KA BUNG DAWNTUAI

Thlasik rim a nam tan ta, aw chawhnu tlai lamah khua a thiangin van dumpawl a han lang fiah leh ruih ang a, Engtin nge maw lunglen ka lo tuar ang, Nghilh loh mi u ka then tak nang ngaiin; Tinkim ka han dawn a, awmkhua a har ngei e, Ka ṭah khua hrui angin a la sei dawn mang e, tih vawng vawng mai a awl leh dawn teh chu a nih hi.

Pu Thandanga, hla sawmli vel lai phuahtu hi ni 8-5-1930-ah Saitualah a piang a, a pa Sawikunga hi a thih hma avangin a pa nau, Selchhungan a enkawl sei lian a, ama tawk ve te teah lehkha pawh a thiam thei a, lehkha a zir zawh hnuah Govt Mizo High School-ah zirtirtu hna a thawk a. A u Lalthuama fapa motor accident-ah a thi a, a ngaihna hla a phuah chu sak lar em em thin a ni. Ka bung dawntuai par ang vul lai, Ka tan khuavel timawitu chu; Thangvan sang run lumpui turin, A hmangaih Lalpan a hruai ta…Ka ngai em e, ka parmawite, A sakhming sawi ka bang dawn lo; Ka tan lungngaih chhum a zing e, Tah lai reng hi ka bang thei lo, tih hi a ni.

Youth Co-ordinator, Nehru Yavak Kendra-ah a thawk leh a, pa invawng fel tak, zaithiam leh hla phuahthiam a ni a, carom Board pen erawh chu, thiam lo intihsiak, competition an tih mai hi awm ta se, lawmman pakhatna a lak loh chuan vaibawng sakei seh ka ngam khrim khrim mai. Vana Pa Hall hnuaia an pisa a awm lai khan kan han khel chiah chu maw, turu riu reu tak chu a ni. A pension hnuin motor a lei a, a khalh thiam si lo va, a chhuak khat si, a khalhtu hlawh neia han rawih lah chu a hman khat dawn em avangin a hlawh tur a ui ve tumhrang si, driver la loin kawtah a hung a, petrol litre nga a thun a, tumahin an khawihin an khalh chhuak ngai si lo va, Liana, ka hung tawp mai a ni si a, a tlo ngawt ang, a ti. Chuti khawpa zaithiam chu a ni, tun thlengin a la dam ve tek tek.

Chutianga bung dawntuai par ang vul lai thangvan sang runa lawi tawh tura Lalpan a hruai thu a phuah keinin khawhar inahte kan sak thin lai chuan, India ram pumpui ngaihtuahin Mizoramah hian, kan police leh excise-ten dan bawhchhia nia an man a, thubuai an siamsak te, thiamloh chantir hi a tam ber pawl niin a lang a. Dan lam atang thlir chuan, hetianga thil sual tia an mante hi mi sual an ni lo va, mi suala an puh a ni chauh a, keini Mizote hian mi sual emaw tih kan ching fo va, court-in thiamloh a chantir hma chuan heng thubuai awrhte hi mi fel, thil sual ti lo anga ngaih tur, tih a ni thung tlat mai.

Mahse dan bawhchhiaa an puhte hi puh fuh chu an ngah mai. Tin, a mantute hian an puhna kha a dik ngei a ni tih kha court-ah rinhlelh rual lohin zaa za an finfiah tur a ni thung. Chutianga an finfiah theih loh chuan court khan thiam changin a chhuah tur a ni tihna a nih chu. Entir nan, mi tualthatah puh ta sela, chemin a sathlum tiin puh ni ta se, a sahna chem chu court-ah an phawrh ang a, hei ngei hi a sahna chem a ni, tih kha an finfiah a ngai a. Tin, mitthi lo endiktu doctor khan court-ah a endik thu leh a hliam dan te, a thih chhante leh a report angte kha a finfiah a ngai thin. Chemin a sathlum ti siin a sahna chem Court hmuhtir tur pawh an neih si loh chuan court tan chuan a awihawm loh a, a mantute lam khan an finfiah thei lo, tihna a ni ang.

Tin, tunlaiah drugs an tih mai, damdawi ruihtheih chi hi a hluarin a tam hle a, ND&PS Act an tih mai dan anga hetiang neitu leh zuara an puhte chu thubuai siamsak an ni. Damdawi ruihtheih nia an hriat kha a ni tak tak em, sada nge nia maida lek zawk, tih endik turin FSL an tihah an thawn thin. Tin, kha damdawi kha thuhretu pahnih tal hmuh lai leh awm laia an man, an hmuh a ni tur a ni, FSL-a an thawn tur tlemte an laka an fun that laite pawh an hmuhpui tur a ni a, FSL lama mi thiamten drugs ngei a ni e, an tih chuan drugs a ni mai.

Chutianga drugs an man laia thuhretu an tihte hi an pawimawh em em a, court-in a kohin an thuhriat leh an hmuh dan diktak kha an sawi a ngai a, hretu tam takte chu court-in vawi eng emaw zat a koh a, kohna lehkha an hmuh ngei pawhin an thuhriat sawi turin an kal duh tlat lo thin. Chutiang chu an tam tam em em a, a hretute sawrkar Ukil leh a court roreltu an ni ngei ang. Tin, a kal tam takte pawh chu thu an han zawh chian tak tak meuh hi chuan, an hmuh leh awm laia an man hi a lo ni lo leh si thin. Thudik chu a lal tur a ni a, an hmuh lai leh awm laia an man pawh ni lo napui, a ni e, tih lah dik hek suh. Dawta hretu dera tan hi danin a khap a ni mai lo va, Bible pawhin a phal loh a ni. Hetiang a nih vang hian court tan thiamloh chantir ngaihna a awm lo thin. Chuvangin hretua awma court-a kala kan thil hriatte sawi hi i hreh lo ang u.

Chutianga thuhretu court-a an kal duh loh avang chuan mi sual ngei ngei pawhin hremna a pumpelh fo thei thin a ni, tih hi hria ila, police leh excise ten thuhretu atana an hman nih hi hreh loin tlawmngaiin i awm thin zawk ila, kan thuhriat te sawi tura court-a kal i ching zawk ang u, tih hi ka sawi duh chu a ni e.

thuhretu court-a an kal duh loh avang chuan mi sual ngei ngei pawhin hremna a pumpelh fo thei thin a ni, tih hi hria ila, police leh excise ten thuhretu atana an hman nih hi hreh loin tlawmngaiin i awm thin zawk ila, kan thuhriat te sawi tura court-a kal i ching zawk ang u