MAS THLIR LET ANG AW?

Naupan lai khan Krismas te hi a rei kan ti em em a, kan nghakhlel thin a, mas leh mas inkar chu, amah kan hlaphuah thiam Tanpuian, Tawn loh kar ni chhun, chawhma pawh rei vawng vawng, a lo ti ang deuh khan, rei kan ti vawng vawng thin. Tunlai angin nihawi (bawngpu)-par tlakdeng leh chhim chhawng, chhuah lam leh chhim lam pawha par vul-eng tuar khampang leh awih tlan, khawi hmunah pwh awm se a dinhmun aṭang chuan hreh leh zak loin a lo vul chuk tawh hi chuan mas a hnai tawh tih min hriattirtu a ni thin.

Keini naupan ve lai thung erawh chuan nihawipar chu hmu ve thin mah ila kan lung a tileng ve chuang lo a, kan uipui tuilian thlir liam ve mai mai zawk thin. Mas a hnai tawh a, chu ngei chu a der ni lo, a taka mas a hnai tawh tih min kawhhmuntu leh hruai thlengtu a ni si a. Chu chu keini tan chuan, ka vaibel, tih tluk khawpa kan hriat, a kung leh hnah, par ro aṭang pawha kan hriat than tlangsam hi a ni. A chhiar pawh chhiar ve uk si loin CCA an buaipui ve chuk lem lo, bur ruak apiang a ri ring tih ang deuh lam ni loin, a par vul-var chuk vahrit ngum-de khawmpui lian emaw tih khawpa tlim dul chu eng emaw chang changin sava te, daikat an tih mai nupain an rawn tlan tih mai loh chu e, zu a nei tam lo pawh a ni ang, tlantu a nei vak lo, eng emaw changin phengphehlep var ri si lo thlawk der der chuan a bawm zeuh bawk thin a. Chu mai chu a tangkaina a ni ngawt lo.

Khawi emaw lai nikang pangpera tlangsam a par kan hmuh hi chuan maw, thlarauin kan khat ni loin kan thinlung hi a hlimin ranchaw-pekna-thleng lam hi a hawi Bethlehem ruih mai  thin. Keini ang rethei thingtlanga sei lian ran vulh bawk si lo tan chuan, mas-a kan sa ei hi mas lehah kan chhunzawm a ni ber mai. Hei hi dawt a ni hauh lo. Sial lo hian mas an hmang ngai tih lah kan hre hek lo. Urlawk zanah nula leh tlangval, nu leh pa, naupang a tua pawh hi mas thlen in zai khawmnaah kan kal vek a, interek hrang tumah an awm ngai meuh lo.

Zingah sial an talh a, keinin a phing kan la a, leiah kan rap hrual a, kan ham puara a, kan tan chuan world cup football thaber chi ai pawhin a mawiin a hlu zawk si thin. Ruai theh dawnah, chaw rawn la tawh ru, tiin an au a. In tinin kan chaw chhum theuh kan la khawm a. Tunlai anga changkang taka bafeh an ti emaw anga mas ruai theh a awm ve lo va, hnah kan la a, changel hnah lak thar ang sersawr chungah kan chaw lak khawm chu an khawrh a, a lai an ti awl a. Sa tui chu mau burin mi tin inkawpkimin an sem a, a ruhkawl lian pui pui leh a ti, a kawchhungtea laia an han suak vum thur mai chu thla hi a va muang em. Kohhran Upa inthlan dawna an phusa an tla leh si hnu lawka Pulpit-a thu an thusawi, Pathian thu pawh nise, a awm lohna pawl lehlamhoin, ani ve mai mai hi a! an ti ru sep sepa an thu an ei tui lo aiin keini chuan sesa ei tui kan ti. 

Nu sual deuhin chawthing hing a lo thawhru kan bar fuh chu e, kan paih lawng lawng a, Pastor inthlan dawna tu tan emaw a ruk-langsar taka an kampen leh lam pawlin an hria, an thusawi ei tui an ti lo ai pwhin chawthing hing tui kan ti lo va. Kan kiangah fatu sa semin dawlthlengah sa a chawi teuh, a lo kal kan hmu chu, a thunawn chu lawmin a khat, tih ang mai hi a ni a. Hnah  hnuaiah sa kan thukru zung zunga chutah kan hlui a lo hmu, e tlangvalte u, a sa in nei tawh lo a ni maw, tih rualin dawlthleng chu kan sirah a hung a, a kut khinghnih ngeia sa  thuma kan hluia an dah teuh mai chu e, eiruk hmang thwhlawm thwh teuh ai chuan keini ang rual kha chu kan lawmna leh hlimna a sang zawk daih ang. 

Chaw kan ei kham chu zaikhawmna lam hi tuma sawm ngai loin kan pan khawm sung sung a. Zai hi a tui em em a, a tlai tulh tulh a thim tulh tulh chu e, tunlai angin elektrik eng awm ve hek suh le, keini thlarau chan pawh a kaitho a ni ang, a lailumah thiante hnungah hawi zak zakin kan lam ve thin. Kan kal hmain sesa ti, hnahin kan fun a, biak in bang thumbawh kaisawih thuah karah kan thukru a, chu ber chu kan engto a, dar a han ri chu maw, kan sa thuhruk kha thianten an lo hmu fuh anga an lo ei ang tih hlauin kan tlan dawr dwr thin. Chutah biak in sir hmar lam hawiin mi hmuh hlau siin kan han eiru chu e, kan helh awl awl. Eiruk hmangten Pathian ram an luah lo vang, tih ziak han sermon chi rual kan ni law. 

Chutiang chuan mas-te hi thlaraua hlim leh lawmin tui takin kan hmang thin a, kan zai tlaivar thin. Tunlai angin musical instrument an tih ang hi kan nei lo, kan neih chhun chu khuang pui leh khuang te a ni mai a. Mahse chunglam khian a awrdein a ni chek ang, amah fak nan chuan a men pawh meng phal loin tui takin kan zaia kan zai tlaivar thin. Tunlaiah erawh zan dar 12 thleng zai khawm thei pawh kan awm ta meuh lo va, khuang ri hriat tur a awm ta lo a ni ber. Kan hmasawnna leh changkanna, finna leh thiamnate hi Pathian leh a Thlarau min hlattirtu leh hnawh tiausaktu a chang zo ta. Kan changkana kan biak in a nalh ropuia thawhlawm a tam poh leh kan thlarau nun ram erawh balu chunga vai ui dum bawk ang maiin a hniam salh salh mai chu a ni lo vem ni? 

Kum hlui thlah zana khap tih hrereng sia a hal ring puak darh mawi ber ber nih kan inchuh emaw tih mai a awl ang hian, kan thlarau nun ram pawh a chauin a chuai lo ta. Kan hlim chhungte hi a va rei lo em. Amah Upa Chawngbuaian:- 

Thlarau Thianghlim par tlante zawng,

Ka thlir hian mual an liam zo ta;

Aw ka Lalpa rawn hruai kir leh la,

Tlantu zaiin kan awi ang,

a lo ti ang khan thlarau mite hawi kir a hun a, mas kan hman dan thinah hian keini ngei pawh kan inen fiaha ennawn a ngai deuhin i hre ve thin lo vem ni?