FIMKHUR ANG AW

Amah chu mihring leh Pathian a ni, Lal leh Chhandamtu nih a fawm. A dik zet mai, Zawlnei Isaia hnenah chuan Pathian, Jehova khan, keimah lo chu Pathian dang dang reng reng an awm lo, Chhandamtu, Lungpui dang reng an awm lo, a ti a, Krismas kan hman chhan Lal Isua kha, kan Mizo hla phuah thiam Rokunga chuan a hre chiang em em a, mihring a ni a, Pathian a ni bawk, tih a hriat avanga khitianga au chhuahpui kha a ni. A dinglama an khenbeh pawh khan a hre chiang khawp a, a vei lama khenbeh hnenah khan, Pathian meuh pawh i hlau lo maw, inang khat renga min hrem hi, Isua, i ram i thlen hun chuan min hrereng ang che aw, a ti a nih kha.

Mihring leh Pathian a nihna hretu kan hla phuah thiam Pu Rokunga hi 1914, Febraury ni 20 khan Aizawl Venghnuaiah a piang a, a pa chu Thanglura Hmar a ni. Thanglura te nupa hi an vanduai a, an fate an thi leh thin a, an kawmthlang nu chuan, Hei zet chu khaidingtu tur che u, chhungkaw ro a nih hi, tiin Rokunga tih tur a ni, a ti a. Chhungkaw tan mai pawh ni loin, Zoram tana ro tling a ni ta zawk a nih hi. Mi zakzum, inngaitlawm leh nunnenm, thuawi thei tak a ni a, a chanchin hi sawi tur tam tak a awm a, kan sawi seng lo ang. Hla tam tak a phuah a, chungte pawh chu kan hre hlawm vekin a rinawm a, sawi nawn ngaiin a lang lo.

Hla phuah hi a thiam a, tlirawl te, kum 16 emaw a nih aṭanga phuah tan niin a lang. Tin, a phuah dawnin a ngaihtuah lawk ngai lo va, a thinlunga lo lang kha a ziak nghal mai thin a ni. 1934 kum tir
aṭang khan Loch Printing Press, Synod Press ni taah hian a thawk a, chu chu a dam chhunga a hna a lo ni ta nghe nghe a ni. 1935 April thla khan Zamawii nen an innei a, fanu pathum leh fapa panga an nei. July ni 12, 1969 khan Mission Veng an chennaah a thi a, ani chu a thi ta, mahse Mizote thinlungah erawh engtikah mah a thi ngai lo ang. Hla hi 129 vel a phuah a, a hla kan sak lar em em tam tak a awm a ni. Khualbuk vengtu suihlung mawlin, Van Lal rengpui ka lungdamna, Puan ang a hnawl ta e, a tihte phei chu, khualbuk vengtu a mawl vang em ni, ti hawi zawnga tun hma khan kan khel laih laih thin kha, kan la hre awm e.

Rokunga Zawlkhawpui sira Chite luipui pawh, Zawlkhaw lam phei saw hmar lamah a la luang dem dem reng a, nipui leh thlasikah pawh a luang a, furah a luang bawk a, chutianga hman aṭanga luang tawh kha a la luang zel dawn a nih mek lai chuan keini pawhin Krismas lamah hunin min luanpui mek a, hemi a vuakvet lai hian chetsualnate hi a tam em em thin. Nat lawkna engmah nei lo, dam taka leng chhuak thia haw ta te, hliam nasa tak nena damdawi ina lut tate kan tam thin tih chu tumahin kan hai awm lo ve.

Khawvelin hma a sawn zel a, keini Zoram pawh hmasawnna kawngpuiah chuan a kal ve mek zel a, hmana kan thil neih ngaih loh lirtheite lah chu ni tin mi an thleng, thla tin an tam kum tin an pung zel, tih ang maiin ni tin a pung zel a. Ke pahnih nei chi lah chuti tho chu a ni. Chung kan thil neihte chu kan intih palhna leh hliamna, kan thih phahna a va ni tam tawh tehlul em. Hetiang avang hian a bik takin mas dawn hnaihah hian kan fimkhur a tul takmeuh lehzual thin. Tin, hetianga chhiatna leh chetsualna a awm fo thin tam ber hi chu ruihtheih thil, zu emaw damdawi emaw vang a ni, tih hi phat rual lah a ni hek lo. Damdawi emaw, zu emaw rui chunga lirthei khalh hi dan pawhin a phal lo va, license hial pawh a tihtawpsak theih a, lung in tan phah theih a ni bawk.

Chuvangin, mi tin te, a bikin thalaite i fimkhur ang u, rui chung chuan chak tak takin lirthei i khalh lo hram ang u aw, dan zawm kan lo nih phah dawn bawk si a. Krismas vuakvet velah hian kum tin mai hian chetsualna a tam thin a, rui chunga lirthei khalh loh mai bakah vah chhuah tam loh kha a tha ber mai. Tin, hetianga chetsualna avanga miin thihnate an lo tawh emaw, hliam an tawrha insenso ngai taka an awm chuan, kha an chuanna lirthei kha, dan angin insure a ni ngei turah ngai ila, chutianga insure loh chu dan kalh a niin khalh chhuah pawh a thiang hek lo. Chuvangin, vanduaina tawkte tan chuan MACT an tih mai, Motor Accident Claims Tribunal an tih maiah hian zangnadawmna, insure-na Company pek turin a kal theih a, an pe thin a ni, tihte pawh hi kan hriat hnu a lo nih pawhin i hre thar lehzual ang u aw.

Tin, thil mak deuh chu maw, hetianga mi lirthei thila chhiatna an tawh a, an thih changte hian Ukil thenkhat, ruaitu hmu meuh lo, mitthi chhungte ina kal a, zangnadawmna a hmuh theih a nia, tia lo va inzuar tawkte hi an awm emaw ni, Ukil hna thawk rei tawhte hian an sawi ka zeuh thin a, an nuih a za thin. Kei phei chuan an awm leh awm loh ka hre lo. Chuianga miin vanduaina an tawha Ukil-te zinga an ina kala inzuar an awm chuan, ukil luck lo, thiam lem lo, miin an rawih duh loh, rawih tlak vak loh an ni ngei ang. Ukil thiam leh luck-in ruaitu an zawng ngai lo va, miin an pan zawk thin. Hengahte pawh hian fimkhur a ngai tho mai. Engpawh nisi, lirtheih khalh chungchangah dan zawm zelin, mi tinte i fimkhur ang u aw.