NI TLA NGAI LO

Rev. Sailianruma, Lianruma tia hriat lar zawk, Senvon khuaah a piang a, nungchang tha leh nungcha leh ramsa thleng pawha khawngaih thin a ni. 1915 khan Lower Primary a zir zo va, 1922-ah Gangte bial Suongsang khuaah a pem a. Hmun tha lai tak, mahse ramhuai awmna nia an ngaih thin, an lal meuh pawh a awm ngam lohna hmunah in a sa a, khuaa mite chuan a chungah ramhuaiin kut a thlak ngei an ring a, an ngaichang a, mahse engtinmah ramhuaiho chuan an ti ta si lo va, mak an ti hle mai a, chuvang chuan mi tam tak Kristianah inpein Pathian thu an awih phah ta hial a ni.

Vawi khat chu Tuihlang ral, Mirong ramah Pathian thu hrilh turin a kal a, kawng lai takah chuan keipui hi a lo ui thut vung mai a, seh a chak hmel hle hian a hria a, Pathian hnenah a tawngtai ta a, a han Amen meuh chuan sakei pawh chu a lo awm tawh lo va, a kal tumna lamah chuan thlamuang takin a kal thei ta a ni. Miten an ngaihsan em avang chuan an lal chuan a itsik a, a hnawtchhuak ta hial a, mahse Hmuntha lalin a lo dawngsawng ta thung a. Mi sawmnga lai mai Kristian-ah a siam a, Suoangsang lal chuan a khuaa awmah a awt leh si a, a sawm leh a, ani pawh chuan lo induh khum mai bik loin a let leh ve mai bawk a.

Rei pawh a awm hma chuan an lalpa zu rui chuan chemtum nen a um chhuak ta mai a. Hun leh hun lo pawh sawi hleih theih ni ta hek lo chu a chhuak lo thei lo va. Ramhnuai pilril, ramsa hlauhawm pui puite tual lenna hmunah khuain a thim hnan dawn ta, a han thlira ngawpui kar atanga khawthlang lama ni a liam tur eng mawi tak chu a en vawng vawng a, a pil tep tawh mai si a, kalkawngah khuain a thim hnan dawn tih chu hai rual a ni lo. tihngaihna dang a awm lo, thosi leh vangvat, rannung seh sep septu tamna lai leh vangvat-tial tualchaina hmun bakah thawm mak tak tak leh hlauhawm pui pui awmna karah thingbul thlar belin, lung lukhama hmangin a mu lo thei ta lo. Dozingan, Tlai tlain lenkawl khua a lo thim hian, Riakmaw sirva leng iangin; Riahna run kan vai, tuk loh ramhnuaiah, Piallei hmun rem kan bel e, a tih ang mai kha a chantawk a ni zo ta.

Chutiang hmuna mahni maia zan khaw thim hnuaia ramhnuai ngawdur kara lung lukhama a han mu ta chu maw, ngaihtuahna a kal thui duh turzia chu tun kan hai lo vang. Ni tlak tawh ngai lohna ram. Zan thim hnuaia ngawpui hnauia thawm hlauhawm pui pui hriat tur awm tawh lohna, thosi leh vangvatte awm tawh lohna Zion khawpui chu a ngai ta em em mai a. Ni tla ngai lo Zion khawpui, Ngaiin ka rum ka tap chhun ni tinin, Puan ropui sinin an leng tlansate, Ka tan hmun a awm ve’m chu ramah chuan, tiin a au chhuak ta a nih chu.

Hnawhchhuah a tawk a, khuain kawng lakah a thim hnan dawn a ni, tih pawh hriain hreh hle mah sela, hmanlaia lal lalzia chu kan hre vek a, a tan tihngaihna dang a awm ve lo, chu khuaah chuan a tan hmun a awm ve tawh lo va, a chhuah a ngai a, mahse hla ropui leh sak hlawh tak tur a phuahna tura hmanraw pawimawh ber atan Lalpan a lo hmang ta zawk a. A tawrhna leh a hreawmna chu, a hming daih tawh lohna tura lal remruat a lo ni ta hlauh a.

A ni e, keini erawh chuan ka tawrhnate chu ka natna belhchhahtu a ni fo va, kan tawrhna lah chu keimahni sual vang a ni chawk fo bawk. Tunlai hian kan ramin zu leh drugs a buaipui em em mai a, mahse dan ang takin zu zawrh a ni a, chutianga zuara tite chuan dan anga an tih a nih avangin dan an bawhchhe lo va, mahse keini erawh chuan miin an lei loh nan an dawr kawtahte kan thu a, a lei turte lei lo turin kan ngen thin a ni lo em ni? MLPC Act dan ang thlapa zuar an ni tih erawh kan hria. Chutihlai chuan a fimchi dan bawhchhia zuar an la tam thung sizia erawh tuman kan hai lo, mahse an kawtah erawh kan thu ve thup lem si lo. Dan anga zuarte dawr kawtah kan thu a, dan lo anga zuarte kawtah erawh kan thu lo thung a ni deuh ber mai.

Ka Pu Lalber Huma Mizo chuan, Dan angin an zuar a ni mai a, mahni fate zu in pawh khap thei si lo hian mi fate zu in tur hmangaihin an lei loh nan dawr kawtah an thu a, dan ang thlapa zu zuarten an hralh theiin an hausa tur an thika an itsik vang mai mai a lawm, rakzu dan lo anga zuarte hnena lei tur erawh lei lo tura ngen turin tumah an thu peih lo, an itsik ve lutuk loh vang a ni, zu han ti ve thung a mawle. Chutianga a han sawi zuah lai chuan Pu R.Thangkanglova of kal cancer chuan, a dik chiah, dan anga zu zuarte hi an thika an hausa tur an itsik vang tih chu a dik chiah a lo ti ve bawk, Anni pahnih sawi hi chu, thudik pawh ni ta ang sela kei chuan ka awih chuang pawhin ka ring lem law, hrethiams?

Chawei tuina damdawi, Vitamin B Comlex an ti emaw ni, hengte hi Dr Mamuana, mi malpui kher chingten an chawh anga a chhin khata ni khata vawi hnih emaw ei chuan a tha lutuk, mahse a bur khat hi vawi khatah tlak piap mai ila chu a that viau pawh a rinawm loh. Chutiang chu a ni mai. Bible-ah hian sual chu kan hmu mai a, van kai lohna khawp sual pawh Paulan chiang tawkin a sawi a, mahse keini erawh chuan chung sual ai mah chuan keimahni sual siamchawp hi kan ngai pawimawh zawkin kan do zawk thin a ang hian i hre thin ve em?

Engle khawle, dan anga sawi chuan MLPC Act anga dan anga zuar aiin dan lo anga lo zuarte hi do zawk awm tak kan ni a, ND&PS Act kalha damdawi ti thinte phei hi kan do lehzual tur a ni. Kan thalai tam takin an thih phah tawh a, an thimek a, an thih phah zel dawn niin a lang, chuvangin dan tlawhchhan ni siin dan bawhchhe si loin, dan kalha thilti chu tupawh nise i do zel phawt mai ang u aw, dan zah loha a kalha titu chu mi fel ni loin mi sual a ni si a.