RAM DOTUTE CHU

A hun lai a ni bawk a, thlasik khaw thiang van dumpawl, chawhnu tlangher laia a lunglen thlakzia sawi miah lova han kal pelh hi chu a har lam deuh chu a ni e. Lamkawiah thingsiri par lo tla, Ka chhar dawn lo zaiin ka pel mai dawn e, Ka di rim reng reng a nam lo ve, tia ka u, Revd. Chuauthuama ten an lo lampui thin nen chuan a dang deuh chu a ni. Aw lunglen a thar nang vangin, Ka tan tahna mai i lo ni, tih mai thin chu a har dawn lo khawp mai.

1930 chho, Kanghmuna a awm lai khan Mizo hla phuahthiam zinga mi Suakliana pa, Hrangkunga Sailo chu Kristian a la ni ve lo tlat mai thung a. Chuvang chuan Pathian rawng a bawlna kawngah a pa chuan harsatna nasa tak a siamsak fo thin. Tum khat chu favang laiin amahin a feh a, favang kawl eng lunglen thlak tak hnuaiah chuan a pa nen an inkar te, a tihhreawm dan leh sual hnathawh chimawm dante chu a ngaihtuah neuh neuh a. A han hawi vel a, khua lah chu a thiang mawi em em a, an buhte chu a tulzum fur tawh a, a mawi em em a.

Chutiang thil Suaklianan a ngaihtuah lai chuan a mit that loh naka lai khan a khawhmuh a lo thim zo ta, sualin a rawn bei lehnghal a, mahse, thim zingah hian rin nei lovin lungngai takin ka awm, amah ka ngaihtuahin ka lungngaih a bo thin, chhum zawng zawng min tilawm lo kha, a kiang leh vek thuai thin, tih ang deuhin, mangang tak chuan a tawngtai a. A tawngtaina chu Lalpa chuan a chhang a, a buainate chu a reh duak a, a thinlungah chuan Pathianin, nangmah lam chauh i inngaihtuah a, i buai a nih kha, nang aia rethei hi khawvelah hian an tam asin, a rawn ti a. Kalkat khawpuia kutdawh tam takte chu a hmuhtir a, Lal Isua an lo rin ve theih nan an tan a tawngtai a, a tap vak vak ta mai a. Mihringte sualna nasatzia leh chu sual avanga thilnung tinrengte lungngai leh hreawm tuara tap chuah chuahte chu a hria a.

Chutah le, a thinlungah hla thar a lo thleng ta, a thluk pawh a lo thleng tel bawk a. Chu chu: Kan nghak reng che kan Lalber, Khawvel hreawm thim hnuaiah; I bautsaih Salem khawpui, aw ka ngai tawh mang e, Khawvel hrehawmna leh thim hhnuaiah leng mah ila, Hmangaiha mi zawngtu chu, ka ngai bang thei lo ve, tih hi. He a hla thar sa hian lo mawng zawlah, buh zingah amah mai chuan a lam ta zak zak mai a.

Lapan chang thumna, Aw khawiah nge Chhandamtu, Zion tlang ralmuanna chu, Sual tlen faina hmangaih tui, kan tan i luanna chu? Sual dan chahna kulhpui, i chatuan van khua leh tui, Chhandam fa i zar mawia lawma an lenna chu? tih a pek lai hian van khi a lo inhawng huau mai a, Lalpa engah chuan van mipui chhiar sen loh hi, Thianghlim, Thianghlim, Thianghlim, ti chunga thlawk kuala eng zuai zuai hian a hmu a, mahse rei lo teah van chu a inkhar leh ta mai a. He hla vawiin thlenga kan sak lar em em hi khitiang khian, favang laiin loah, a thluk nen Lalpan a pe a, a sa nghal a, a lampui bawk a, a chuai thei lo chu a nih tak hi.

Chang hnihnaah chuan, Lo hnai rawh ka Chhandamtu, ral a lian khawvelah hian, Thisena i tlansate, lungngaiin an tap e; Khawvel i fan lai a, i thlaphanna Kalvari, Hmelmate an lo kal e, i ram dotute chu, tih lai hian lung a tileng fo thin a, tunlaiah kan khawvel, a ni, Zoram khawvelah hian ram dotute an lo kal fo va, silai leh puak rang an rawn keng lo va, talhtum leh tiang, feikibar leh ngunhnam an nei a ni chuang hek lo, Kung-Fu an thiam bik hran lem lo va, Fafu erawh an hmu fo mahna, chakaia-fu aia fu tak feh a thlum zawk ang hian, zu thlum leh drugs chu kan ram dotute an lo ni ta zawk a.

Zu erawh chu dan anga zawrh a niin leia in a thiang a, mahse a in thiam lote tan thung chuan hmelma ram dotu a ni a, thlanmual thawhlawmah an inpe thuai thuai mai thin a ni lo vem ni? Chutihlai chuan, drugs erawh chu dan kalh leh dan bawhchhe chunga zawrh a ni thung a, a zuartu zawka kha ram dotu chu a ni. Hmana an sawi ka hriat thin chu, khi lamah chuan an faten zu an in a, an ruite hi an lawm a, an chhuang zawk, an tih hi a ni. Chunglai chuan nuih hi a za a, thawnthu ang lekah ka ngai fo thin. Mahse tunah erawh chuan keini ramah pawh a takin kan lo tawng ve ta der mai a lo ni a.

Drugs hlauhawmzia leh ṭhat lohzia hi engtia han sawi dan pawh ka thiam lo, mahse a zuarte chuan pawisa an hmuhna tur a nih avangin tuten emaw chhiat phah mahse an pawiti der si lo. Tangka sum ngainat hi sual tinreng bul a ni, tih hi a lo dik zet mai, Pulpit tlanga sawi erawh a hlawh khat deuh e, tih mai chauh a ni. Chuvangin, hmelma ram dotu chu drugs leh a zuarte hi an ni a, hei hi ND&PS Act an tih dan kalh a nih bawk avangin, kan ralthuam neih he dan hmang hian i do let ang u aw, mahse dan bak leh a kalha chea ti si loin. Chutilova dan kalh leh a pela kan dova kan kal chuan dan kan bawhchhe ve tho tihna a ni ang a, dan bawhchhe theuh theuh ta chu, pakhat a felin a dang a sual bik dawn em ni? Haw-hawa do loin kan ralthuam dan hmangin i do zawk ang u.