KELKANG KA KAL VE A

Ni 7-7-2015 zingah chuan tunlaia Zoram buaipui Kelkang lam pan chuan Ruatfela Nu hoin kan tlan khu chho rum rum a. Zahau lal Liannawla khua, Khawdungsei ni ṭhin chu naupang dai hal avangin an lalpa kel a kang hlum hlauh mai a, chuvang chuan Kelkang tih a ni ta a ni. 2013 June thla aṭanga hlimna lo thleng chu a la zual zel a ni ber mai e. India ram pawn aṭangin mi 296 leh State pawn aṭangin 975-in an pan tawh a, a pantute hi nuai hnih dawn an tling tawh bawk, keini kal chu ‘rau’ aiin ‘hawkdak’ lam a kawk mah.

An Kohhran ziaktu, Upa Chawithanga inah kan invawm lut rawih a, biak in bul lawk a ni a, anni in hi Zion in pui niin a lang. Khawlaiah mi an insul zut zut a, khawtual mite erawh mikhual buaipuiin an buai thung. Hmun hrang hrang aṭangin Bus leh motor tein mi an kal a, ni tin an kal a, an haw bawk a, englai pawhin mikhual sanghnih leh sangthum inkar vel an nei ang an ni. A kal hmasa an haw a, engzatnge rawn kal leh dawn an hre lo, chuvang chuan mikhual lo kal tharte chaw chhum turin tui lum nen englai pawhin an inring ringawt a ni mai, mut pawh an mu tam hman lo, an buai dan chu a takin kan hmu a, an fakawm hle. Mikhual engzatnge an neih pawh an hre meuh lo hial, chuti ni tin zan tin chu a ni.

Zan dar 6.30 inkhawm dar rik ni mah se, dar 4.30 vel aṭangin inkhawm an kal ṭan a, chungte chu mikhual deuh vek an ni. Sikul naupangte pawhin zan lamah lehkha an zir hman lo, mikhual an thlenna tur ina hruai chu an hna a ni a, a khawtlangin an hna ber chu mikhual buaipui a ni. Keini chu kan inkhawm a, an lam hmuhnawm kan ti, a laiah inhawr khawm an awm a, a sira lo inhawr khawm an awm bawk, chi thumin an lam a ni ber. Khuang-Chawm an ti a, khuang bula inkhawm chhung zawng lam tul an awm a, chutiang bawkin Key-Board viltu an awm bawk, keini erawh thlirtu mipui kan ni ber mai. Bingbilet pawh chaw ei titui tawk an awm. Kut lehlam chauh ṭul te an awm a, a laia ṭhuthluang diaia ṭul te an awm bawk a, tul dan a inang lo a ni ber.

Mak ka tih pawl pakhat chu, in pakhat a kang a, mahse an sa leh tawh a, an la zo kim lo. A thlang chiah in nen fit hnih velin a insi lo a, a chhak chiaha in, thingkhawn nena inhnaih zawng chu fit hnih a tling lo deuh mai thei, mahse engtinmah a awm ve lo, a kang bing hle, mak tak a ni. Kan tet deuh laia khum chunga ruah bing sur a ang berin ka hria, khati khawpa inhnaiha awm a hliau pawh hliau ung lova a mala a kang ral thak kha a mak a, tlem thawnthu pawh a nei, mahse ka sawi lo ang.

A tukah chuan Hmun Thianghlim an tihah te leh hmun dang dangah Bethel turin kan tleh dul dul a, a hlawm leh huhoin an awm a, Veng hrang hranga kalte kha KṬP hruaitu tura ruatten an hruai a. Barak lama Missionary lo kalte leh Vairengte lam aṭanga ICI kohhran lo kalte an infin a, an zingah keini pathum chauh kan ni si a, kan tel ve a, min hruaitu chu KṬP tlangval a ni a, a fel hle. Chung lama ban phara au rualte a awm a, Haleluia, tihte a ni a, ka thiam ve lutuk, maimitchhing pawhin ka thiam ang. Hnehna chu Lalpa ta a ni, tih leh Lal ber rawh se, tih kha au hla dang leh tlangpui a ni a, chu pawh chu en loin ka sawi thiam ve raps.

Sawntlung pawng lo khuar ta duk pawh kan hmu, kei erawh chuan mak ka ti lo va, a aia mak a tam ka ti zawk. Hmun hrang hrangah min hruai a, pheikhawk leh siliper bun phal lohna hmunte a awm a, kan pheh a, ban phar tur an tih leh kan phar a, ring tak au tur an tih leh kan au mai a, bingbilet an awm bawk a, keini erawh min hruaitu a fel a, ṭhiante tih avanga ṭul vang ni lova bingbileh ve ringawt chu awmzia a awm lo, ṭawngṭai mai tur, a ti. Ka rilrem zawg tak a ni bawk a, ka tul lohna lam tak a ni hlauh a, bingbileh chu ka Kalhlen Kut thei hram a, ka lawm hle. Ka u Revd. Chuauṭhuama leh Pu M.Lalmanzuala te erawh thung chu an kal ve hun chuan, tula avangin bingbileh mai duhtawk loin an inrulpuiludin hial ka duhsak. An kal ve chak tawh awm eee.

Hmun thianghlim an tiha kan vaia kan ṭawngṭai tui chet chet laia ruah a rawn sura kawr hnung a huh thlur mai erawh ka ṭawngṭai a titui lo zo. Bethelna lamahte pawh chuan keini tehlul thla min lakpui duhte hi an lo awm ve ṭhin a, kan han la leh rih thul, a hmelin puak ti bik lo leh sam var khawng fua nen, Ruatfela Nu thla lakpui chu a nuam, kan lang mam pur.

Tih tur an tih ang zawng zawngte kan zawh hnu chuan huh hnawng deuh chuapin kan haw a, kan kal lam ai chuan kan hlawhtling chu a ni ve mai ang chu. Gas leh tuite an harsatna pakhat ber niin a lang, sawrkar pawhin a tihdan kawng a dap ngei ang tih kan ring. Zep lohah chuan,, kan kal dan kha a ‘rau’ em em lo deuh bawk a, mahse chuti chung chuan khilaiah khian ‘rau’ erawh a awm tih a chiang khawp mai. A hmuna ui anga u, patling nau hring tih vel hmuh tur a awm lo, a kal ṭhenkhatte hian an haw hnuin u-rau leh nau-hrin rau an chang a ni zawk ang.

Khiti khawpa Kelkang khawtlang hun rei tak an buai ta khi fak loh rual an ni lo va, ni tin mi an thleng, thla tin an tam kum tin an pung zel rih a la ni a, atawp hun tur sawi theih a ni lo, heng zawng zawngte hi a chhan leh vang ber ni zawk chu India Danpui Preamble-ah sakhaw zalenna pekin kan awm a, India ram kan nih avangin chu sakhaw zalenna danpuiin min pek zarzoin, Kelkang aṭanga haw hnuah rau em emin ui leh chinghnia anga u leh nau hrin rau kan chan theih phah a ni ber mai. Bingbileh leh lam kha rauna a nih erhawh chuan ka rau ve lo tihna a ni ang.