KUM 33 A NI TA

E khai, a lunglen thlak lehling zawk, 1983 August thla a ni a, rambuai pik lai a ni, u Chawnga, C.T.Thanga (L), Ex-MLA nen kan ni a, Bus chi hnih, a pangngai leh a changkang deuh, Delux Bus an tih a awm a, keini a engamah hre ve lo ta chu a nalh leh nuam zawkah chuan kan lut thauh a, u Chawnga kha nula bulah a thu a, a inti thei khawpa min nuih vel. Kan tawt ta riau mai a, Bawngkawnah chuan Conductor chuan, in ticket phawrh vek teh u, chuang lo tur chuang ve in awm a ni, a ti a.

Keini chuan inti thei tawkin kan ticket chu kan lek va a, an en chu, nangni hi in nih hi, hei hi in chuan vena tur a ni lo, chhuk ula Bus pangngaiah chuang rawh u, in puanthuah chu Lunglei Bus Stattion-ah kan lo dah mai ang, a ti chu e, a phurawm loh the asin. Kan chhuk a, Bus pangai zawkah chuan inthlahrung takin kan lut them them a. Tichuan maw, hmanah ka sawi tawh kha, Seling kan thleng chu le, kan chuanna bus chu an lo tiding a.

Kei chu tleirawl sam sei ang deuh ka ni a, jean kekawr pawl zuih tawk ka ha a, Kung-Fu pheikhawk dum, mawza tel loin ka bun a, jean pawl ban nei lo, chakai khawrh kawr an tih ka ha bawk a, sam sei bawk, ha kuh ve bawk nen, min ringhlel thei thin kher mai. Kalkawngah khan vawi riat min tiding a, bus-a chuang kan tam tehlul nen khan, kei kher chu min thur chhuak ziah bik a, MNF emaw min ti a, chung min tidinga min check-tute chu sipai an ni. Hnahthialah phei chuan min chhuahtir tha ve hle hle mai loin, sipai khan ka tukkhumah min han nam chhuak deuh kher a, ka thinin a tuar ta bik lo a, ka ID Card, a kawm sen Red Card ngei mai chu ka phawrh a, Sipai pa chu ka hmuh a, a han en chu a zak ve deuh a ni ang, a lei a chhuah vak, an ti. Mi chu an man em bik ta lo hlauh a.

Kawng laka vawi riat zet min tiding bus chhung an en apiangin mi dang pawh engtinmah ti ve duh si lo, kei kher min ringhlela min thur chhuak bik ziah kher erawh a lawmawm dan a dang zuai. Kei lo pawh rinhlelh tur dang an tam tehlul nen, ka tah a chhuak. Ka inchei dan leh sam ngil sei siu siau ha kuh bawk ngaihtuah erawh chuan Upa khawmpui haw lam emaw min tih erawh ka beisei ngam chiah lo, ka thiam tho mai.

Zan dar riat vela Lunglei kan thleng chu maw, kan vawi khat kalna a ni si a, kan puanthuah tel lah bus hmasain a phur si, ngaih hi a tha fahran lo khawp mai, chawkidar khan, nangni pahnih hi a ni maw, in puanthuah hetah a awm si a, nangmahni vangin ka lo la awm a nih hi, a ti chu kan thaw huai a, ani erawh a lawm viau lo tih a tawngkam atangin ka hre thei thung. Khawi lama kal tur nge kan hre lo, a bul lawkah chuan Chhingi Hotel hi a lo awm a, tun thlengin a la awm nghe nghe a, kan invawm lut rawih a, kalna tur dang kan hre miau lo a ni.

Chhuatah chuan kan mu a, thosi han tamzia kha, a vir hut hut mai a, beng bula thosi a vi a vi hi chuan mutchhuak a hnawt tiau duh. Kei ta pek chuan inlukhup ila thosi vi chu a reh mai, ka ti a, kan inlukhup a, a reh ve mai bawk a, kan lo muhil chu kan mutui khawp mai. Zing dar hnih velah ka harh chu e, ka lo la inlukhup a, a lum lutuk chu ka thlan hluam mai a, amah NGTV-an CRP-in sin tura butu-puan an pek a meizia, me hi siki ni se, a puan sin chu duli a ni ang, a ti ang deuhin lum kha chenghnih se, chenghnih siki a tling ang. Kan inhawng dai chiah chu maw, thosiho lawmah a tla ve thung a, an vir hut hut mai, mahse inlukhup lam a lang tawh lo.

Chutah le, engtin tin emaw mite zawt chawp zelin kan kalna tur chu kan zawng chawp a, kan hmu ve mai a. Tlai lam a lo ni a, kan inbual fai dim diam tawh a, kekawr dang zuih tawk kha ka ha a, Kung-Fu erawh a ngai ka bun a, ka sam ka met loa a la sei reng a, ka ha pawh a la kuh tho zel a, Police awmna thlanga chithlummum an zawrh chu ka nau Polytechnic-a zirlai nen chuan ka lei a. Lunglei khawpui vawi khat kalna a ni bawk a, miin min la hmu ngai lo va, kei pawhin ka hmu ngai hlawm hek lo.

Chutia thil kan lei lai chuan kan chhaka police-ho kha hmanhmawh deuhin an lo tlan thla khup khup a, rukru an man dawn a nih kan ring a, a teuh lo mai, ka nau nen chuan min hual tuau tuau a, min man ta mai a! Ka ru lo reng reng tih hman pawh a ni lo. A hma niin kawng tluanin sipaiin min ringhlel bik nileng a, Leitlangpui kan thlenga police-in MNF emaw tiin min ringhlel ni mai loin min man a. Thana-ah mi hruai chho ta mai a, kan veng thenawm Dinthara mi, Pu Chhetria kha an OC a lo ni hlauh mai a, kan han inhmu hlawl mai chu, e khai, enge i rawn tih a? min lo ti a, keiin hei min man a nih hi, ka ti. A nuih hi a za khawp mai a, kan thaw huai, amah vangin jail bang zut loin kan chhuak leh ta chu kan lawm hle. A siki ka ba.

Hengte hi rambuai lai a ni a ni a, khami hun kha kan lo thleng leh ta, kum sawmthum pathum a nihna a lo ni ta reng mai. Chung rambuai hrehawm thawpik chhum dum zawng zawngte chu 1986 June ni 30 zanah India leh MNF-ten remna thu an thlun rual khan a lo reh ta duak a, State puitling kan nih phah tain, India Danpui chang 371G siam a lo ni ta bawk a. Keini pawhin Special Provision kan lo neih phah ta bawk nen. Khatianga mipui leh kohhrante ngenna anga remna an siam kha kan lawm a, rambuai sipai rinhlelh nih a bo ta, tun tlai khawhnua a chuti khati tia lo sawi vel chiam chiam hi chu ching tawh lo ila, a va ṭhat hmel ve aw.