SILHPUAN KHUMI

Khatia a hma kar maia Dr. C. Lalhmanmawia nena an lo kal tawh rawn chhunzawm chuan Pu Anthony Vanlalrawna, ka tana a chhipa khabe nghah nuam tawk chu a lo kal a, a hla phuah satu Zoherliani zai dahkhawmna chu a rawn keng a, a zaitir a, ka en reng a, chu chu September ni 30, 2016 kha a ni.

Nikum eng emaw lai kha a ni a, zana TV ka en tui chet chet lai chuan, hla hlui lam chi, kei ka lunglenna chi tak mai kha Zoherlianin a rawn sa a, amah hlir chu an zaitir a, zan rei tak thlengin keimah chuan ka en a, Sialsuk Tanpuia hlate an ni tlangpui a, Aw Sialkhawpui lungphang loten damtakin aw mangtha, tia zaia a lo awih ngei kha, a hmel a tha a, a zai thiam em em mai bawk a, lenlai a rual lo hi a sawi rem theih, tih mai hi a awl rum rum. Amah chu Sialsuk khua a ni tih chu a hriat a, mahse he khawvel ram zauah hian ka la hmu si lo, ka va riang tak, hui ham tih mai a chakawm a.

TV-a a zai chu a thlate ka lo la a, chu chu tunlaia facebook an tih maiah hian ka tar a, hmun hrang hrang aṭangin an rawn like a, an rawn sawi liam liam a, pakhat chuan, Aizawl Tlangnuama awm ka nia, kan in bul lawkah a awm a lawm, ka rawn biak ang che, a rawn ti a, ka thaw huai. Tin, heti hi a ni a, Pu Anthony, han ti ila keini ani aia lian zawk leh sang zawk tan chuan, pu ti lova nau, tih awm tak a ni a, a hla phuahte Zoherlianin a sak an dahkhawmna, cassette an ti emaw ni, phek thlir thler hi, hrethiams? September ni 3-a tlangzarh turin min sawm chu e, hmeichhe buan chak lo an sawi ang deuhin ka ṭang zo thlawis lo.

Chuan le, September ni 3, Thawhleh tlai dar 2 ang hunah chuan, I&PR Auditorium an tihah maiah chuan kan tam tawh mai a. Zikpuii, LPS lama kan hmelhriat, Ukil Fakawman min neih khalh daih khan a huaihawt a, a hneh hle a. Ka han lut chiah chu maw, tlar hmaa a changtunu, Zoheri, TV-a a zai ka ngaihthlak thin hmeltha tak chu leilung siam a nih aṭanga ka hmuh vawi khatna ni mahse, ka chibai top. Kan nula hmeltha zaithiam Zualbawihi nen an lo thu dun reng chu lo niin, ka vannei a ni ber mai, a hit top. CYMA lama an hotupa Lalbiakzuala, ka nau nen kan lut dun a, ani chuan nghawngawrh a awrh bik, mahse ka awt lem lo va.

TV aṭangin zai kan ngaithla thin a, thenkhat chu hla changkhat an sak chhung pawhin vawi li te, vawi nga te an thawmhnaw an inthlak hman a, a phe zuai a, an inthlak hman tho. Zoheri erawh chuan hla pakhat a sak laiin a kawr a thlak ve lo, kei pawh ka ni tho, kan hlim changa hla vawi tam tak kan lak nawn pawh hian ka inthlak miah lo, hrethiams? Hla pakhat sak chhung pawha vawi tam deuh inthlak tur a nih chuan, cassette an tih mai pawh hi siam ka tum ve nen, ka siam leh duh lo, kawr pahnih ka nei a, ni lo, pathum a ni tak, inthlakna tur ka nei tlem dawn e. 2014 kuma N.Vanlaiphaia chawlhni chama kan zin tum pawhin nu pakhatin, kawr pawl lo hi kawr dang i nei lo em ni? min ti, pakhat dang chu nei ve e le, ka la khek khal ka ti top.

Chu cassette, Silhpuankhumi, tia a hming an vuah chu kei tehlul chuan ka han tlangzarh ve ta rup mai a nih chu. Kan ramah zaia chutiang siam te, lemchan siamte an tam tawh a, an siam mek a, an la siam zel ang. Miin chutiang chuan sum leh pai mai bakah tha leh zung tam tak an seng a, an tichhuak a, phone-ah nen lam kan ngaithla a, kan en thin a nih hi. Chutihlai chuan mi thenkhatin an lo la chhawng a, a siamtu zawrhna aia man hniam zawk fein an lo zuar a, a siamtute tana inhralh ngaihna awm lo khawpa an siam chang a awm fo thin, tih chu kan hre hlawm awm e.

Hei hi a dik lo va, Copy Right Act an tih mai dan bawhchhiatna a ni a, a Mizo lo va, a Kristian lo va, a zahthlak bawk, mi thil siam, dan pawhin a khap ni reng chunga dan kalha thil lo tih kha hrem theih a ni, tih hi kan hriat a pawimawh khawp mai. Sakhaw dang vuantute leh hnam dang leh khawvel ram danga pawh an tih duh ngai loh, firfiak pawl an tihte meuhte pawhin tih thianga an ngaih loh hiala lang hi, keini Mizoram, Kristian inti, Pathian Nung bia inti bawkte (pathian thi biak ai chuan a zia deuh ang) chenna rama a thleng ta zauh zauh mai hi a pawi thin. Rorelna Court leh roreltu hialte kan hawhaw khum changte a awm thin a ni lawm ni?

Chuvangin, mi zai leh lemchante a chunga dan kan sawi kalh leh bawhchhia a, an phalna lova lo siam chhawna lak ruk kha a thiang lo a, khua leh tuite hian dan hi kan zaha kan zawm a ngai a, dan ka lo hre lo a ni, tih hi chhuanlama hman theih a ni lo, tih hi i hre nawn fo thin ang u. Dan a lalna apiangah zalenna a awm.