VAWM HLUM

Fur leh thal thenna ṭhalfavang kawl eng kei ka ṭahna, Lungrual tea siahthing tang kan lawrna, Zarva lungrual-ten duhleng an awi e, tih hla ang khan, chu hun chu, chu hun ngei mai chu naktip aṭangin kan thleng mai dawn a, tun apangin rengchal hram leh ngirtling hramin vau ngawpuiah min awi a, mahse keini erawh chuan vau ngawpui ni loin, Vana Pa Hall chhak, A.R. ram chhunga thing buk li liai kar aṭangin min awi thung a, kan tan vau-ngawpui mawi lung tileng a ni si a.

A ni e, helai ram zau lo tak huam chhunga thingbuk nipui laia nipui therengte tual lenna, favang a lo thlena dawlrem leh vevu, ngirtling leh rengchal, uleuhten min lo awih ve thinna hi keini tan chuan a hlu em em, tun hma kum tam taka tang tawhin anni kan AR-te hi an chhuak dawn, tia an sawi thawm riva kan hre thin a nih kha, an duty tur an chhuak tih loh an chhuah thawm erawh ka beng a chhet deuh nge kan la hre lem hlei law. Pu R.Thangkanglova phei chuan, anni kan sipate hi chhuak tak tak se chuan, mi lian leh thil titheiten an ram chhung hi an insem zo vek tawh a, LSC a rukin an hum fur tawh a, an phawrh ngam lo mai zawk a ni, an chhuah loh hi mipuite tan chuan a tha daih zawk, chhuak chiah se chuan tute ram emaw a ni ang a, mi lian leh hausaho ram mai mai tur, zu han ti ve thung tlat a. Pu Kanglova sawi kher chu ni lo se e, tak tak emaw ka ti hial ang.

Keini mi lungleng thin tan chuan hetia an ram chhunga thing an lo humhalh buk a, therengten min awih nana an hmang thin hi kan lawmah a lo tla ve thung a, kan lawmnate hi a theuneu teh e, ti raw maw? Miten kuai-su-rut deuh a rukin tangka khawi aṭangin emaw an rut hum huma pawisa dahna inah an dah pung thur thur a, an hlim a, an lawm a, chutihlaia keini van dumpawl chawhnu tlang hera a lang fiah kuk laia rengchal hram kan hria kan lo lawma kan lo hlim ve em em mai han sawi chu, a ropui lua lo, a changkan thlak loh khawp mai, mahse hei erawh kan hria, engtianga hausa leh pawisa ngah pawh hian a duhtawk chu a nei bik lo, a duh chu “a aia tam” a ni tho tho.

Chutiang khawvelah chuan kan awm a, kan khawvel tak hi chu aw, a mak tih chang a tam thin teh e. Hmangaihtu an hlu em em, kan ram hian hmangaihtu a ngah a, a tihzia e, hmangaihte cher thik thiakna, hmangaihtu thau mum kung kungna ram erawh a ni lo. Hmangaihtute hi an demawm lo, an hmangaih a ni ve mai a, tui an khuahna tur lai vel lo hmangaih thuttu te, rel kawng siamna lai tur kam vel lo hmangaih ta em em te, thlawhna tumhmun siamna tur sir vel ram lo hmangaihtute hian hmangaih tur hmun hi an hria ka ti, tuikhuah hma leh kawng siam hma hauhin a siamna tura senso zat tur hial khawpa tam hi ram leh thlai hmangaih man an tel a, keini nuthlawi awrpuar kebai deuh roh lehnghal kan hmangaih min la duh lo zui kan han hui-ha ve ngawt ai chuan an hmangaih fuhin an hlawkpui zawk fe ang.

Chuti khawpa hmangaihna kan buaipui lai mek chuan court lamah hian “vawm hlum,” tih ṭawngkam hi ka hre fo thin a, Cr PC an tih maite bakah dan dangte ka en ve thuak thuaka a awm si lo, Ka buaina ram thlalerah hian, Ka Lal ka tlantu hmel duhawm, Lui ral a buatsaih ramte nen, Ngaiin ka lung a leng mang e, Rev. Kawlthawman a lo tih ang deuha buai chang ka nei thin a, Ukil-te ka rawn a, anni meuh pawh chuan an lo man fuh bik hauh lo mai a lo ni a. Court-ah hian thil dik lo, eng emaw a awm thin emaw ni le aw, tiin ka hui-hah a, mahse tunah chuan chhemdam thlifimin min rawn chhem ta nia inhriain ka thaw huai.

Mi sual nia an mante bail-a chhuah mi tam tak an awm a, chhuah loh pawh an tam bawk. Chalfilh tlangah zawhte ki nei a awm a, a hmu apiang an thi zel a, a hmu lo pawh an thi tho a, tumahin an la hmu lo thung, tih ang chu a ni hauh si lo. Miin mi an bail khan an mi bail tam tak chu an tlanbo daih a, a bail-tu a buai ta hlauh zawk a, a bail-na pawisa kha a chawi a ngaia a chawi theih loh chuan jail-ah thla ruk thleng tan theih a ni. Chuvang chuan an mi bail tlanbo avangin tam takin pawisa an chawi a, sawrkara chhun luh a ni, Chutia an chawi chuan an bail avanga an mawhphurhna kha a bo ta duak a, a lo reh ta a. Chutianga mawh an phurh tawh loh avang chuan, “vawm hlum” an ti hi a lo nih chu, hui ham. Mahse an bail tlanbo kha hmuh hun huna man tura manna thupek court-in a tichhuak thung ṭhin.

Mitthi thlarauin Hringlang tlang aṭanga khawvel Zoram a rawn thlir a ngaia a lungleng a mittui a tla zawih zawiha a kir thiang tawh si lo, lunghnur takin a kal a, lunglohtui lo luang fim ker ker chu a han in a, khawvel a ngaihna chu a bo ta duak a, hawilo par a han tawn hnu phei chuan khawvel hi a theihnghilh ta a, Pastor Chhawnan Nuna lunglohtui an in e, an thliak lawmna hawilopar nen, a tih ang khan, bail avanga an mawhphurhna a lo bo tak avanga vawm hlum tih ṭawngkam hi lo hmanga piang ta a ni awm e.

Tin, court-in lung ina khung kher lova pawisa a chawitira a hrem an awm bawk ṭhin, pawisa kha sawrkara chhun luh a ni a, chutianga an chawi chuan an thubuai kha a lo tawp ta lo thei lo a, chutiang pawh chu, “vawm hlum” an ti tho a lo ni a, sazu lunga vawm hlum nen chuan a dang deuh. Vawm hlum ka hriat ngai loh mak ka tih kha a lo mak lo ve, hming thar an lo sa a, kan lo hriat loh vang mai a lo ni zawk.