KA CHAWL RIH A

Hun engemaw chen chu ka han chawl kha a ni a. Ka damlohna avanga min tawngtaipuitute zawng zawng chungah lawm­thu ka sawi a. Thi tura min ngai engemaw zat an awm tih ka hria, thi taa min ngai an awm bawk. Chuvangin Chhim lam khawi emaw atanga lo kal vang vang a, rawn fiah ka tawng hial. A thi tawh an ti che a, hei ka rawn fiah a, i la thi lo ngei tih ka mitin ka hmu che a, a lawmawm e, a ti. Nia a lawmawm.

2000 November thla khan biopsy result a chhuah thu Gauhti atangin min rawn hrilh a, chhuk turin min ti a. Ka chhuk hma ni chuan kan buai em em a, case a tam si, tang nen, thuhretu nen, police nen Ukil nen kan hnawk rup a ni ber. Chutah a tukah phaiah ka kal dawn tih hriain thiante leh thawhpui te, min lainattu hrang hrangten pawisa min pe a, dawhkanah kan dah tawp a, kei lah ka buai em em a. Kan Ukil S.L.Thansangan i buai e mai kan lo chhiarsak ang che, a ti a. Keiin Ukil Pu Saingura kha, PuThansanga kha lo en deuh teh a lo ru then ang e, ka ti. Chutihlai chuan Ukil Pu C.V. Auva a lo kal a, E heu cancer chu a nuamawm bik, i thi em lo ang a! a rawn ti a. Keiin ngawiteh, ka buai lutuk hei case tam si, thi hman pawh ka nih loh hi ka ti a. 

Chumi tuma, ka buai em mai, thi hman pawh pawh ka nih loh hi, ka tih chu a thang kual kikawi a nih ka ring a. Cancer-in ka thi dawn lo a ti, ka ti niawm takin a thangvel a ni ang, ka dawng ta fo mai. Tin, cancer hi natna chi khat a ni ve mai a, thina a ni kher lo va, thih tum kher chi pawh a ni lo, chu ka ti ve fo mai. Cancer-in ka thi dawn lo, hi chu ka la tichhin lo ve tlat. 

Tin, a penson tawh, tih leh son lo, tih ve mai maia lo buai an awm ka hria. P.L.Liandinga hi chu a pension tawh tih ka hre chiang a. Kei erawh chu ka la pension rih lo va, kumin 2019, December ni 31 hian ka la dam a nih chuan ka pension ve tawh ang. Ka chawlh chhungin, han ti ila, ka damsam meuh loh atang khan ka nunah thil danglam a awm nual mai, kei pawhin mak ka ti. Ka sawi tawhin ka hre nghe nghe. Aw en teh, an nun a dang ta, Chu ram ropui han thleng te zawng, tih ang mai khan.

Engtikah mah meizial nghei tum ngai lo, ka theih hram chuan leh ka thawk feih feih theih chhung chu nghei loh hram tum zawk khan ka zu ta miah lo a, hei vawihin thlengin hun eng emaw chen chu mei ka zu ta lo. Ka Pi Rii te phei chuan ka nghei tak tak ka nghei hlen dawn emaw pawh an ti a ni mahna, mahse ka nghei tihna a ni eng reng lo. Ka zu rih lo a ni mai. Tunah tak hi chuan cheng za hlawh pawhin ka zu peih lo. Tin, thingpui heh em em, a hang erawh in ai chuan in loh zawk duh hial khawpa thingpui thlum duh khan ka theih loh atangin ka la in leh miah lo thung. Ka duh loh a hang erawh vawi thum emaw lai ka in tawh thung chu mawle, a mak e. 

Tin, WWE, inchai hi Thawhleh zing leh Nilai zing hian live-in an chhuah thin avanga vawt ti chung pawha tho thin ka ni a, mahse tun thleng hian  ka la en leh ta miah lova tlai lamah an chhuah nawn pawh ka en chuang lo. TV hi ka en ta ngai lo ti ila a dik ber awm e. Tun hma, sawmriat chho vela Bangladesh atanga kan man emaw ni, inchai a chhuah thin kha, TV kan nei ve si lo, Pu R.F.Muana (L) bengvarin a chhuah changin a fate min rawn kohtir thin a. Keini pawh ka fate nen, eng hun pawh ni se, chaw ei laklawh pawh awm a awm lo, kan tlan thla nghal diak zel. Khata tanga inchai en thin tawhin a engamah ka en ta ngai lo hi ka nun chu a inthlak danglam hle chuan kan hre deuh a. 

Chutah le, hei kan hmaah hian Krismas kan lo thleng dawn ta reng mai a, Krismas hmaa ka chawl ka zo titih tituai hi ka lawm hle a. Lung a leng a, a hun a thleng dawn ta tih min hrilh thintu tlangsampar lah hmuh tur a vang si. Nihawipar, thenkhatin bawngpupar an tih Durtlang kham pang chho tlakdeng nikanga a vul eng tuar mai han hmuhte hi chuan a hnaih tawhzia min hriatir thin a nih hi. Amah Suaklianan, min hmangaihzia a hriat chian em avangin, Zion Ropuina Lalpa, Boral min zawngtu chu, Van khawpuiten ui mah se an dang zo lo ve; Engkima engkim chungah lal ber rawh se Amen, Min hmangaih hi tuman an hnial thei lo ve, a han tite hi a ril thlawt chu a nih hi. A ni e, Nang leh kei min hmangaihna hi tuman an hnial thei lo, a lo ni e. 

Tunah zawng kan Krismas hman dante pawh hi a dalin a pawnlang zo ta e. Venhim hi kan lo ngai ta a ni ang e, veng tinah duty buai buaiin kan buai a, zan inkhawm bana urlawk zan meuh pawhin, Pathian faka zaikhawm khuang ri te hi hriat tur a tam ta lo khawp mai. Keini kan tlangval zual lai, ka u Revd. Chuava te an la nau deuha min um dat dat thin laite kha chuan, Mas Sial A Lo Thleng e, tia an au atangin thinlung hi a mas ruai tawh mai a. Chutah inkhawm banin zaikhawmna inah kan zai a, nula tlangval interek tumah an awm ngai lo, kan zavai hian kan zaikhawm a. Thutthleng a awm lo, dap chhuatah kan thuthluanga kan tui em em.

Tapchhak lamah meilum ai tawk an awm a, Sipai chhuti-in tarmit dum a bun riang mai a, lungthu tlawhin nawalh sakhawr lu chuang a han nawt zit pher pher mai chu kan chung en lo thei lo. Chutah kawmchar-pathlang lamah khuangpu, silipar hruai chat zawm bun ngein khan, Lalpian hun lawmawm tak kan thleng len ta, Hlim taka lawmin zai i vawr ang; Thihna thim hnuaia thute tan enna ropui a tleng ta, Haleluia lawmin i zai ang; tia a men pawh meng lova hla a han la a, nuthlawi awrpuar miah loin shawl bat chunga hla changa a han sawi kan zai tui thinzia te kha chu aw, puankawp sawr ang tluk tluk a ni ber. Khatiang boruak ang kha chu, tawn leh ni her hian ka ring si lo, leng dang dar ang a chhai an ti che, tih ang mai a ni zo ta. 

E khai, kan insawi lungleng zo dawn takngial e, a tawp lam i hnaih tan tawh mai ang u aw. Vanglaini chhiartu zawng zawng Krismas hlim taka hmang turin duhsakna ka hlan a che u. Kan dam ang a, kum thar lamah kan la inhmu leh ang chu ti rawh maw?