaw zuitu an tam ber a, an tam lawt lak, mahse Hindu sakhaw zuituten an tam ber chhuang leh changchawiin sawrkar an sakhaw mil emaw an duh zawngin emaw kaltir tumin an phe an phe lem lo, anni chuan ram puma bawng talh leh zawrh, a sa zawrha lei khap an duh hial pawh a ni mahna, mahse sakhua leh sawrkar chu a hrang daih a ni, tih an hria a ni ang. Hemi chungchang hi chu Pu Laldenga (L) khan a sawi dikin a chiang hle ṭhin. Pu Hnamtea pawl nen inthu rualin Mosolman-te pawhin vawk talh leh zawrh khap an duh lo vang tih sawi har tak a ni.

Tichuan a hmun leh a hun hriat kha a pawi­mawh a, dan zawmna pawh a lo nih chu, a hmun lova dan khapnaa meizuk a thiang lo, dan anga zawrhna hmun lova zu lei a thiang hek lo, chumi hre lote chuan jail bang an la zut phah fo ṭhin reng a, pawisa an chawi bawk ṭhin a nih hi. Dan pawisa lotu chu a ṭawngṭaina pawh rimchhia mai a ni lawm ni kha? Dan hi lal ber fo teh hram se.