SUIHLUNGLENIN

Tunah chuan Krismas pawh kan hnaih ta, thlasik boruak thiangah thlasik kawng pawh a paw leh chuk tawh a, kan lung a leng bawk thin a nih hi. Suihlunglenin rinin han thlir ila, A lang vanram ropui; Leia lungngai fate tual an lenna, Beram No leh nunna thing par tlanin, Hmangaihte an leng e, A ropui e, lawmin i zai ang u, tih hla ang mai kha.

He hla phuahtu L.Kamlova hi 1901, July thla khan Mualphengah a piang a, a pa chu Lalbawng a ni. Lehkha hi pawl thum thleng a zir a, naupang te a nih lai, 1908 khan Kristian a ni a, an khuaah chuan 1942 khan Upa atan thlan a niin a hnu kum hnihna 1944 khan nemngheh a ni nghe nghe a. 1930
aṭanga 1984 thleng khan Sundei Sikul zirtirtu a ni, kum 54 lai a ni, tihna a nih chu. Indopui 2-na lai khan V Force-B an tih maiah khan a awm ve nghe nghe a, mi zaidam leh nunnem tak ni mah sela, pa ramvachal tak a ni lawi si a ni. Politiks lam leh tlawmngai pawl kan tihah pawh hian mi inhmang ve tak thin a ni bawk. 1968 khan Aizawlah a awm a, ITI-ah chengin 1988 November ni 12 khan khawvel hi a chhuahsan ta a ni.

East Phailengah khawmpui a awm a, an hlim hle a, Thawtan tukah pawh an haw hleithei lo va, ni thum ngawt an cham a, an haw chu Pastor Chhawna te zin haw lam nen Sialhawk khuaah an lut rual a, Pastor Chhawna chuan, “Lalpan tawnghriatlohin hla thluk min pe a, ka lung a tileng em em mai a, ka tahpui thin a, ka lampui nasa hle bawk a, a thu ka dil thin a, Lalpan ka mumangah, naktukah hmar lam panin kal la, a hming L.Kamlova in hmu ang a, chu chu a thu min dil ka chhanna che a ni, a ti a.” Tichuan “ne ne” in a thluk chu an inzirtir a. L.Kamlova chuan, “Kei pawh hla thu ka nei a, a thluk ka nei lo va, a thluk han siam ve thung la, kan inlawm a ni mai a, kan la inthawn dawn nia,” fiamthuin a ti a.

Tichuan, Suihlunglenin rinin han thlir ila, A lang vanram ropui tih hla thluk hi Pastor Chhawna chuan a siamsak a, khawhar inah kan sa thin a nih hi. Pastor Chhawna ṭawnghriatloh hla, amah bawkin Zoram hi a awi dup dup niin ka hria, tia a sawi, chu
ṭawnghriatloh hla, a ṭahpuia a lampui ngei chu L.Kamlova chuan a thu a siamsak ve ta thung a. Aw kalvari thing chungah chuan, Ka hreng ropui a au, Jerusalem Kanan ram zawng zawng, In lal a ni lawm ni? tia kan sak fo ṭhin hi, chu ṭawnghriatloh hla hriat theiha an lehlin chu a ni.

Chutiang chu a ni a, keinin tui taka kan sak ṭhin lai chuan, heti a ni a, kan khawvel sik leh sate hi a lo danglam zo ta, a hun emaw hun lo emaw, a hun a ni chek ang chu, ruahte lah chu a duh hun hunah a sur mai thin a nih hi. Mu leh mal reng a awm ta lo ve, inzawmna chu nei thuk kher mah suh se, kei vea kar hian zawhnate hi ka dawng ve ṭhin a, dan angin MLPC Act angin zu an zuar a, dan ang thlapin leia in a thiang a, mut dawn chauha in tur tih danah a awm si lo va, miin an in a, an in takah chuan a rim a lo nam a, an rui pawh ni chuang loin an in hnuin khawiah emaw te an kal a, an leng a, zu rimnam tiin an man leh bawk si a, enge a awmzia, danah hian? tihte hi a ni fo ṭhin.

Ni e, dan a ni a, phalna neite chuan an leia an in chu phal a ni chiang a lawm, mahse an rui pawh ni si lo, zu rim i nam, tih vanga man leh si chu dan ang chuan a dik dawn em ni? In hnuah chuan khawlaia kal phal loh, chhuah thiang lo, ina tawm tlat emaw mut daih emaw tur, tih chu danah chuan a awm chiah kei chuan ka hre lem lo. Dan bawhchhe miah loin miin zu an in a, zu rim a nam tia man leh si chu a dik hmel chiahin kei chuan ka ngai lo, mahse ruia buaina siamte erawh man a thiang vang vang.

Court pawh thleng loin a mantuten pawisa min chawitir a, hei hi a dik em, danin a phal reng em? tih zawhna hi ka dawng leh zauh bawk ṭhin. A nih chutiang pawisa an chawitir che u chuan pawisa in pe ngei tih hriatna, receipt an pe che u em? tiin ka leh zawh fo va, pe lo, an ti lawi si. Dawt nge a tak tih lah ka hre lo, mahse dan min zawt chu a ni ve miau si, buaithlak hle mai. Receipt tel lova pawisa pek emaw chawi emaw a nih si chuan, a latu khan sawrkarah a chhunglut hauh chuan a rinawm loh a, a ak hmaks hmel e, ti raw maw? Court pawhin mi pawisa a chawitir chuan receipt a pe chhuak ṭhin a, chu chu sawrkarah dan anga chhun luh a ni ṭhin.

Chutiang chu dan kalphung leh kal hmang a ni a, receipt pe chhuak lova miin pawisa an lo chawitir a nih chuan, a pawisa dawngtu khan a ak hmak tihna a ni lo thei lo vang a, dan ang chuan thil dik a nih hmel loh khawp mai. Kan ramah hian dan hi lal ber fo se, chutichuan ram nuam a lo ni mai dawn a ni, dan a lalna apiangah zalenna a awm ṭhin, tih ang khan. Suihlung a len changin rinnain chu dan lal ber fo hun tur chu kan thlir ṭhin a nih hi.

receipt pe chhuak lova miin pawisa an lo chawitir a nih chuan, a pawisa dawngtu khan a ak hmak tihna a ni lo thei lo vang a, dan ang chuan thil dik a nih hmel loh khawp mai. Kan ramah hian dan hi lal ber fo se, chutichuan ram nuam a lo ni mai dawn a ni